ປີນີ້ ກະຊວງສາທາລະນະສຸກ ຮ່ວມກັບ ອົງການອະນາໄມໂລກ ຈະສ້າງກິດຈະກໍາເພື່ອສະຫຼອງວັນງົດສູບຢາໂລກ

ກະຊວງສາທາລະນະສຸກ ຮ່ວມກັບ ອົງການອະນາໄມໂລກ ປະຈໍາ ສປປ.ລາວ ຈັດຖະແຫຼງຕໍ່ຜູ້ສື່ຂ່າວທຸກຂະແໜງການເພື່ອຮ່ວມສະເຫຼີມສະຫຼອງ ວັນງົດສູບຢາໂລກ 31 ພຶດສະພາ ຄົບຮອບ 28 ປີ ແລະ ວັນງົດສູບຢາແຫ່ງຊາດ ຄົບຮອບ 7 ປີ ປະຈໍາປີ 2016 ພາຍໃຕ້ຄໍາຂວັນ ການພິມຄໍາເຕືອນສຸຂະພາບທີ່ເປັນຮູບພາບໃຫຽ່ໃສ່ຊອງຢາສູບ ເຊິ່ງພິທີຖະແຫຼງຂ່າວໄດ້ຈັດຂຶ້ນໃນຕອນບ່າຍວັນທີ 23 ພຶດສະພາ 2016 ທີ່ນະຄອນຫຼວງວຽງຈັນ ໂດຍທ່ານ ຮສ.ດຣ. ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ໄດ້ກ່າວວ່າ ທຸກໆປີ ອົງການອະນາໄມໂລກ ແລະ ປະເທດພາຄີ ໄດ້ຮ່ວມກັນສະເຫຼີມສະເຫຼີມວັນງົດສູບຢາໂລກດ້ວຍການປະຕິບັດກິດຈະກໍາຕ່າງໆ ເພື່ອສະແດງໃຫ້ເຫັນເຖິງຜົນຮ້າຍທີ່ເກີດຈາກການສູບຢາ ແລະ ການໄດ້ຮັບຄວັນຢາສູບ ພ້ອມກັນນັ້ນ ກໍໄດ້ໃຫ້ຂໍ້ແນະນໍາທີ່ເປັນປະໂຫຽດແກ່ປະເທດພາຄີຄື ການກໍານົດນະໂຍບາຍ ແລະ ແຜນງານຕ່າງໆເພື່ອເຮັດໃຫ້ການບໍລິໂພກຢາສູບຫຼຸດລົງເທື່ອລະກ້າວ.

ເພື່ອປະຕິບັດຕາມພັນທະສົນທິສັນຍາສາກົນ ວ່າດ້ວຍການຄວບຄຸມຢາສູບ ມາດຕາ 11 ກ່ຽວກັບການພິມຄໍາເຕືອນສຸຂະພາບທີ່ເປັນຮູບພາບໃສ່ຊອງຢາສູບ ກະຊວງສາທາລະນະສຸກ ຮ່ວມກັບກະຊວງກ່ຽວຂ້ອງ ແລະ ອົງການຈັດຕັ້ງສາກົນເຊັ່ນ ອົງການອະນາໄມໂລກ ແລະ ອົງການສະມາພັນຄວບຄຸມຢາສູບອາຊຽນ ໄດ້ມີຄວາມພະຍາຍາມເພື່ອປະຕິບັດໃຫ້ໄດ້ຕາມພັນທະຂອງ ສປປ.ລາວ ຕໍ່ສົນທິສັນຍາສາກົນດັ່ງກ່າວ ຈິ່ງໄດ້ຮ່າງຂໍ້ຕົກລົງວ່າດ້ວຍການພິມຄໍາເຕືອນສຸຂະພາບທີ່ເປັນຮູບພາບໃສ່ຊອງຢາສູບ ເຊິ່ງໃນມື້ນີ້ ໃນນາມຄະນະກໍາມະການແຫ່ງຊາດເພື່ອການຄວບຄຸມຢາສູບ ກໍໄດ້ລົງລາຍເຊັນຂໍ້ຕົກລົງວ່າດ້ວຍການພິມຄໍາເຕືອນສຸຂະພາບທີ່ເປັນຮູບພາບຂະໜາດ 75%ໃສ່ວັດຖຸຫຸ້ມຫໍ່ຜະລິດຕະພັນຢາສູບ ເພື່ອໃຫ້ສາມາດສື່ສານຂໍ້ມູນຄວາມຈິງກ່ຽວກັບຜົນຮ້າຍທີ່ເກີດຈາກການສູບຢາ ແລະ ການໄດ້ຮັບຄວັນຢາສູບໃຫ້ແກ່ປະຊາຊົນລາວໃນຂອບເຂດທົ່ວປະເທດ.

ມາເຖິງປັດຈຸບັນ ທັງ 10 ປະເທດອາຊຽນ ແມ່ນໄດ້ອອກນິຕິກໍາກ່ຽວກັບການພິມຄໍາເຕືອນສຸຂະພາບທີ່ເປັນຮູບພາບໃສ່ວັດຖຸຫຸ້ມຫໍ່ຜະລິດຕະພັນຢາສູບເປັນທີ່ຮຽບຮ້ອຍແລ້ວ ດ້ວຍເຫດນີ້ ກໍຖືວ່າເປັນໜ້າປະຫວັດສາດທີ່ກະຊວງສາທາລະນະສຸກ ມອບໃຫ້ເປັນຂອງຂວັນແກ່ປະຊາຊົນລາວທົ່ວປະເທດໃນການສົ່ງເສີມສຸຂະພາບ ທັງເປັນການສະເຫຼີມສະຫຼອງວັນງົດສູບຢາໂລກ ຄົບຮອບ 28 ປີ ກໍຄືວັນງົດສູບຢາແຫ່ງຊາດຄົບຮອບ 7 ປີໃນປີນີ້ໃຫ້ເຕັມໄປດ້ວຍຜົນສໍາເລັດອັນຍິ່ງໃຫຽ່ ທີ່ສາມາດບັນລຸຕໍ່ພັນທະສົນທິສັນຍາສາກົນ ດັ່ງນັ້ນ ຈິ່ງຮຽກຮ້ອງໃຫ້ຜູ້ດໍາເນີນທຸລະກິດ ຜະລິດ ແລະ ນໍາເຂົ້າຜະລິດຕະພັນຢາສູບ ຈົ່ງໃຫ້ຄວາມຮ່ວມມື ແລະ ພ້ອມກັນຈັດຕັ້ງປະຕິບັດຕາມຂໍ້ຕົກລົງສະບັບນີ້ຢ່າງເຂັ້ມງວດ.
ຂະນະທີ່ທ່ານນາງ ຈູລຽດ ໄຟລໂຊຄ໌ ຜູ້ຕາງໜ້າອົງການອະນາໄມໂລກ ປະຈໍາ ສປປ.ລາວ ກໍໄດ້ຖະແຫຼງວ່າ ຜະລິດຕະພັນຢາສູບ ແມ່ນນຶ່ງໃນບັນດາໄພຂົ່ມຂູ່ຕໍ່ວຽກງານສົ່ງເສີມສຸຂະພາບທີ່ທົ່ວໂລກໄດ້ຜະເຊີນໜ້າຕະຫຼອດມາ ເຊິ່ງໃນແຕ່ລະປີມີຄົນເສຍຊີວິດຈາກພະຍາດທີ່ເກີດຈາກຢາສູບ 6 ລ້ານຄົນໃນທົ່ວໂລກ ສໍາລັບໃນພາກພື້ນປາຊີຟິກຕາເວັນຕົກ ມີຄົນເສຍຊີວິດ 2 ຄົນໃນທຸກ 1 ນາທີ ແລະ ປະມານ 13 ຄົນຕໍ່ມື້ໃນ ສປປ.ລາວ.

ນາງກ່າວຕໍ່ໄປວ່າ ໃນປີນີ້ ລັດຖະບານ ສປປ.ລາວ ກໍໄດ້ເຫັນດີສະເຫຼີມສະຫຼອງ ວັນງົດສູບຢາໂລກ ພາຍໃຕ້ຄໍາຂວັນ ການພິມຄໍາເຕືອນສຸຂະພາບທີ່ເປັນຮູບພາບໃຫຽ່ ໃສ່ຊອງຢາສູບ ເຊິ່ງໃນສົນທິສັນຍາສາກົນວ່າດ້ວຍການຄວບຄຸມຢາສູບ ໄດ້ຮຽກຮ້ອງໃຫ້ປະເທດທີ່ເປັນພາຄີຈົ່ງສ້າງຄວາມພ້ອມເພື່ອກ້າວໄປສູ່ການມີຊອງຢາສູບທີ່ບໍ່ມີການໂຄສະນາຍີ່ຫໍ້ຢາສູບໃນອະນາຄົດ ສ່ວນການພິມຄໍາເຕືອນທີ່ເປັນຮູບພາບໃສ່ສິ່ງຫຸ້ມຫໍ່ຜະລິດຕະພັນຢາສູບ ແມ່ນມີປະໂຫຽດຢ່າງຫຼວງຫຼາຍເຊັ່ນ ສື່ໃຫ້ເຫັນຜົນຮ້າຍທີ່ເກີດຈາກການສູບຢາ ແລະ ເຮັດໃຫ້ຜູ້ສູບຢາເຫັນເຖິງຜົນຮ້າຍຂອງຢາສູບ ຄິດຢາກອອກຢາສູບ ແລະ ນໍາໄປສູ່ການອອກຢາສູບ ດັງນັ້ນ ສົມຄວນແລ້ວທີ່ລັດຖະບານ ສປປ.ລາວ ໄດ້ອອກຂໍ້ຕົກລົງກ່ຽວກັບການພິມຄໍາເຕືອນສຸຂະພາບທີ່ເປັນຮູບພາບໃສ່ຜະລິດຕະພັນຫຸ້ມຫໍ່ຢາສູບຮ່ວມກັບ 77 ປະເທດໃນໂລກທີ່ເປັນພາຄີ.

ຂ່າວ/ພາບ: ເທບພະວົງ