ປະຫວັດ “ວັນວິສາຂະບູຊາ” ວັນທີ່ສຳຄັນທີ່ສຸດຂອງສາສະໜາພຸດ

ເດືອນຫົກເພັງເປັນວັນສຳຄັນທາງພະພຸດທະສາດສະໜາ ເພາະເປັນວັນປະສູດ (ວັນເກີດ) ວັນຕັດສະຮູ້ (ວັນບັນລຸທຳມະພິເສດ) ແລະ ວັນປະລິນິບພານ (ວັນຕາຍ) ຂອງອົງສົມເດັດພະສຳມາ ສຳພຸດທະເຈົ້າ, ເພາະສະນັ້ນ ບັນດາຊາວພຸດທົ່ວໂລກທີ່ນັບຖືພະພຸດທະສາດສະໜາ ຈຶ່ງໄດ້ພາກັນຊົມຊື່ນຍິນດີ ປະກອບການເຮັດບຸນເປັນຕົ້ນວ່າ: ໃຫ້ທານ, ຮັກສາສິນ, ຟັງທຳມະເທດສະໜາ ແລະ ບຳເພັນກຸສົນ ດ້ວຍວິທີການຕ່າງໆໃນວັນດັ່ງກ່າວນັ້ນເພື່ອຕອບສະໜອງພະຄຸນ ແລະ ເຊີດຊູພະພຸດທະສາດສະໜາໃຫ້ຮຸ່ງເຮືອງຕໍ່ໆໄປ.

ຄວາມສຳຄັນຂອງວັນວິສາຂະບູຊາ ເປັນວັນສຳຄັນຍິ່ງທາງພະພຸດທະສາສະໜາ ເພາະເປັນວັນທີ່ພະພຸດທະເຈົ້າປະສູດຄືເກີດ, ໄດ້ຕັດສະຮູ້ຄືສຳເລັດ ແລະ ໄດ້ປະລິນິພານຄືດັບ ເກີດຂຶ້ນກົງກັນທັງ 3 ຢ່າງໃນມື້ເພັງ 15 ຄໍ່າ ເດືອນ 6.

  1. ເມື່ອເຈົ້າຊາຍສິທັດຖະປະສູດທີ່ພະລາດຊະອຸດທະຍານລຸມພິນີວັນ ລະຫວ່າງນະຄອນກະບິນລະພັດກັບເທວະທະຫະ ເມື່ອຕອນເຊົ້າວັນສຸກ ຂຶ້ນ 15 ຄໍ່າ ເດືອນ 6 ປີຈໍ ກ່ອນພຸດທະການ (ພສ) 80 ປີ.
  2. ເມື່ອເຈົ້າຊາຍສິທັດຖະຕັດສະຮູ້ ເປັນພະພຸດທະເຈົ້າເມື່ອພະຊົນມາຍຸໄດ້ 35 ພັນສາ ທີ່ໃຕ້ຮົ່ມຕົ້ນໄມ້ສີມະຫາໂພ ຝັ່ງແມ່ນໍ້າເນລັນຊະລາ ໃນຕອນເຊົ້າວັນພຸດ ຂຶ້ນ 15 ຄໍ່າ ເດືອນ 6 ປີລະກາ ກ່ອນພຸດທະການ 45 ປີ ຫຼັງຈາກອອກບວດໄດ້ 6 ປີ ປັດຈຸບັນສະຖານທີ່ຕັດສະຮູ້ແຫ່ງນີ້ຮຽກວ່າ “ພຸດທະຄະຍາ” ຢູ່ທີ່ເມືອງຄະຍາ ລັດພິຫານຂອງອິນເດຍ.
  3. ຫຼັງຈາກຕັດສະຮູ້ແລ້ວ ໄດ້ປະກາດພະພຸດທະສາສະໜາ ແລະ ໂພດເວໄນຍະສັດໄດ້ 45 ປີ ພະຊົນມາຍຸໄດ້ 80 ພັນສາ ກໍ່ສະເດັດດັບຂັນປະລິນິພານ ເມື່ອວັນອັງຄານຂຶ້ນ 15 ຄໍ່າ ເດືອນ 6 ປີມະເສັງ ທີ່ສາລະວະໂນທະຍານ ຂອງມັນລະກະສັດ ເມືອງກຸລິນາລາ ແຄວ້ນມັນລະ (ປັດຈຸບັນຢູ່ໃນເມືອງ ກຸສີນະຄອນ ແຄວ້ນອຸດຕະລະປະເທດ ຂອງປະເທດອິນເດຍ).

ຖືວ່າເປັນເລື່ອງທີ່ໜ້າອັດສະຈັນຍິ່ງ ທີ່ເຫດການທັງ 3 ກ່ຽວກັບວິຖີຊີວິດຂອງພະສຳມາສຳພຸດທະເຈົ້າ ເຊິ່ງມີຊ່ວງໄລຍະເວລາຫ່າງກັນເປັນເວລາຫຼາຍສິບປີ ບັງເອີນເກີດຂຶ້ນໃນມື້ເພັງ 15 ຄໍ່າ ເດືອນ 6.

ກອງປະຊຸມໃຫຍ່ຂອງສະຫະປະຊາຊາດຄັ້ງທີ່ 54 ຢູ່ນະຄອນຫຼວງນິວຢອກ ປະເທດສະຫະລັດອາເມລິກາ ໃນວັນທີ 15 ທັນວາ 1999 ໄດ້ປະກາດຮັບຮອງວັນວິສາຂະບູຊາເປັນວັນສຳຄັນສາກົນຂອງໂລກ ກໍ່ຄືວັນສັນຕິພາບຂອງໂລກ ແລະ ທຸກປະເທດທີ່ເປັນສະມາຊິກຂອງອົງການສະຫະປະຊາຊາດໄດ້ມີການສະເຫຼີມສະຫຼອງວັນດັ່ງກ່າວຢ່າງຍິ່ງໃຫຍ່ ເວົ້າລວມ, ເວົ້າສະເພາະປະເທດທີ່ນັບຖືພະພຸດທະສາດສະໜາແມ່ນໃຫ້ຖືຄວາມສຳຄັນເປັນພິເສດ.

ຮຽບຮຽງບົດ: ພຸດສະດີ

ແຫຼ່ງຂໍ້ມູນ: hilight.kapook

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.