ນໍ້າຖ້ວມໜັກທີ່ຫວຽດນາມ ປະຊາຊົນກວ່າ 50 ພັນຄົນຕ້ອງອົບພະຍົບ

ເວັບໄຊຂ່າວ dailynews ລາຍງານຈາກນະຫຼວງຮ່າໂນ່ຍ ເມື່ອວັນທີ 12 ຕຸລາ 2020 ວ່າ ຄະນະກຳມະ ການປ້ອງກັນ ແລະ ຄວບຄຸມໄພພິບັດແຫ່ງຊາດຂອງຫວຽດນາມ ໄດ້ລາຍງານກ່ຽວກັບຄວາມຄືບໜ້າຂອງສະພາບນໍ້າຖ້ວມ ເຊິ່ງເກີດຂຶ້ນຢ່າງກວ້າງຂວາງໃນເຂດພາກກາງຂອງປະເທດ ຈາກອິດທິພົນຂອງລົມມໍລະສຸມ ນັບຕັ້ງແຕ່ເດືອນນີ້ ເຊິ່ງມີລາຍງານຈຳນວນຜູ້ເສຍຊີວິດເພີ່ມຢ່າງໜ້ອຍ 20 ຄົນ ແລະ ມີຜູ້ສູນຫາຍ 14 ຄົນ.

ທັງນີ້, ພື້ນທີ່ທີ່ໄດ້ຮັບຜົນກະທົບລວມມີ: ແຂວງ ກວາງຈິ, ແຂວງກວາງນາມ, ແຂວງເຖື່ອທຽນເວ້ ແລະ ເມືອງດານັງ ໂດຍມີລາຍງານລະດັບນໍ້າຖ້ວມຂັງສູງ ຈາກ 30 ຊັງຕີແມັດ ຈົນເຖິງ 3 ແມັດ ເຮັດໃຫ້ປະ ຊາຊົນກວ່າ 50 ພັນຄົນ ຕ້ອງຍົກຍ້າຍອອກຈາກເຮືອນຂອງພວກເຂົາ, ໃນຂະນະທີ່ສະໜາມບິນນານາຊາດ ເວ້ ແລະ ດານັງຕ້ອງຖືກໂຈະໃຫ້ບໍລິການຊົ່ວຄາວ.

ນອກຈາກນີ້, ກົມອຸຕຸນິຍົມວິທະຍາແຫ່ງຊາດຂອງຫວຽດນາມໄດ້ເຕືອນປະຊາຊົນໃນຂົງເຂດນີ້ ໃຫ້ກຽມພ້ອມຮັບມືກັບອິດທິພົນຂອງພາຍຸເຂດຮ້ອນ ລີຟານ ເຊິ່ງເປັນພາຍຸຫົວທີ 7 ທີ່ພາດຜ່ານພາກກາງຂອງປະເທດໃນອາທິດນີ້, ໃນເບື້ອງຕົ້ນປະລິມານນໍ້າຝົນທີ່ຄາດການແມ່ນ 600 ເຖິງ 700 ມິລີແມັດ.

ຮຽບຮຽງຂ່າວ: ພຸດສະດີ

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.