ນຳຜູ້ຖືກຫາຄາດຕະກຳເມຍ ມາເຮັດແຜນປະກອບຄຳຮັບສາລະພາບ

ໃນວັນທີ 24 ພຶດສະພາ 2017, ພະແນກສືບສວນ-ສອບສວນອາຍາ ປກສ ແຂວງຫົວພັນ ໄດ້ນຳ ຄາດຕະກອນໂຫດຊື່ທ້າວ ເຢີເລົາ ອາຍຸ 28 ປີ, ຢູ່ບ້ານລ່ອງເມົ່າ ເມືອງຊຳເໜືອ ແຂວງຫົວພັນ ທີ່ກໍ່ເຫດໃຊ້ມີດແທງ ຄໍ ແລະ ຕົນຕົວຂອງນາງ ປາເນັ່ງຢາງ ( ຜູ້ເປັນເມຍ ) ຫຼາຍບາດ ຈົນ ເຮັດໃຫ້ເມຍຊິວິດຄາທີ່ ໃນທ້າຍປີ 2016 ຍ້ອນສົງໄສວ່າເມຍມີຊູ້  ເພື່ອ ເຮັດ ແຜນປະກອບຄໍາສາລະພາບໃຫ້ຄະດີກະຈ່າງແຈ້ງຂຶ້ນຕື່ມ ປະກອບ ໃສ່ສໍານວນຄະດີສົ່ງໃຫ້ໄອຍະການສັ່ງຟ້ອງສານຕິດສິນຕາມກົດໝາຍ.

ເຫດການດັ່ງກ່າວ, ເກີດຂຶ້ນໃນເວລາ 1 ໂມງຂອງວັນທີ 14 ພະຈິກ 2016 ທີ່ບ້ານລ່ອງເມົ່າ ເມືອງຊຳເໜືອ ແຂວງຫົວພັນ. ກ່ອນເກີດເຫດ, ທ້າວ ເຢີເລົາ ພ້ອມດ້ວຍນາງ ປາເນັ່ງຢາງ (ເມຍ) ໄດ້ຜິດຖຽງກັນ. ຈາກ ນັ້ນ, ປາເນັ່ງຢາງ (ຜູ້ຕາຍ) ຈຶ່ງໜີໄປລີ້ຢູ່ເຮືອນຂອງອ້າຍ ຢູ່ໃນບ້ານດຽວ ກັນ. ເມື່ອທ້າວ ເຢີເລົາ ຮູ້ຈຶ່ງນຳໄປຫາ ພໍໄປຮອດເຫັນ ວ່າເມຍຢູ່ໃນ ເຮືອນ ຈຶ່ງກັບໄປເຮືອນ ແລ້ວເອົາເຫຼັກມາງັດ ເຂົ້າໃນຫ້ອງນອນເຮືອນ ຂອງອ້າຍເມຍ.

ພາຍຫຼັງທີ່ປະຕູໄຂອອກໄດ້ ຈຶ່ງເຫັນເມຍນັ່ງຢູ່ໃນຫ້ອງນອນ. ເວລາ ນັ້ນ, ຜູ້ກ່ຽວຈຶ່ງເອົາມີດທີ່ກຽມມານັ້ນ ແທ່ງເຂົ້າທີ່ຄໍ ແລະ ແທງເຂົ້າ ຕົນຕົວຂອງນາງ ປາເນັ່ງຢາງ ຫຼາຍບາດ ຈົນເຮັດໃຫ້ນາງ ປາເນັ່ງຢາງ ເສຍຊີວິດຄາທີ່. ພາຍຫຼັງທີ່ເຫັນວ່າເມຍເສຍຊີວິດແລ້ວ ຜູ້ກ່ຽວກໍແທງ ຕົວເອງຕາຍເພື່ອໃຫ້ຕາຍ ແຕ່ຜູ້ກ່ຽວບໍ່ຕາຍ ຍ້ອນພີ່ນ້ອງມາເຫັນ ແລ້ວນຳສົ່ງໂຮງໜໍ ສາມາດຊ່ວຍຊີວິດໄວ້ທັນ.

ປັດຈຸບັນ, ເຈົ້າໜ້າທີ່ກຳລັງກັກຕົວທ້າວ ເຢີເລົາ ໄວ້ຢູ່ໃນຄ້າມຄຸມຂັງ ເພື່ອລໍຖ້າສະຫຼຸບສຳນວນຄະດີສົ່ງໃຫ້ສານຕັດສິນ ຕາມຂັ້ນຕອນຂອງ ກົດໝາຍ.
ແຫລ່ງຂ່າວ: ໜັງສືພິມຄວາມສະຫງົບ