ນັກວິຊາການສະເໜີໃຫ້ລັດຖະບານລາວພັດທະນາພະລັງງານທາງເລືອກທີ່ຍືນຍົງ.

ນັກວິຊາການດ້ານສິ່ງແວດລ້ອມທຳມະຊາດສະເໜີວ່າ ລັດຖະບານລາວ ຄວນຈະຫັນປ່ຽນແຜນການພັດທະນາ ດ້ານພະລັງງານ ຈາກການກໍ່ສ້າງເຂື່ອນ ມາເປັນການສົ່ງເສີມແຫລ່ງຜະລິດພະລັງງານທາງເລືອກທີ່ຍືນຍົງ.

ທ່ານນາງຢູກະ ດິກູຊິ ຜູ້ອຳນວຍການອົງການ Mekong Watch ແຫ່ງປະເທດຍີ່ປຸ່ນ ຊຶ່ງເປັນອົງການອະນຸລັກສິ່ງແວດລ້ອມທຳມະຊາດ ໃນລຸ່ມແມ່ນ້ຳຂອງ ໄດ້ສະເໜີຄວາມເຫັນວ່າ ລັດຖະບານລາວ ຄວນທີ່ຈະມີການທົບທວນແຜນການພັດທະນາ
ທາງດ້ານພະລັງງານ ຈາກການທີ່ໄດ້ເນັ້ນໜັກໃນດ້ານການສົ່ງເສີມການລົງທຶນເພື່ອກໍ່ສ້າງເຂື່ອນໄຟຟ້າທັງໃນລາວ ແລະເທິງແນວແມ່ນ້ຳຂອງນັ້ນ ໂດຍຫັນປ່ຽນມາເປັນການພັດທະນາ ແລະສົ່ງເສີມແຫລ່ງຜະລິດພະລັງງານທາງເລືອກ ເຊັ່ນ: ພະລັງງານລົມ, ພະລັງງານແສງອາທິດ ແລະພະລັງງານຊີວະມວນ ທີ່ເປັນມິດຕໍ່ສິ່ງແວດລ້ອມທຳມະຊາດເປັນດ້ານຫລັກ.

ທັງນີ້ທ່ານນາງຢູກະ ດິກູຊິ ໄດ້ໃຫ້ເຫດຜົນວ່າ ການກໍ່ສ້າງເຂື່ອນໄຟຟ້າ ໃນໄລຍະຜ່ານມາ ໂດຍສະເພາະແມ່ນການກໍ່ສ້າງເຂື່ອນໄຟຟ້າເທິງແນວແມ່ນ້ຳຂອງໃນລາວແລະ ຈີນ ໄດ້ສົ່ງຜົນກະທົບຕໍ່ສິ່ງແວດລ້ອມທຳມະຊາດ ແລະ ປະຊາຊົນ ທີ່ຢູ່ໃນເຂດຕອນລຸ່ມຂອງແມ່ນ້ຳຂອງ ຢ່າງກວ້າງຂວາງໃນປັດຈຸບັນນີ້ ໂດຍຈະເຫັນໄດ້ຈາກຜົນກະທົບຕໍ່ປາ ແລະສັດນ້ຳ ຊຶ່ງກໍເຮັດໃຫ້ຈຳເປັນຕ້ອງທຳການສຶກສາວິໄຈຢ່າງຮອບດ້ານແລະໄດ້ມາດຕະຖານສາກົນ ຢ່າງແທ້ຈິງເສຍກ່ອນ ດັ່ງທີ່ທ່ານນາງໄດ້ໃຫ້ການຢືນຢັນວ່າ:

“ຄວນຈະມີການສຶກສາທັງລຸ່ມນ້ຳຂອງໃຫ້ຊັດເຈນໃຫ້ອອກມາໃຫ້ໄດ້ ຖ້າບໍ່ມີອັນນີ້ແລ້ວ ບໍ່ຄວນຈະສ້າງຫຍັງອີກເລີຍ ຕອນນີ້ກໍຮູ້ສຶກວ່າ ຈະວິກິດແລ້ວ ໃນເລື່ອງຂອງປາ ແຕ່ກໍຍັງມີການພັດທະນາດ້ານເສດຖະກິດຢ່າງດຽວໄປກ່ອນ ແລ້ວທີ່ນີ້ໄຟຟ້ານີ້ໃຊ້ວິທີໃດກໍໄດ້ ຈະຜະລິດໄດ້ຫຼາຍໆ ວິທີໃຊ້ໃໝ່ ແຕ່ປານີ້ຫາຍໄປແລ້ວເອົາຄືນມາບໍ່ໄດ້ ອັນນີ້ໜ້າຈະຄິດເລື່ອງນີ້ດ້ວຍ.”

ກ່ອນໜ້ານີ້ ທ່ານນິວັດ ຮ້ອຍແກ້ວ ແກນນຳເຄືອຂ່າຍປະຊາຊົນໄທ ເພື່ອການອະນຸລັກສິ່ງແວດລ້ອມທຳມະຊາດໃນລຸ່ມແມ່ນ້ຳຂອງ ໄດ້ຢືນຢັນວ່າ ເຄືອຂ່າຍປະຊາຊົນໄທ ແລະ ບັນດາອົງການອະນຸລັກສິ່ງແວດລ້ອມທຳມະຊາດ ທັງໃນອາຊ່ຽນ ແລະ ສາກົນ ຍັງຈະສືບຕໍ່ເຄື່ອນໄຫວຄັດຄ້ານການກໍ່ສ້າງເຂື່ອນໄຟຟ້າເທິງແນວແມ່ນ້ຳຂອງ ໂດຍສະເພາະແມ່ນໂຄງການກໍ່ສ້າງເຂື່ອນເທິງແມ່ນ້ຳຂອງໃນລາວນັ້ນ ທັງນີ້ກໍເນື່ອງຈາກວ່າ ໂຄງການກໍ່ສ້າງເຂື່ອນເທິງແນວແມ່ນ້ຳຂອງໃນລາວນັ້ນ ຈະສົ່ງຜົນກະທົບ ຕໍ່ການອົບພະຍົບຂອງປາ ທັງຍັງຈະສົ່ງຜົນກະທົບຕໍ່ລະບົບນິເວດທຳມະຊາດ ໃນແມ່ນ້ຳຂອງ ຕະຫຼອດທັງສາຍ ໃນເຂດລຸ່ມແມ່ນ້ຳອີກດ້ວຍ.

ແຕ່ຢ່າງໃດກໍຕາມ ກຸ່ມບໍລິສັດຕ້າຖັງຈາກຈີນ ທີ່ເປັນຜູ້ລົງທຶນໃນໂຄງການກໍ່ສ້າງເຂື່ອນປາກແບງ ເທິງແນວແມ່ນ້ຳຂອງ ກໍໄດ້ວາງເປົ້າໝາຍ ທີ່ຈະເລີ່ມລົງມືກໍ່ສ້າງເຂື່ອນໃນພາກຕົວຈິງໃຫ້ໄດ້ພາຍໃນປີ 2017 ນີ້ ໂດຍໃນປັດຈຸບັນ ທາງບໍລິສັດກຳລັງສຸມໃສ່ການສຶກສາ ແລະສຳຫລວດໃນຂັ້ນສຸດທ້າຍເພື່ອນຳສະເໜີ ເອກກະສານ ສຳຄັນຕ່າງໆ ທີ່ກ່ຽວຂ້ອງໄປຍັງປະເທດສະມາຊິກ ຂອງຄະນະກຳມາທິການແມ່ນ້ຳຂອງ (MRC) ຮ່ວມກັບລາວ ກໍຄື ກຳປູເຈຍ ໄທ ແລະຫວຽດນາມນັ້ນໃຫ້ຮັບຊາບເຖິງລາຍລະອຽດຂອງແຜນການດ້ານຕ່າງໆ ຂອງໂຄງການໃນມໍ່ໆນີ້.

 

ແຫລ່ງຂ່າວ: Support Prime Minister Thongloun Sisoulith

1 COMMENT

  1. ແນວຄວາມຄິດນີ້ແມ່ນດີຫລາຍ ນະໂຍບາຍຫມໍ້ໄຟອາຊຽນກໍດີ ແຕ່ຄວາມຍືນຍົງ ແລະສະອາດ ກໍສຳຄັນຕໍ່ຄົນ ແລະອານາຄົດຂອງຊາດ ກໍສຳຄັນບໍ່ໜ້ອຍໄປກວ່າກັນເລີຍ ຖ້າຈະວ່າໄປຕາມກົດເກນແລ້ວກໍຄືແມ່ນໍ້າມັນມີການບົກແຫ້ງ ປ່າໄມ້ມີມື້ສູນຫາຍ (ເພາະຜູເປົກຄອງບໍລິຫານບໍ່ແມ່ນຄົນເກົ່າຕະຫລອດໄປ) ເຂື່ອນໄໄຟ້າພະລັງນໍ້າມີອາຍຸການໃຊ້ງານທີ່ຈຳກັດ (ປັບປຸງ ປ່ຍນຖ່າຍຍາກ ຫລືບໍ່ໄດ້), ຜົນກະທົບກັບມີຫລາຍກວ່າໂດຍສະເພາະແມ່ນຕໍ່ສິ່ງແວດລ້ອມທຳມະຊາດ ລະບົບນິເວດ ເຊິ່ງມີສ່ວນກ່ຽວຂ້ອງໂດຍກົງຕໍ່ການດຳລົງຊີວິດຂອງຄົນ, ກົງກັນຂ້າມ ພະລັງງານທົດແທນ ເຊັ່ນ ແສງຕາເວັນ, ລົມ, ແກ໊ສຊີວະພາບ ເຫລົ່ານີ້ລ້ວນແຕ່ບໍ່ໝົດສິ້ນເປັນ (ຈົນກວ່າໂລກຈະແຕກ) ການລົງທຶນບໍ່ຫລາຍ ຜົນກະທົບໜ້ອຍກວ່າ ບໍ່ຕ້ອງການນັກວິຊາການກໍ່ສ້າງ, ຄຸ້ມຄອງສູງ ແລະຫລາຍ ການປັບປຸງປ່ຽນຖ່າຍອຸປະກອນຫມົດອາຍຸ ຫລືຊຳຫລຸດກໍງ່າຍກວ່າ… ແມ່ນວ່າລະດັບການຜລິດພະລັງງານຈະນອ້ຍກວ່າເຂື່ອນໄຟຟ້າຈາກນຳ້ ແຕ່ຖ້າທຽບກັບຫລາຍໆດ້ານ ເຫັນວ່າຈະຄຸ້ມຄ່າກວ່າກັນ…

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.