ນະຄອນຫຼວງວຽງຈັນ ໄດ້ຮັບພາຫະນະເກັບມ້ຽນຂີ້ເຫຍື້ອ

d31e79a5968cde7da0709b943840ef71

ວັນ​ທີ 24 ພະຈິກ 2015  ຜ່ານ​ມາ ທີ່​ສະຖານີ​ຄ່ຽນ​ຖ່າຍ​ຂີ້ເຫຍື້ອ ບ້ານ​ນາ​ໄຫ ເມືອງ​ໄຊເຊດ​ຖາ ນະຄອນຫຼວງ​ວຽງ​ຈັນ ໄດ້​ມີ​ພິທີ​ມອບ-ຮັບ​ພາຫະນະ​ເກັບມ້ຽນ ແລະ ຂົນສົ່ງ​ຂີ້​ເຫຍື້ອ ທີ່​ສະໜອງ​ທຶນ​ໂດຍ​ລັດຖະບານ​ຢີ່​ປຸ່ນ ພາຍ​ໃຕ້​ໂຄງການ​ປັບປຸງ​ຄຸ້ມ​ຄອງຂີ້​ເຫຍື້ອ​ຢູ່​ຕົວ​ເມືອງ ທີ່​ມີ​ຄວາມຍືນ​ຍົງ​ທາງ​ດ້ານ​ສິ່ງແວດລ້ອມ ຢູ່​ນະຄອນຫຼວງ​ວຽງ​ຈັນ ຫຼວງ​ພະບາງ ແລະ ແຂວງໄຊ​ຍະ​ບູ​ລີ ໂດຍ​ຕາງໜ້າ​ມອບ​ຂອງ​ທ່ານ ຮິໂຣະ​ຢຸ​ກິ ຄິ​ຊິ​ໂນະ ເອກ​ອັກ​ຄະລາຊະ​ທູດ​ຍີ່ປຸ່ນ ປະຈຳ ​ສປປ ລາວ ແລະ ຕາງໜ້າ​ຮັບ​ຂອງ​ທ່ານ ແກ້ວ​ພິລາ​ວັນ ອາ​ໄພ​ລາດ ຮອງເຈົ້າ​ຄອງ​ນະຄອນຫຼວງ ມີ​ທ່ານນາງ ວິໄລ​ຄຳ ໂພ​ສາ​ລາດ ລັດ​ຖະມົນຕີ​ຊ່ວຍ​ວ່າການ​ກະຊວງ​ໂຍທາທິ​ການ ແລະ ຂົນສົ່ງ ພ້ອມ​ດ້ວຍພະນັກງານທີ່​ກ່ຽວຂ້ອງ ​ເຂົ້າ​ຮ່ວມເປັນ​ສັກຂີ​ພິຍານ.

ໂຄງການ​ຊ່ວຍເຫຼືອ​ລ້າ​ດັ່ງກ່າວ ​ມີ​ມູນ​ຄ່າ 1,4 ຕື້​ເຢັນ ຫຼື 13,5 ລ້ານ​ໂດ​ລາ​ສະຫະລັດ ມີຈຸດປະສົງ​ເພື່ອ​ປັບປຸງ​ສິ່ງ​ແວດລ້ອມ​ຕົວ​ເມືອງ ດ້ວຍ​ການ​ສ້າງສະຖານີ​ຄ່ຽນ​ຖ່າຍ​ຂີ້​ເຫຍື້ອ ຢູ່​ນະຄອນ​ຫຼວງ​ວຽງ​ຈັນ ເຊິ່ງ​ໄດ້​ສະໜອງ​ພາຫະນະ​ເກັບ​ມ້ຽນ​ຂີ້​ເຫຍື້ອພາຫະນະ​ອື່ນໆ ແລະ ກົນ​ຈັກ ຈຳນວນ 70 ຄັນ ພ້ອມ​ດ້ວຍ​ແຜນງານ​ເຝິກອົບຮົມ ໂຄງການ​ນີ້ ໄດ້ສະໜອງ​ໃຫ້​ແກ່ 3 ຕົວ​ເມືອງ​ຂອງໂຄງການ ແລະ ສະຖານີ​ຄ່ຽນຖ່າຍ​ຂີ້​ເຫຍື້ອ 1 ແຫ່ງ ເພື່ອ​ປັບປຸງປະ​ສິດທິ​ຜົນ​ຂອງ​ການ​ຄຸ້ມ​ຄອງ​ຂີ້ເຫຍື້ອ​ຢູ່​ນະຄອນຫຼວງ​ວຽງ​ຈັນ ປັດຈຸບັນ ​ໄດ້​ສຳເລັດ​ຂັ້ນ​ພື້ນຖານແລ້ວ ແລະ ຈະ​ໃຫ້​ສຳເລັດ​ສົມບູນ​ໃນ​ທ້າຍ​ປີ​ນີ້ ພ້ອມ​ກັນ​ນັ້ນ ໂຄງການ​ຍັງ​ຈະ​ໄດ້​ເຝິກອົບຮົມ​ໃຫ້​ແກ່​ພະນັກງານ​ດຳເນີນ​ງານ ເພື່ອມີ​ທັກ​ສະ​ໃນ​ການ​ດຳເນີນ​ງານ ບົວລະບັດ​ຮັກສາ ສະຖານີ​ຄ່ຽນຖ່າຍ​ຂີ້​ເຫຍື້ອ ເລີ່ມ​ແຕ່​ເດືອນ​ພະຈິກເປັນຕົ້ນ​ໄປ ຈົນ​ເຖິງ​ກາງເດືອນມັງກອນ 2016 ມາ​ຮອດປັດຈຸບັນ ລັດຖະບານ​ຢີ່​ປຸ່ນ​ໄດ້​ໃຫ້ການ​ຊ່ວຍເຫຼືອ​ແກ່​ລັດຖະບານ ສປປ ລາວ ທັງ​ໝົດ​ປະມານ 3,5 ຕື້​ເຢັນ ເພື່ອ​ສະໜັບສະໜູນ​ການຄຸ້ມ​ຄອງ​ຂີ້​ເຫຍື້ອ.

ທ່ານ​ເອກ​ອັກຄະລາຊະທູດຍີ່ປຸ່ນ ປະຈຳ ​ສປປ ລາວ ກ່າວວ່າ: ພາຫະນະ​ດັ່ງກ່າວ ​ຈະ​ປະກອບ​ສ່ວນ​ເຂົ້າ​ໃນ​ການ​ສ້າງ​ສະພາບ​ແວດ​ລ້ອມ​ທີ່​ສະບາຍ​ໃຈ ໃຫ້ແກ່​ການ​ສະເຫຼີມສະຫຼອງ​ວັນຊາດ ທີ 2 ທັນວາ ຄົບຮອບ 40 ປີ ແລະ ວັນ​ສະເຫຼີມສະຫຼອງ​ສາຍສຳພັນ​ທາງ​ດ້ານ​ການ​ທູດ ລະຫວ່າງ ​ສປປ ລາວ ແລະ ຍີ່ປຸ່ນ ຄົບຮອບ 60 ປີ.

ແຫ່ລງຂ່າວ

ວຈໝ