ທະນາຄານໂລກຄາດຄະເນ ປີນີ້ເສດຖະກິດລາວຈະຂະຫຍາຍຕົວ ໃນລະດັບ 6,4%!

World-Bank-Logo

ຮອງຫົວໜ້າທະນາຄານໂລກ (WB) ປະຈໍາພາກພື້ນອາຊີຕາເວັນອອກ ແລະ ປາຊີຟິກ ທ່ານ ແອັກເຊວ ແວນທອດເຊັນເບີກ ໄດ້ເປີດເຜີຍ ຜົນການຄາດຄະເນການຂະຫຍາຍຕົວທາງເສດຖະກິດຂອງພາກພື້ນຜ່ານລະບົບວີດີໂອ ຢູ່ສໍານັກງານທະນາຄານດັ່ງກ່າວທີ່ນະຄອນຫລວງວຽງຈັນ ໃນວັນທີ 5 ຕຸລານີ້ວ່າ: ການຂະຫຍາຍຕົວທາງເສດຖະກິດຂອງ ສປປ ລາວ ໃນປີນີ້ຈະຢູ່ໃນລະດັບ 6,4 % ເນື່ອງຈາກຄວາມຕ້ອງການຈາກພາຍນອກມີປະລິມານໜ້ອຍລົງ, ຂະນະທີ່ອັດຕາສ່ວນການປ່ອຍສິນເຊື່ອມີການຂະຫຍາຍຕົວຊ້າລົງເຊັ່ນດຽວກັນກັບເສດຖະກິດຂອງບັນດາປະເທດກຳລັງພັດທະ ນາໃນພາກພື້ນອາຊີຕາເວັນອອກຈະຂະຫຍາຍຕົວໃນລະດັບ 4,6% ໃນປີ2015 ກໍຄືປະເທດນຳເຂົ້າສິນຄ້າ, ໂດຍສະ ເພາະຫວຽດນາມຈະມີອັດຕາຂະຫຍາຍຕົວຢູ່ລະດັບ 6,2% ໃນປີ2015 ເພີ່ມເປັນ 6,3%  ໃນປີ 2016,ກຳປູເຈຍຂະຫຍາຍຕົວ 6,9% ໃນປີນີ້ ແລະ ມຽນມາຈະມີອັດຕາຂະຫຍາຍຕົວຊ້າລົງຈາກ 8,5% ໃນປີ 2014 ມາເປັນ 6,5% ໃນປີ2015 ເນື່ອງຈາກເກີດໄພນ້ຳຖ້ວມໃນໄລຍະຜ່ານມາ.

ທ່ານຮອງຫົວໜ້າທະນາຄານໂລກປະຈໍາພາກພື້ນອາຊີຕາເວັນອອກ ແລະ ປາຊີຟິກໃຫ້ຮູ້ວ່າ: ພາກພື້ນອາຊີຕາເວັນອອກ ແລະ ປາຊີຟີກໄດ້ກວມເອົາເກືອບສອງສ່ວນຫ້າຂອງອັດຕາການເຕີບໂຕເສດຖະກິດໂລກ, ຊຶ່ງຈະມີອັດຕາການເຕີບໂຕໃນລະດັບ 6,5% ໃນປີ 2015 ແລະ ຫລຸດລົງຈາກ 6,8% ເມື່ອທຽບໃສ່ປີຜ່ານມາ, ອັນເປັນການເຕືອນໃຫ້ບັນດານັກວາງນະໂຍບາຍໃນພາກພື້ນ ຕ້ອງສຸມໃສ່ການປະຕິຮູບທາງດ້ານໂຄງສ້າງທີ່ເປັນພື້ນຖານໃຫ້ແກ່ການເຕີບໂຕແບບຍືນຍົງ ແລະ ສົມດູນ. ສຳລັບໃນປີນີ້ເສດຖະກິດໃນປະເທດຈີນຄາດວ່າຈະຂະຫຍາຍຕົວ 7% ແລະ ຈະຄ່ອຍໆຫລຸດລົງເລັກໜ້ອຍ, ເນື່ອງຈາກເສດຖະກິດສືບຕໍ່ຫັນເປັນຮູບແບບທີ່ມີການຊົມໃຊ້ ແລະ ການບໍລິການພາຍໃນກວມອັດຕາສ່ວນສູງ.

 

ແຫລ່ງຂ່າວ:

ລພນ