ຕົວແທນຊາຍງາມລາວ ບໍ່ສາມາດເຂົ້າຮ່ວມປະກວດໃນເວທີ Mister Model international Pageant 2021

0
1044

ທ້າວ ວຽງຄຳ ຈັນທະວົງສາ ຕົວແທນຊາຍງາມລາວ (Mister Model Laos 2021) ບໍ່ສາມາດເດີນທາງໄປເຖິງຈຸດໝາຍໃນເວທີ Mister Model international Pageant 2021 ທີ່ປະເທດ ສາທາລະນະລັດ ໂດມິນິກັນ, ເນື່ອງຈາກຂໍ້ຈຳກັດທາງການບິນໃນຊ່ວງການລະບາດຂອງພະຍາດໂຄວິດ-19 ຕາມອົງການອານາໄມໂລກໄດ້ກຳນົດໄວ້.

ອີງຕາມການລາຍງານຂອງ ວິສາຫະກິດສ່ວນບຸກຄົນ ສີລະປິນ ສີສານ, ຜູ້ຈັດງານປະກວດຊາຍງາມລາວຮູ້ວ່າ: ປັດຈຸບັນ ທ້າວ ວຽງຄຳ ຈັນທະວົງສາ ບໍ່ສາມາດໄປຮ່ວມງານປະກວດລະດັບສາກົນທີ່ປະເທດສາທາລະນະລັດ ໂດມິນິກັນ ເນື່ອງຈາກຂໍ້ຈຳກັດໃນການເດີນທາງຊ່ວງການລະບາດຂອງພະຍາດໂຄວິດ ຂະນະທີ່ ທາງກອງປະກວດຫຼັກທີ່ ສາທາລະນະລັດ ໂດມິນິກັນ ກໍໄດ້ແຈ້ງມາວ່າ ທຸກປະເທດສາມາດເດີນທາງເຂົ້າໂດມິນິກັນໄດ້ໂດຍຮັບ Arrival VISA ທີ່ໜ້າ ຕມ ແຕ່ການເດີນທາງຕົວຈິງຕ້ອງມີ VISA ຈິ່ງສາມາດເດີນທາງໄດ້ ແຕ່ຍ້ອນກອງປະກວດມີເວລາສັ້ນ ໃນການກະກຽມເອກະສານເດີນທາງດັ່ງກ່າວ ແຕ່ວັນເວລາການແຂ່ງຂັນກໍຫຍັບໃກ້ເຂົ້າມາ ຈິ່ງຈຳເປັນຕ້ອງຍົກເລີກການເດີນທາງໄປປະກວດຄັ້ງນີ້.

ຕໍ່ກັບເຫດການດັ່ງກ່າວ, ທາງປະທານໃຫຍ່ຂອງກອງປະກວດເວທີ Mister Model international Pageant ກໍໄດ້ເຫັນຄວາມຕັ້ງໃຈຂອງຝ່າຍລາວ ຈິ່ງໄດ້ສະເໜີໃຫ້ທາງປະເທດລາວເປັນເຈົ້າພາບໃນການຈັດປະກວດເວທີດັ່ງກ່າວໃນປີ 2022 ພ້ອມລໍຖ້າຄຳຕອບທີ່ຢືນຢັນຈາກຝ່າຍລາວອີກຄັ້ງ. ປັດຈຸບັນ ວຽງຄຳ ຈັນທະວົງສາ ໄດ້ເຂົ້າພັກທີ່ໂຮງແຮມປະຈຳສະໜາມບິນອິນຊອນ ໂດຍລໍຖ້າຖ້ຽວບິນທີ່ຈະກັບມາລາວໃນວັນທີ 9 ຕຸລານີ້.