ຕຳນານ 20 ຂໍ້ຫ້າມຂອງຄົນບູຮານລາວ

0
3590

ບັນທຶກເລື່ອງເລົ່າ ມື້ນີ້ເຮົາຈະມາຮູ້ຈັກກັບ ເລື່ອງທີ່ຄົນບູຮານ ມັກຫ້າມ! ຕອນຍັງນ້ອຍເຮົາອາດຈະເຄີຍໄດ້ຍິນເລື່ອງເລົ່າຂອງພໍ່ຕູ້ແມ່ຕູ້ ຫຼື ຜູ້ໃຫຍ່ກວ່າເຮົາທີ່ຫ້າມນັ້ນຫ້າມນີ້ ແຕ່ລະເລື່ອງທີ່ຍົກມາຫ້າມນັ້ນກໍ່ມີເຫດຜົນອະທິບາຍໄປຕ່າງໆນານາ ແລ້ວແຕ່ຄວາມເຊື່ອ! ເຊິ່ງມື້ນີ້ ແອັດມິນ ກໍ່ເລີຍມີບາງຂໍ້ຫ້າມ ທີ່ຜູ້ເຖົ້າຜູ້ແກ່ຄົນບູຮານໄດ້ກ່າວໄວ້ມາເລົາສູ່ຟັງ (ແຕ່ຕ້ອງບອກວ່າເລື່ອງນີ້ເປັນຄວາມເຊື່ອສ່ວນບຸກຄົນ) ເຮົາມາອ່ານ ແລະ ຄິດໄປພ້ອມກັນວ່າ ເລື່ອງເລົ່າຂອງຄົນບູຮານນີ້ເປັນເລື່ອງຈິງ ແລະ ເປັນພຽງເລື່ອກຫຼອກໆເທົ່ານັ້ນ.
1. ຫ້າມນອນຫັນຫົວໄປທາງທິດຕະເວັນຕົກ ເພາະຈະເຮັດໃຫ້ອາຍຸສັ້ນ
2. ຫ້າມແມວດຳໂດດຂ້າມສົບຄົນຄົນຕາຍ ເພາະຈະເຮັດໃຫ້ວິນຍານຄົນຕາຍກາຍເປັນວິນຍານຜີຮ້າຍ ແລະ ບໍ່ໄດ້ໄປເກີດ
3. ຕອນກາງເດິກຫາກໄດ້ຍິນສຽງເອີ້ນ ຫຼື ໄດ້ຍິນສຽງດັງ ຫ້າມສົ່ງສຽງຕອບຮັບ ຫຼື ທັກທ້ວງເດັດຂາດ ທ່ານຕ້ອງມິດແລ້ວຟັງໃຫ້ແນ່ໃຈກ່ອນ ເພາະບໍ່ແນ່ວ່າ ອາດຈະມີຜູ້ບໍ່ຫວັງດີປ່ອຍຄຸນໃສມາໃສ່ທ່ານ ຫຼື ມີພວກຜີຮ້າຍຫວັງມາທຳລາຍທ່ານ.
4. ຫ້າມປັດກວາດເຮືອນຕອນກາງຄືນ ມັນເພາະເປັນການຂັບໄລ່ເທວະດາ, ສິ່ງສັກສິດທີ່ມາປົກປັກຮັກສາທ່ານ ຈາກພວກຜີ ຫຼື ສິ່ງຊົ່ວຮ້າຍທີ່ຈະມາທຳຮ້າຍທ່ານໃນຕອນກາງຄືນ.
5. ຢ່າປູກກົກໄມ້ໃຫຍ່ໄວ້ໃກ້ເຮືອນ ຫຼື ບໍລິເວນດິນເຮືອນ ເພາະຕົ້ນໄມ້ໃຫຍ່ ມັກເປັນແລ່ງສິງສະທິດຂອງພວກຜີເລລ້ອນ ຫາກຜີພວກນີ້ໄດ້ສິງຢູ່ຕົ້ນໄມ້ຂອງເຮືອນໃດກໍ່ຈະນຳແຕ່ສິ່ງອັບປະມົງຄຸນມາໃຫ້
6. ຫ້າມນອນຕອນຫົວຄຳ່ເພາະອາດຖືກຜີອຳ ຫຼື ບໍ່ດັ່ງນັ້ນຜີກໍ່ຈະມາລັກເອົາວິນຍານເຮົາໄປຢູ່ນຳ
7. ຫ້າມໃຊ້ເສົາຕົກນຳ້ມັນປຸກເຮືອນ ເພາະເສົາຕົກນຳ້ມັນນັ້ນຈະມີວິນຍານຜີສິງຢູ່ ຫາກນຳມາປູກເຮືອນກໍ່ຈະເຮັດໃຫ້ເກີດເຫດຮ້າຍຂຶ້ນ
8. ຫ້າມໃຊ້ພ້າ, ມີດ ຟັນຂັນໄດ ເພາະຂັນໃດຈະມີຜີບ້ານຜີເຮືອນຄອຍຫັກສາຢູ່ ຖ້າຫາກໃຜນຳຜ້າ ຫຼື ມີດ ໄປຟັນຂັນໄດກໍ່ຈະຖືກຢູ່ຕົກຂັນໄດໄດ້
9. ຫ້າມກົ້ມເບິ່ງລອດວ່າງຕົນເອງເມື່ອເວລາໄປງານສົບ ເພາະທ່ານອາດຈະເຫັນຜີໄດ້
10. ຢ່າດ່າຟ້າແດດລົມຝົນ ເພາະຈະເຮັດໃຫ້ຊີວິດບໍ່ຈະເລີນກ້າວໜ້າ ຫາກິນຍາກ
11. ຫ້າມເຄາະໝໍ້ເຂົ້າ, ເຄາະຖ້ວຍ, ບ່ວງ ໃນເວລາກິນເຂົ້າ ເພາະພຣະແມ່ໂພສົດຈະເສຍໃຈ ຈະບໍ່ພໍໃຈ ເຮັດນາຄັ້ງຕໍ່ໄປຈະບໍ່ເກີດໝາກອອກຜົນ ການທຳມາຫາກິນກໍ່ຍາກລຳບາກ.
12. ຢ່າຫຼິ້ນຢຽບເງົາຕົວເອງຕອນກາງຄືນ ເພາະຈະເຮັດໃຫ້ເກີດລາງຮ້າຍ
13. ຫ້າມຍ່າງແຮງເພາະຈະເຮັດໃຫ້ຜີບ້ານຜີເຮືອນຕື່ນຕົກໃຈ ຢູ່ບໍ່ມີຄວາມສຸກແລ້ວຈະໜີໄປຢູ່ບ່ອນອື່ນ ບໍ່ຢູ່ຄຸ້ມຄອງເຈົ້າຂອງເຮືອນ.
14. ຫ້າມລ້ຽງແມວຈຳນວນ 5 ຕົວ ຫຼື ລ້ຽງໝາຈຳນວນ 6 ຕົວ ເພາະຈະເຮັດໃຫ້ຄົນໃນເຮືອນທຸກຈົນ ຫາກິນຍາກລຳບາກ.
15. ຫ້າມເຜົາຜີຕາຍວັນສຸກ ເພາະຈະເຮັດໃຫ້ຄົນທີ່ຢູ່ບໍ່ມີຄວາມສຸກ ມີແຕ່ຄວາມທຸກຫມົ່ນຫມອງ
16. ຫ້າມຕັດຜົມວັນພຸດ ຫ້າມສະຜົມວັນພະຫັດ
17. ຫ້າມຕັດເລັບຕີນເລັບມືຕອນຄຳ່ໃນເຮືອນ ເພາະຈະເຮັດໃຫ້ເຮືອນມີຄວາມເດືອດຮ້ອນ
18. ຫ້າມນຸ່ງຊຸດດຳໄປຢ້ຽມຢາມຄົນປ່ວຍເພາະມັນສະແດງເຖີງຄວາມທຸກໂສກເສົ້າ
19. ໃນເຮືອນບໍ່ຄວນມີຮູບປັ້ນຍັກຫລືຮູບຍັກເພາະຈະເຮັດໃຫ້ຄົນໃນເຮືອນຜິດຖຽງກັນ
20. ຫ້າມສາວໂສດຮ້ອງເພງໃນຄົວ ເພາະເຊື່ອວ່າຈະໄດ້ຜົວເຖົ້າ ຫລື ຫາຜົວບໍ່ໄດ້.

 

ແຫລ່ງຂໍ້ມູນ: ບູຮານຄະດີແລະປະຫວັດສາດລາວ History Laos

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.