ຈີນປະເຊີນອາກາດໜາວ ຮົງກົງອຸນຫະພູມຫລຸດຕ່ຳ ໃນຮອບ 60 ປີ!

ຂ່າວ: REUTERS/StringerATT

ສຳນັກຂ່າວຕ່າງປະເທ່ດ ລາຍງານໃນວັນທີ 25 ມັງກອນນີ້ວ່າ ສະພາບອາກາດທີ່ປະເທດຈີນ ໃນປັດຈຸບັນນີ້ ອຸນຫະພູມຫລຸດລົງ ຕ່ຳສຸດເປັນປະຫວັດການ ແຕ່ 6 ເຖິງ – 10 ອົງສາ ເຮັດໃຫ້ທາງການຈີນ ຕ້ອງປະກາດເຕືອນໄພອາກາດໜາວ ໂດຍຢູ່ແຂວງຟູຈ້ຽນ ໄດ້ເກີດນ້ຳກ້ອນໜາຫຸ້ມຕົ້ນໄຜ່ ແລ້ວລົ້ມລົງມາທັບສາຍໄຟຂາດ ຫລາຍກ່ວາ 50 ສາຍ ສົ່ງຜົນເຮັດໃຫ້ໄຟຟ້າດັບ ແລະ ປະຊາຊົນຂາດໄຟຟ້າໃຊ້, ສ່ວນເຂດນະຄອນສົງຊິ່ງ ໄດ້ມີຫິມະຕົກລົງໜັກທີ່ສຸດໃນຮອບ 20 ປີ ເຮັດໃຫ້ຈຳເປັນຕ້ອງປິດສະໜາມບິນ ຊຶ່ງມີຜູ້ໂດຍສານຕົກຄ້າງຫລາຍກ່ວາ 4,000 ຄົນ.

ສ່ວນເຂດບໍລິຫານພິເສດຮົງກົ່ງຂອງຈີນ ກໍປະເຊີນກັບສະພາບອາກາດໜາວຈັດ ອຸນຫະພູມຫລຸດລົງຕ່ຳສຸດ ໃນຮອບເກືອບ 60 ປີ ໂດຍຕອນເຊົ້າຂອງວັນທີ 24 ມັງກອນຜ່ານມານີ້ ອຸນຫະພູມທີ່ເຂດຕົວເມືອງຂອງຮົ່ງກົ່ງ ຫລຸດລົງຢູ່ລະດັບ 3.3 ອົງສາ ເຮັດໃຫ້ທາງການອອກຄຳເຕືອນ ໃຫ້ປະຊາຊົນນຸ່ງຫົ່ມເຄື່ອງກັນໜາວ ເພື່ອຮັກສາອຸນຫະພູມຂອງຮ່າງກາຍ ແລະ ຫລີກລ່ຽງການປະທະກັບລົມໜາວ ເປັນເວລາດົນນານ.