ຈະລາຈອນ ກຳນົດ ເສັ້ນທາງຫລັກ ແລະ ຮອງ ກຽມກອງປະຊຸມສຸດຍອດອາຊຽນ

ກົມຕຳຫຼວດຈະລາຈອນ ກຳນົດ 115 ຈຸດປະຈຳການຢູ່ຕາມເສັ້ນທາງສາຍຫຼັກ ແລະ ສາຍສຳຮອງ ລວມທັງຈຸດປ້ອງກັນຕ່າງໆ ຮອງຮັບກອງປະຊຸມສຸດຍອດອາຊຽນ ພ້ອມກຳນົດ ເສັ້ນທາງແຕ່ຫໍຄຳ-ຖະໜົນສຸພານະວົງ, ຫໍຄຳ-ດົງໂດກ ເປັນເສັ້ນທາງຫຼັກໃນມື້ຈັດກອງປະຊຸມ.

ຕອນເຊົ້າ ວານນີ້; ພະແນກຕຳຫຼວດ ຈະລາຈອນ ນະຄອນຫຼວງວຽງຈັນ ໄດ້ຈັດກອງປະຊຸມສຳມະນາ ໃຫ້ບັນດາພະນັກງານຕຳຫຼວດຈາລະຈອນ ຈຳນວນ 350 ຄົນ ເພື່ອກຽມຄວາມພ້ອມຮັບໃຊ້ໄລຍະເປີດກອງປະຊຸມສຸດຍອດອາຊຽນ ທີ່ລາວເຮົາຈະເປັນເຈົ້າພາບໃນຕົ້ນເດືອນກັນຍານີ້, ໂດຍການປະທານຂອງທ່ານ ພັອ. ຄຳຖະຫວາຍ ເພັດອຸໄທ ຫົວໜ້າກົມຕຳຫຼວດຈະລາຈອນ ກະຊວງປ້ອງກັນຄວາມສະຫງົບ ໃນການຈັດສັນຄວາມເປັນລະບຽບຮຽບຮ້ອຍ, ການຈອດລົດຢູ່ຕາມເສັ້ນທາງທີ່ເປັນສາຍຫຼັກ ແລະ ສາຍສຳຮອງ ທີ່ຈະມີການນຳໃຊ້ໃນໄລຍະເປີດກອງປະຊຸມດັ່ງກ່າວ.

ທ່ານ ພັທ. ຢຸດຕະພົງ ສຸວັນນະສິງ ກ່າວວ່າ: ເພື່ອຮັບປະກັນໃຫ້ແກ່ການກະກຽມ ແລະ ປ້ອງກັນກອງປະຊຸມສຸດຍອດອາຊຽນໃນຄັ້ງນີ້ໃຫ້ມີຄວາມສະຫງົບ, ປອດໄພສູງ ແລະ ມີຄວາມເປັນລະບຽບຮຽບຮ້ອຍໃນທຸກດ້ານ, ຮັບປະກັນຈຸດປະສົງລະດັບຄາດໝາຍ ແລະ ຄວາມໝາຍຄວາມສຳຄັນຂອງກອງປະຊຸມໃນຄັ້ງນີ້ຄະນະພັກຄະນະບັນຊາ ພະແນກຕຳຫຼວດຈະລາຈອນ ຈຶ່ງໄດ້ສ້າງແຜນຈັດວາງກຳລັງປ້ອງກັນ ແລະ ກຳນົດເສັ້ນຫຼັກ ແລະ ເສັ້ນທາງສຳຮອງ ເພື່ອອຳນວຍຄວາມສະດວກໃຫ້ບັນດາຜູ້ແທນ ແລະ ປະມຸກລັດ ທີ່ຈະເຂົ້າຮ່ວມກັນປະຊຸມໃຫ້ທັນກັບສະພາບການ.

ບັນດາເສັ້ນທາງສາຍສຳຄັນທີ່ຈະຖືກນຳໃຊ້ປະກອບດ້ວຍ ເສັ້ນທາງແຕ່ສະໜາມບິນ ຫາ ໂຮງແຮມແລນມາກ ແມ່ນເປັນສາຍຫຼັກທີ່ຈະຮັບແຂກເຂົ້າມາ, ຖະໜົນສາມແສນໄທ ຫາ ຖະໜົນເສດຖະທິລາດ ແມ່ນເປັນເສັ້ນທາງແຂກໄປ-ກັບ, ແຕ່ຫໍຄຳ-ຖະໜົນສຸພານະວົງ-ດົງໂດກ ເປັນເສັ້ນທາງຫຼັກໃນມື້ຈັດກອງປະຊຸມ.

ນອກນັ້ນກຳນົດເສັ້ນທາງສຳຮອງອີກ 4 ເສັ້ນຄື: 1. ຖະໜົນອາຊຽນ (T2) ແຕ່ໄຟແດງບ້ານອາກາດ ຫາ ໄຟແດງໂພນສະອາດ; 2. ແຕ່ 4 ແຍກປາກປາສັກ ຫາ ໂຮງແຮມແລນມາກ; 3. ຖະໜົນມິດຕະພາບລາວ-ໄທ ແຕ່ໄຟແດງໂພນປ່າເປົ້າ (T4) ຫາ ຂົວຮ່ອງແຊງ; 4.ຖະໜົນໜອງບອງ ແຕ່ໜອງບອນ ຫາ ວົງວຽນ 450 ປີ.

ທ່ານ ພັທ. ຢຸດຕະພົງ ສຸວັນນະສິງ ໄດ້ຮຽກຮ້ອງມາຍັງພໍ່ແມ່ປະຊາຊົນຜູ້ໃຊ້ລົດໃຊ້ຖະໜົນໃນຂອບເຂດນະຄອນວຽງຈັນໃຫ້ມີສະຕິ ແລະ ເປັນເຈົ້າການບໍ່ໃຫ້ມີລົດຈອດຕາມແຄມທາງ ຫຼື ຟຸດບາດ ຕາມເສັ້ນທາງທີ່ພວກເຮົາກຳນົດໄວ້ ຖ້າຫາກຍັງມີການຝ່າຝືນພວກເຮົາມີໜ່ວຍເລາະກວດເບິ່ງຖ້າເຫັນຈະໄດ້ມີການລັອກລໍ້ ແລະ ນຳເອົາລົດລາກມາແກ່ອອກ ແລະ ຈະຖືກຕັກເຕືອນຈົນເຖິງຂັ້ນປັບໄໝ .ພ້ອມນີ້ກໍ່ຢາກໃຫ້ຜູ້ໃຊ້ລົດໃຊ້ຖະໜົນຖ້າຫຼີກລ້ຽງໄດ້ກໍຢາກໃຫ້ຫຼີກລ້ຽງເສັ້ນທາງ ທີ່ໄດ້ກຳນົດ.

ສຳລັບລົດບັນທຸກໜັກ, ລົດພວງ, ລົດລາກ ທີ່ມາແຕ່ຂົວມິດຕະພາບຈະໄປພາກເໜືອ ຫຼື ພາກໃຕ້ ແມ່ນໃຫ້ແລ່ນຕາມເສັ້ນທາງ 450 ປີ, ລົດບັນທຸກທີ່ມາຈາກພາກເໜືອ ທີ່ຈະໄປຂົວມິດຕະພາບແມ່ນໃຫ້ແລ່ນເຂົ້າທາງໜອງບຶກ-ດົງໂດກ ອອກສູ່ 450 ປີ (ຫ້າມແລ່ນຜ່ານຕົວເມືອງ).

ຂ່າວຈາກ: ໜັງສືພິມເສດຖະກິດ-ການຄ້າ

 

ຕິດຕາມເຮາທາງFacebook ກົດຖືກໃຈເລີຍ!

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.