ຈອດລົດບ່ອນຫ້າມຈອດ ປັບໃໝແທ້ 10 ເທົ່າ

ນັກຂ່າວລາວໂພສຕ໌ ລາຍງານວ່າ ການຈອດລົດໃນບ່ອນຫ້າມຈອດນັ້ນ ແມ່ນຈະຖືກປັບໃໝ 10 ເທົ່າ ແທ້ໆ ໂດຍບໍ່ມີການອ່ອນຂໍ້ແຕ່ປະການໃດ.
ນັກຂ່າວພວກເຮົາມີໂອກາດໄດ້ສອບຖາມ ປະຊາຊົນຜູ້ໜຶ່ງທີ່ບໍ່ປະສົງອອກນາມ ພາຍຫຼັງທີ່ເດິນທາງອອກຈາກພະແນກຕຳຫຼວດຕຳຫຼວດຈະລາຈອນ ນະຄອນຫຼວງວຽງຈັນ ພາຍຫຼັງຈ່າຍຄ່າປັບໃໝ ຍ້ອນການຈອດລົດເທິງທາງຄົນຍ່າງ.

ປະຊາຊົນຄົນດັ່ງກ່າວວ່າ: ເຖິງແມ່ນວ່າຂ້ອຍຈະເສຍໃຈທີ່ຖືກປັບໃໝເຖິງ 730,000 ກີບ (ປົກກະຕິຈອດລົດໃນບ່ອນຫ້າມຈອດຈະຖືກປັບໃໝ 70,000 ກີບ) ຍ້ອນຈອດລົດໃນບ່ອນຫ້າມຈອດ ແຕ່ອີກດ້ານໜຶ່ງຂ້ອຍພັດຮູ້ສຶກດີໃຈ ທີ່ເຈົ້າໜ້າທີ່ເພິ່ນໄດ້ປະຕິບັດຕາມລະບຽບຢ່າງເຄັ່ງຄັດ ໂດຍບໍ່ມີຂໍ້ຍົກເວັ້ນໃດໆ, ໃນມື້ນີ້ຂ້ອຍມີໂອກາດໄດ້ເຂົ້າໄປພົບ ທ່ານ ພັນໂທ ຢຸດຕະພົງ ສຸວັນນະສິງ ຫົວໜ້າພະແນກຕະລາຈອນ ນະຄອນຫຼວງວຽງຈັນ ເຊິ່ງເພິ່ນກໍໄດ້ໃຫ້ຄຳແນະນຳສັ່ງສອນຕໍ່ຂ້ອຍ ແລະຢືນຢັນວ່າ ຕຳຫຼວດຈະລາຈອນຈະປະຕິບັດຕາມການແຈ້ງການ ກໍຄືມະຕິ 3 ຂອງ ອົງການປົກຄອງນະຄອນຫຼວງວຽງຈັນ ຢ່າງເຂັ້ມງວດ ເພື່ອເຮັດແນວໃດໃຫ້ນັກຂັບຂີ່ມີສະຕິສູງຕໍ່ລະບຽບກົດໝາຍ ໂດຍສະເພາະແມ່ນຂໍ້ຫ້າມຕ່າງໆ ໃນການແລ່ນລົດແລະຈອດລົດໃນສະຖານທີ່ຕ່າງໆ.

ການຈອດ​ລົດ​ແບບ​ຊະຊາຍ ເຊັ່ນ: ການຈອດເສັ້ນມ້າລາຍ, ຈອດເສັ້ນທາງຂອບຂາວແດງ, ຈອດເທິງທາງຄົນຍ່າງ, ຈອດບ່າທາງ ຫລື ຈອດບ່ອນທີ່ເກະກະ ການສັນຈອນ ​ແລະ ບໍ່ມີຄວາມສະດວກ​ ໃນ​ການໄປມາ, ທັງເປັນການສ້າງ ຄວາມບໍ່ເປັນ ລະບຽບຮຽບຮ້ອຍ ແກ່ສັງຄົມ ​​ແມ່ນເປັນການລະເມີດ ຕາມດຳລັດເລກທີ 188/ນຍ, ທັງ​ແຕະຕ້ອງ ເຖິງລະບຽບ ຫລື ມະຕິ 03 ຂອງ ອົງການປົກຄອງ ນະຄອນ​ຫລວງວຽງຈັນ ໃນ​ກໍລະນີ້ ເຈົ້າໜ້າທີ່ມີ​ຄວາມ​ຈຳ​ເປັນຕ້ອງໄດ້ ດຳ​ເນີນ​ການປັບໃໝ ຄູນ 10 ​ເທົ່າ.

ສ່ວນລົດບັນທຸກແກ່ເຄື່ອງ ເຮັດໃຫ້ທາງເປື້ອນເປິ ຫລື ວ່າເຂົ້າມາໃນຕົວເມືອງ ໂດຍບໍ່ໄດ້ຮັບ ອະນຸຍາດ ກີດຂວາງການສັນຈອນ ແມ່ນຕຳຫລວດ​ ຍັງສືບຕໍ່ປະຕິບັດ ຢ່າງຕັ້ງໜ້າ ຕາມມະຕິ 188 ແຕ່ຄູນ 10 ເທົ່າຕາມມະຕິ 03 ໂດຍສະເພາະ ແມ່ນນະໂຍບາຍ ສ ສະອາດ ຮອດ​ປີ 2020. ທັງນີ້ເພື່ອເຮັດໃຫ້ ການສັນຈອນໄປມາ ຕາມເສັ້ນທາງຕ່າງໆ ​ໂດຍສະເພາະແມ່ນເສັ້ນທາງຢູ່ 4 ຕົວເມືອງ ໃຫ້ມີຄວາມຄ່ອງຕົວ ໄລຍະເວລາໂມງ ເຂົ້າການ-ເລີກການ ແລະ ຫລີກລ່ຽງ ຈາກບັນຫາການເກີດ ອຸປະຕິເຫດ.