ຄົນຂັບລົດໂດຍສານແຄ້ນໃຈໃຫ້ລັດຖະບານຂັບລົດລົງອ່າງເກັບນໍ້າ ຜູ້ໂດຍສານເສຍຊີວິດ 21 ຄົນ

ສຳນັກຂ່າວ ເຊົາໄຊນາມໍນິງໂພສ ລາຍງານເມື່ອວັນທີ 12 ກໍລະກົດວ່າ ຕຳຫຼວດຈີນເປີດເຜີຍຄວາມຄືບໜ້າການສືບສວນເຫດລົດໂດຍສານຕົກລົງໃນອ່າງເກັບນໍ້າຂອງເມືອງ ອັນຊຸນ ມົນທົນກຸ້ຍໂຈ ເມື່ອອາທິດທີ່ຜ່ານມາ ຈົນເປັນເຫດເຮັດໃຫ້ມີຜູ້ເສຍຊີວິດ 21 ຄົນ ໂດຍລະບຸວ່າ ເຫດການດັ່ງກ່າວນີ້ເກີດຂຶ້ນຈາກຄວາມຈົງໃຈຂອງຄົນຂັບລົດ ເພື່ອແກ້ແຄ້ນສັງຄົມ ຫຼັງຈາກທີ່ລັດຖະບານໄດ້ທຳລາຍເຮືອນຫຼັງເກົ່າຂອງເຂົາ.

ຕາມການເປີດເຜີຍຂໍ້ມູນຂອງເຈົ້າໜ້າທີຕຳຫຼວດຮັກສາຄວາມປອດໄພສາທາລະນະເມືອງອັນຊຸນ ໃຫ້ຮູ້ວ່າ ຄົນຂັບລົດໂດຍສານໄວອາຍຸ 52 ປີ ແຊ່ ຈາງ ເດີນທາງໄປທີ່ບ້ານຫຼັງເກົ່າຂອງເຂົາໃນຊ່ວງຕອນເຊົ້າວັນທີ 7 ກໍລະກົດ ໂດຍເຂົາຖືຄອງກຳມະສິດເຮືອນຫຼັງນັ້ນ ແຕ່ຖືກທາງການທ້ອງຖິ່ນທຸບເຮືອນຂອງລາວຕາມແຜນພັດທະນາເມືອງ. ດັ່ງນັ້ນ, ທ້າວ ຈາງ ຈຶ່ງໂທລະສັບສາຍດ່ວນໄປເຖິງລັດຖະບານເພື່ອຮຽກຮອງວ່າ ເຮືອນຂອງເຂົາບໍ່ຄວນຖືກທຳລາຍກ່ອນທີ່ເຂົາຈະຫາເຮືອນຫຼັງໃໝ່ໄດ້.

ເຫດການດັ່ງກ່າວເຮັດໃຫ້ມີຜູ້ເສຍຊີວິດ 21 ຄົນ ລວມເຖິງທ້າວ ຈາງຄົນຂັບລົດກໍ່ເສຍຊີວິດຄາທີ ແລະ ມີຜູ້ບາດເຈັບອີກ 15 ຄົນ ໂດຍໃນກຸ່ມຜູ້ໂດຍສານມີນັກຮຽນຢ່າງໜ້ອຍ 12 ຄົນ ທີ່ຫາກໍ່ສອບເສັງແລ້ວໃນຊ່ວງເຊົ້າ ໂດຍ 5 ຄົນໃນຈຳນວນນີ້ເສຍຊີວິດ.

 

ຮຽບຮຽງຂ່າວ: ພຸດສະດີ