ການມອບ-ຮັບ ວັກຊີນຈາກ ສປປ ຈີນ ທີ່ສະໜາມບິນສາກົນວັດໄຕ

0
170

ວັກຊີນຊ່ວຍເຫຼືອຮອບໃໝ່ ຈຳນວນ 1,000,000 ໂດສ ຈາກລັດຖະບານ ສປ ຈີນ ມອບໃຫ້ແກ່ລັດຖະບານ ແລະ ປະຊາຊົນລາວ ຮອດໄປສະໜາມບິນສາກົນວັດໄຕ, ນະຄອນຫຼວງວຽງຈັນ ໃນຕອນບ່າຍຂອງວັນທີ 13 ຕຸລາ 2021 ແລະ ໄດ້ມີການຈັດພິທີມອບ-ຮັບ ຢ່າງເປັນທາງການ ຕ່າງໜ້າລັດຖະບານ ສປ ຈີນ ມອບໂດຍ ທ່ານ ຈ່ຽງ ຈ້າຍຕົ່ງ ເອກອັກຄະລັດຖະທູດຈີນ ປະຈໍາ ສປປ ລາວ ແລະ ຕ່າງໜ້າລັດຖະບານລາວ ຮັບໂດຍ ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ພ້ອມດ້ວຍການນຳທັງສອງຝ່າຍລາວ-ຈີນ ເຂົ້າຮ່ວມເປັນສັກຂີພິຍານ.

ໃນໂອກາດດັ່ງກ່າວ, ທ່ານ ກິແກ້ວ ໄຂຄຳພິທູນ ກ່າວວ່າ: ພັກ, ລັດ ແລະ ປະຊາຊົນລາວມີຄວາມພາກພູມໃຈຢ່າງຍິ່ງທີ່ໄດ້ຮັບຢາວັກຊິນປ້ອງກັນພະຍາດໂຄວິດ-19 ເພີ່ມຕື່ມ ຈໍານວນ 1 ລ້ານໂດສ ພ້ອມດ້ວຍເຂັມສັກຢາ ຈາກລັດຖະບານ ແຫ່ງ ສປ ຈີນ ມອບໃຫ້ແກ່ ສປປ ລາວ ເພື່ອໃຊ້ເຂົ້າໃນການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ. ໃນນາມລັດຖະບານ ຂໍສະແດງຄວາມຂອບໃຈຢ່າງຈິງໃຈ, ຮູ້ບຸນຄຸນຢ່າງລົ້ນເຫຼືອຕໍ່ການຊ່ວຍເຫຼືອອັນບໍລິສຸດ, ຈິງໃຈ, ລໍ້າຄ່າ, ທັນເວລາ ແລະ ສະເໝີຕົ້ນສະເໝີປາຍ ຂອງພັກ, ລັດ ແລະ ປະຊາຊົນຈີນ ເທື່ອນີ້; ວັກຊິນ 1 ລ້ານໂດສ ເທື່ອນີ້ ຈະສົມທົບກັບວັກຊິນ ສປ ຈີນ ຊ່ວຍເຫຼືອຜ່ານມາ ຈໍານວນ 3.300.000 ໂດສ (ບໍ່ລວມທີ່ກະຊວງປ້ອງກັນປະເທດຮັບ ຈຳນວນ 400.000 ໂດສ) ແລະ ຮ່ວມກັບການຊ່ວຍເຫຼືອຂອງປະເທດຕ່າງໆ, ອົງການສາກົນອື່ນໆ ຈະຊ່ວຍໃຫ້ ສປປ ລາວ ສາມາດບັນລຸຄາດໝາຍສັກວັກຊິນໃຫ້ປະຊາກອນທົ່ວປະເທດໄດ້ 50% ຂຶ້ນໄປ ໃນປີ 2021 ເພື່ອຕ້ານ ແລະ ສະກັດກັ້ນໂຄວິດ-19.

ທ່ານ ຈ່ຽງ ຈ້າຍຕົ່ງ ໄດ້ກ່າວສະແດງຄວາມເປັນຫ່ວງເປັນໃຍໃນສະພາບທີ່ ສປປ ລາວ ໄດ້ພົບກັບວິກິດຄວາມຫຍຸ້ງຍາກ ແລະ ການລະບາດຂອງໂຄວິດ-19 ເຮັດໃຫ້ມີຜູ້ຕິດເຊື້ອ ແລະ ມີຜູ້ເສຍຊີວິດເພີ່ມຂຶ້ນ, ຕໍ່ໜ້າສະພາບການດັ່ງກ່າວ, ທ່ານເອອັກຄະລັດຖະທູດຢືນຢັນວ່າ ສປ ຈີນ ຈະສືບຕໍ່ຍຶດໝັ້ນຊ່ວຍເຫຼືອ ສປປ ລາວ ໃນການແກ້ໄຂການລະບາດພະຍາດໂຄວິດ-19 ແລະ ຈະສະໜອງວັກຊິນໃຫ້ປະເທດລາວໃຫ້ໄດ້ 6.800.000 ໂດສ ພາຍໃນປີ 2021 ນີ້ ເພື່ອປະກອບສ່ວນເຂົ້າໃນເປົ້າໝາຍຂອງລັດຖະບານລາວ ທີ່ຈະສັກວັກຊິນປ້ອງກັນໂຄວິດ-19 ໃຫ້ກັບປະຊາກອນໃຫ້ໄດ້ 50% ໃນປີ 2021

ແຫຼ່ງຂ່າວ: ປະເທດລາວ Pathedlao