ກະຊວງສາທາລະນະສຸກເຜີຍ ທົ່ວປະເທດມີຜູ້ຕິດເຊື້ອໄຂ້ຍຸງລາຍ 1 ພັນກວ່າຄົນແລ້ວ!

20140613111746
(ພາບປະກອບ)

ຂປລ. ປັດຈຸບັນ ສປປ ລາວ ມີຜູ້ຕິດເຊື້ອໄຂ້ຍຸງລາຍ 1.775 ກວ່າຄົນ ໃນຂອບເຂດທົ່ວປະເທດ ແຕ່ບໍ່ມີຜູ້ເສຍຊີວິດຂະນະ​ທີ່​ ກະຊວງ​ສາ​ທາ​ລະນະ​ສຸກ​ ​ເລັ່ງປະສານ​ງານ​ກັບ​ໜ່ວຍ​ງານ​ວິຊາ​ສະ​ເພາະ​​ໃນ​ທົ່ວ​ປະ​ເທດ​ ຢ່າງ​ໃກ້ຊິດ ​ເພື່ອ​ແກໄຂ​ບັນ​ຫາ​ດັ່ງກ່າວ ໃຫ້ຫລຸດລົງເທື່ອລະກ້າວ.

ທ່ານ ສຈ.ດຣ. ​ເອກ​ສະຫວ່າງ ວົງ​ວິຈິດ ລັດຖະມົນຕີ​ວ່າການ​ກະຊວງ​ສາທາລະນະ​ສຸກ ​ໄດ້​ລາຍ​ງານ​ໃຫ້​ຮູ້​ ​ເມື່ອ​ບໍ່​ດົນ​ນີ້​ວ່າ: ປັດຈຸບັນ ພະຍາ​ດ​ໄ​ຂ້ຍຸງ​ລາຍ ​ແຜ່​ຂະຫຍາຍ​ເປັນ​ວົງ​ກວ້າງ ຕັ້ງ​ແຕ່​ຕົວ​ເມືອງ​ຈົນ​ຮອດ​ຊົນນະບົດ ​ເກີດ​ຂຶ້ນ​ໃນ​ຫລາຍໆ​ແຂວງ​ພ້ອມ​ກັນ ​ໃນ​ທົ່ວ​ປະ​ເທດ ​ໃນ​ນັ້ນ, ​ແຂວງ​ທີ່​ຖືກ​ຜົນ​ກະທົບ​ຫລາຍ ​ ແມ່ນ​ແຂວງ​ທີ່​ມີ​ພົນລະ​ເມືອງ​ໜາ​ແໜ້ນ, ຕໍ່​ກັບ​ບັນ​ຫາ​ດັ່ງກ່າວ ກະຊວງ​ສາທາລະ​ນະ​ສຸກ ​ໄດ້​ເອົາ​ໃຈ​ໃສ່​ຕິດຕາມ, ​ເກັບ​ກຳ ​ແລະ ​ໃຫ້​ພາກສ່ວນ​ກ່ຽວຂ້ອງ ລາຍ​ງານ​ສະພາບ​ໄຂ​້ຍຸ​ງລາຍ ຢູ່​ແຕ່ລະ​ແຂ​ວງ​ໃນ​ຂອບ​ເຂດ​ທົ່ວ​ປະ​ເທດ ຢ່າງ​ເປັນປະ​ຈຳ ພ້ອມໂຄສະນາ​ສຸຂະ​ສຶກສາ​ໃຫ້​ຄວາມ​ຮູ້ ​ແລະ ປຸກລະດົມ ​ພໍ່​ແມ່​ປະຊາຊົນ ​ໃຫ້​ເປັນ​ເຈົ້າ​ການ​ໃນ​ການ​ທຳລາຍ​ແຫ​ລ່ງ​ເພ​າະພັນ​ຍຸງ​ລາຍ ​ໂດຍ​ປະຕິບັດ​ຄຳ​ຂວັນ 5 ປ ຢ່າງ​ເປັນ​ປະຈຳ ​ເຊັ່ນ: ປິດຝາ​ພາຊະນະ​ນຳ​ໃຊ້​ໃນ​ເຮືອນ ​ແລະ ນອກ​ເຮືອນ ​ເພື່ອ​ບໍ່​ໃຫ້​ຍຸງ​ໄຂ່​ໃສ່; ປ່ຽນ​ນ້ຳ​ໃນ​ພາສະ​ນະ ​ເຊັ່ນ: ​ເຕົ້າ​ດອກ​ໄມ້, ນ້ຳ​ຮອງ​ຕີນ​ຕູ້, ຖ້ານ​ຮອງ​ຈອກ​ນ້ຳ; ປ່ອຍປາ​ຫາງ​ນົກ​ຍຸງ ​ເພື່ອ​ໃຫ້​ກິນ​ໜອນ​ນ້ຳ​ຍຸງ​ລາຍ; ປັບປຸງ ​ໂດຍ​ການ​ເຮັດອະນາ​ໄມ​ສິ່ງ​ແວດ​ລ້ອມ​ອ້ອມ​ເຮືອນ ບໍ່​ໃຫ້​ມີ​ກະ​ໂປ໊ະ, ກະ​ປ໊ອງ, ຢາງ​ຕີນລົດ​ທີ່​ມີ​ນ້ຳ​ຂັງ ​ແລະ ປະຕິບັດໃຫ້​ເປັນນິ​​ໃສ ​ເປັນ​ປະຈຳ​ທຸກໆ​ວັນ.

ປັດຈຸບັນ ພໍ່​ແມ່​ປະຊາຊົນ​ຈຳນວນ​ໜຶ່ງ ຍັງ​ເຂົ້າ​ໃຈ​ວ່າ: ​ວຽກ​ງານ​ການທຳລາຍ​ແຫ​ລ່ງ​ເພາະ​ພັນ​ຍຸງ​ລາຍ ​ເປັນ​ໜ້າ​ທີ່​ຂອງກະຊວງ​ສາທາລະນະ​ສຸກ, ​ໜ້າ​ທີ່​ຂອງ​ແພດ​-ໝໍຢູ່ສະ​ນັ້ນ, ​ຮຽກ​ຮ້ອງ​ໃຫ້​ພາກສ່ວນ​ກ່ຽວຂ້ອງ ລົງ​ສົມທົບ​ກຳ​ອຳນາດ​ການ​ປົກຄອງ​​ແຕ່ລະ​ຂັ້ນ ​ໂດຍ​ສະ​ເພາະ​ຂັ້ນ​ແຂວງ, ​ເມືອງ, ບ້ານ ປຸກລະດົມ​ໃຫ້​ປະຊາຊົນ​ເຂົ້າ​ໃຈ​ວ່າ ​ ວຽກ​ງານ​ທຳລາຍ​ແຫ​ລ່ງ​ເພາະ​ພັນ​ຍຸງ​ລາຍ​ ເປັນ​ວຽກ​ງານ​ໜຶ່ງ​ທີ່​ສຳຄັນ ​ແລະ ​ເປັນຄວາມ​ຮັບ​ຜິດ​ຊອບ​ຂອງ​ຊຸມ​ຊົນ ທັງ​ແມ່ນ​ຄວາມ​ຮັບຜິດຊອບ​ໂດຍ​ກົງ​ຂອງ​ແຕ່​ລະ​ຄອບຄົວ ທີ່​ຈະ​ຕ້ອງ​ໄດ້​ຊ່ວຍ​ກັນ​ກຳຈັດ​ແຫ​ລ່ງ​ເພາະ​ພັນ​ຍຸງ​ລາຍ​ໃຫ້​ໝົດ​ໄປ ​ເພື່ອ​ຫລຸດຜ່ອນ​ການ​ແຜ່​ລະບາດ​ຂອງ​ພະຍາດ​ໄຂ້​ຍຸງ​ລາຍ ​ໃຫ້​ຫລຸດ​ລົງ​ເທື່ອ​ລະ​ກ້າວ.
ແຫລ່ງຂ່າວ:
ຂປລ