ກະຊວງກະສິກຳ ອອກຄຳສັ່ງອະນຸຮັກ ແລະ ພັດທະນາສັດນໍ້າ-ສັດປ່າ

0
969

ໃນ​ຊຸມ​ປີ­ຜ່ານ­ມາ, ພະ​ແນກ​ກະ­ສິ­ກຳ ແລະ​ປ່າ­ໄມ້​ປະ­ຈຳແຂວງນະ­ຄອນ­ຫຼວງ​ວຽງ​ຈັນ ໄດ້​ມີ​ຄວາມ​ພະ­ຍາ­ຍາມ​ຢ່າງ ຕັ້ງ­ໜ້າ​ໃນ​ການ​ສ້າງ​ຂະ​ບວນ​ການ​ປ່ອຍ​ປາ, ອະ­ນຸ​ຮັກ​ສັດ​ນ້ຳ ແລະ​ສັດ­ປ່າ​ແຫ່ງ​ຊາດ ພ້ອມ​ທັງ​ອອກ​ລະ­ບຽບ​ການ​ຄຸ້ມ​ຄອງ, ວາງ​ມາດ​ຕະ­ການ​ຫ້າມ​ລ່າ​ສັດ, ຫາ​ປາ ແລະ​ສັດ​ນ້ຳ​ໃນ​ໄລ­ຍະ​ທີ່ສັດ​ນ້ຳ ແລະ​ສັດ­ປ່າ​ວາງ​ໄຂ່, ຂະ­ຫຍາຍ​ພັນ, ສະ­ກັດ​ກັ້ນ​ການຄ້າ​ສັດ​ນ້ຳ ແລະ​ສັດ­ປ່າ​ປະ­ເພດ​ຫວງ​ຫ້າມ, ເຮັດ​ໃຫ້​ຝູງ​ສັດ​ດັ່ງກ່າວ​ມີ​ການ​ຂະ­ຫຍາຍ​ພັນ​ໄດ້​ດີ​ສົມ­ຄວນ ແຕ່​ຄຽງ​ຄູ່​ກັນ​ນັ້ນ​ປາ­ກົດວ່າ­ການ​ລະ­ເມີດ​ລະ­ບຽບ​ກົດ­ໝາຍ​ກໍ​ຍັງ​ເກີດ​ຂຶ້ນ​ໃນ​ບາງ​ທ້ອງຖິ່ນ​ເຊັ່ນ: ການ​ນຳ​ໃຊ້​ເຄື່ອງ­ມື​ແບບ​ດັບ​ສູນ​ເພື່ອ​ລ່າ­ເນື້ອ​ຫາ​ປາ, ການ​ຄ້າ­ຂາຍ​ສັດ​ນ້ຳ ແລະ​ ສັດ­ປ່າ​ປະ­ເພດ​ຫວງ​ຫ້າມ​ບັນ­ຊີ 1 ແລະປະ­ເພດ​ຄຸ້ມ​ຄອງ​ບັນ­ຊີ 2 ຢູ່​ຕາມ​ທ້ອງ​ຕະ­ຫຼາດ, ຮ້ານ​ອາ­ຫານ, ຕາມ​ເສັ້ນ­ທາງ ແລະ ​ອື່ນໆ.

ເພື່ອ​ແກ້​ໄຂ​ປາ­ກົດ­ການ​ຫຍໍ້­ທໍ້ ແລະ ​ທັງ​ເປັນ​ການ​ສ້າງ​ຂະ​ບວນການ​ເນື່ອງ​ໃນ​ວັນ​ປ່ອຍ​ປາ ແລະ ​ອະ­ນຸ​ຮັກ​ສັດ​ນ້ຳ ແລະ​ສັດ­ປ່າແຫ່ງ​ຊາດ​ວັນ​ທີ 13 ກໍ­ລະ­ກົດ 2016 ໃຫ້​ເປັນ​ຂະ​ບວນ​ຟົດ­ຟື້ນທົ່ວ​ປວງ​ຊົນ, ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ​ປ່າ­ໄມ້​ໄດ້​ອອກຄຳ​ສັ່ງ​ສະ­ບັບ​ເລກ​ທີ 2367/ກປ ລົງ​ວັນ​ທີ 27 ພຶດ­ສະ­ພາ 2016 ທີ່​ມີ​ເນື້ອ​ໃນ​ລະ­ບຸ​ວ່າ: ໃຫ້​ພາກ­ສ່ວນ​ທີ່​ກ່ຽວ­ຂ້ອງ​ທຸກ​ຂັ້ນ​ໃນ​ຂອບເຂດ​ທົ່ວ​ປະ­ເທດ​ສືບ­ຕໍ່​ໂຄ­ສະ­ນາ​ເຜີຍ­ແຜ່​ກົດ­ໝາຍ​ວ່າ​ດ້ວຍ​ການປະ­ມົງ ແລະ​ກົດ­ໝາຍ​ວ່າ​ດ້ວຍ​ສັດ​ນ້ຳ ແລະ​ສັດ­ປ່າໃຫ້​ທົ່ວ​ປວງຊົນ​ໄດ້​ຮັບ​ຮູ້ ແລະ​ເຂົ້າ­ໃຈ​ເຖິງ​ກົດ­ໝາຍ​ດັ່ງ­ກ່າວ​ຢ່າງ​ເລິກ­ເຊິ່ງ, ສ່ວນ​ບ່ອນ​ທີ່​ມີ​ເງື່ອນ­ໄຂ​ກໍ​ໃຫ້​ມີ​ການ​ປະ​ກວດ​ຮູບ­ແຕ້ມ, ແຂ່ງຂັນ­ກາບ​ກອນ, ຈັດ​ວາງ­ສະ­ແດງ​ຮູບ​ພາບ, ແຈກ​ຢາຍ​ຄູ່​ມື ແລະເອ­ກະ­ສານ​ການ​ຂະ­ຫຍາຍ​ພັນ​ປາ ແລະ​ ວຽກ​ງານ​ອະ­ນຸ​ຮັກ​ສັດນ້ຳ ແລະ​ສັດ­ປ່າ, ໃຫ້​ຄວາມ​ຮູ້​ພື້ນ­ຖານໃນ​ການ​ເພາະ​ລ້ຽງ​ແກ່​ປະ­ຊາ­ຊົນ, ພ້ອມນັ້ນ​ກໍ​ໃຫ້​ຕິດ­ຕາມ​ກວດ­ກາ ແລະ ​ປຸກ​ລະດົມ​ປະ­ຊາ­ຊົນ​ໃຫ້​ຕື່ນ​ຕົວ​ສະ­ໝັກ​ໃຈ​ມອບອາ­ວຸດ​ລ່າ​ສັດ ແລະ​ ເຄື່ອງ­ມື​ຫາ​ປາ​ແບບດັບ​ສູນ​ແກ່​ອົງ­ການ​ປົກ­ຄອງ​ທ້ອງ­ຖິ່ນ ແລະ​ ເຈົ້າ​ໜ້າ­ທີ່​ທີ່​ກ່ຽວ­ຂ້ອງເພື່ອ​ຄຸ້ມ​ຄອງໃຫ້​ຖືກ­ຕ້ອງ​ຕາມ​ລະ­ບຽບ​ກົດ­ໝາຍ.

ນອກ​ນີ້​ໃຫ້​ກົມ​ລ້ຽງ­ສັດ ແລະ​ການ​ປະມົງ, ກົມ​ກວດ­ກາ​ປ່າ­ໄມ້, ກົມ​ປ່າ­ໄມ້, ພະແນກ​ກະ­ສິ­ກຳ ແລະ​ປ່າ­ໄມ້​ປະ­ຈຳ​ແຂວງ ແລະ​ນະ­ຄອນ­ຫຼວງ​ວຽງ​ຈັນ ປະ­ສານ​ສົມທົບ​ກັບ​ອົງ­ການ​ປົກ­ຄອງ​ທ້ອງ­ຖິ່ນ ເພື່ອປຸກ­ລະ­ດົມ​ຂົນ­ຂວາຍ ແລະ​ຈັດ​ຕັ້ງ​ກິດ​ຈະກຳ​ຕ່າງໆ​ຕາມ​ເງື່ອນ­ໄຂ ແລະ​ສະ­ພາບຕົວ​ຈິງ​ໃນ​ການ​ປ່ອຍ​ປາ​ລົງ​ໃສ່​ໜອງ, ບຶງ, ແມ່­ນ້ຳ​ລຳ­ເຊ, ອ່າງ­ເກັບ­ນ້ຳ, ເຂື່ອນ​ໄຟ­ຟ້ານ້ຳ­ຕົກ, ແຫຼ່ງ​ນ້ຳ​ຕ່າງໆ ແລະ​ປ່ອຍ​ສັດປ່າ​ທີ່​ໄດ້​ມາ​ຈາກ​ການ​ເພາະ​ພັນ, ຢຶດ​ຈາກການ​ລ່າ ຫຼື ການ​ຄ້າŒຂາຍ​ຜິດ​ກົດ­ໝາຍເຂົ້າ​ໃນ​ປ່າ​ສະ­ຫງວນ​ຕ່າງໆ​ທີ່​ເຫັນ​ວ່າ​ມີຄວາມ​ປອດ​ໄພແລະ​ສາ­ມາດ​ອອກ​ແມ່ແພ່​ລູກ​ໄດ້​ຢ່າງ​ເປັນ​ຂະ​ບວນ​ກວ້າງ­ຂວາງ, ຫ້າມ​ບຸກ­ຄົນ​ໃດ​ຊື້Œຂາຍ​ສັດ​ນ້ຳແລະ​ສັດປ່າ​ປະ­ເພດ​ຫວງ​ຫ້າມຫຼືບັນ­ຊີ 1 ແລະປະ­ເພດ​ຄຸ້ມ​ຄອງຫຼືບັນ­ຊີ 2 ໃນ​ທຸກ​ລະ­ດູການ​ຢ່າງ​ເດັດ­ຂາດ, ຫ້າມ​ນຳ​ເອົາ​ສັດ​ນ້ຳ ແລະ​ສັດ­ປ່າ​ປະ­ເພດ​ຫວງ​ຫ້າມ​ທີ່​ຍັງ​ມີຊີ­ວິດ, ຊາກ, ຊິ້ນ​ສ່ວນ ແລະ​ອະ​ໄວ​ຍະ​ວະຕ່າງໆ​ຂອງ​ສັດ​ອອກ​ຈາກ​ທີ່­ຢູ່​ອາ­ໄສ ຫຼື ແຫຼ່ງ​ກຳ­ເນີດ​ມາ​ໄວ້​ໃນ​ຄອບ​ຄອງ, ຫ້າມບຸ­ກລຸກ​ທຳ­ລາຍ​ເຂດ​ອະ­ນຸ​ຮັກ​ພັນ​ສັດ, ວັງສະ­ຫງວນ, ຖິ່ນ​ທີ່­ຢູ່​ອາ­ໄສ ແລະ​ແຫຼ່ງ​ອາຫານ​ຂອງ​ສັດ​ນ້ຳ ແລະ​ສັດ­ປ່າ​ໂດຍ​ທາງ ກົງ ແລະ​ທາງ​ອ້ອມ​ທີ່​ບໍ່​ຖືກ­ຕ້ອງ​ຕາມ​ລະ­ບຽບ​ກົດ­ໝາຍ.

ພ້ອມ​ດຽວ​ກັນ​ນີ້​ຍັງ​ຫ້າມ​ຈັບ­ຈອງ, ຍ້າຍ, ປ່ຽນ­ແປງ ຫຼື ທຳ­ລາຍ​ເຄື່ອງ­ໝາຍເຂດ​ວັງ​ສະ­ຫງວນ, ເຂດ​ອະ­ນຸ​ຮັກ​ພັນ​ສັດ ແລະ​ຖິ່ນ​ທີ່­ຢູ່​ອາ­ໄສ, ຫາ​ປາ​ໃນ​ໄລ­ຍະ​ລະດູ​ປາ​ວາງ​ໄຂ່, ຕັນ​ສາຍ​ນ້ຳ​ດ້ວຍ​ວິ­ທີ​ການເຮັດ​ຕ້ອນ ແລະ​ການ​ກະ­ທຳ​ອື່ນໆ​ທີ່​ເປັນການ​ລະ­ເມີດ​ລະ­ບຽບ​ກົດ­ໝາຍ​ກ່ຽວ​ກັບສັດ​ນ້ຳŒສັດ­ປ່າແລະ​ກົດ­ໝາຍ​ວ່າ​ດ້ວຍການ​ປະ­ມົງ, ໃນ​ກໍ­ລະ­ນີ​ພົບ​ເຫັນ​ຜູ້​ລະ­ເມີດຂໍ້​ຫ້າມ​ດັ່ງ­ກ່າວ​ໃຫ້​ສົມ­ທົບ​ກັບ​ພາກ­ສ່ວນກ່ຽວ­ຂ້ອງ​ດຳ­ເນີນ​ມາດ​ຕະ­ການ​ກ່າວເຕືອນ, ສຶກ​ສາ​ອົບ­ຮົມ, ປັບ​ໃໝ, ດຳ­ເນີນຄະ­ດີ​ແພ່ງ ຫຼື ຄະ­ດີ​ອາ­ຍາ​ຕາມ​ແຕ່​ລະ​ກໍລະ​ນີ​ເບົາ ຫຼື ໜັກ​ທີ່​ໄດ້​ກຳ­ນົດ​ໄວ້​ໃນ​ກົດໝາຍ.

ສຳ­ລັບ​ການ­ຈັດ­ຕັ້ງ​ພິ­ທີ​ເນື່ອງ​ໃນ​ວັນປ່ອຍ​ປາ ແລະ​ອະ­ນຸ​ຮັກ​ສັດ​ນ້ຳ ແລະ​ສັດປ່າ​ແຫ່ງ​ຊາດ​ວັນ​ທີ 13 ກໍ­ລະ­ກົດ 2016 ນີ້, ໃຫ້​ອີງ­ໃສ່​ເງື່ອນ­ໄຂ​ຂອງ​ແຕ່​ລະ​ທ້ອງ ຖິ່ນ​ໂດຍ​ເນື້ອ​ໃນ​ເນັ້ນ​ໃສ່​ປຸກ­ລະ­ດົມ​ເປັນຕົ້ນ­ຕໍ​ບົນ​ພື້ນ­ຖານ​ປະ­ຢັດ​ມັດ­ທະ­ຍັດ, ບ່ອນໃດ​ມີ​ເງື່ອນ­ໄຂ​ກໍ​ໃຫ້​ລົງ­ມື​ແຕ່​ດຽວ­ນີ້​ເປັນຕົ້ນ​ໄປ ແລະ​ໃຫ້​ສືບ­ຕໍ່​ຈັດ​ຕັ້ງ​ປະ­ຕິ­ບັດ​ຮອດທ້າຍ​ເດືອນ​ກັນ­ຍາ 2016, ສ່ວນ​ແນວ​ພັນປາ​ທີ່​ຈະ​ນຳ​ມາ​ປ່ອຍ​ນັ້ນ​ແມ່ນ​ໃຫ້​ເລັ່ງ​ໃສ່ແນວ​ພັນ​ປາ​ພື້ນ­ເມືອງ ໂດຍ​ສະ­ເພາະ​ຈຳພວກ​ປາ​ກິນ​ພືດ ຫຼື ໄຮ​ນ້ຳ, ສ່ວນ​ແນວ​ພັນປາ​ຕ່າງ­ປະ­ເທດ​ແມ່ນ​ໃຫ້​ປ່ອຍ​ສະ­ເພາະ​ຢູ່ແຫຼ່ງ​ນ້ຳ​ປິດ​ເຊັ່ນ: ໜອງ​ປາ​ຊຸມ​ຊົນ, ອ່າງເກັບ​ນ້ຳ​ຂະ­ໜາດ​ນ້ອຍ ຫຼື ໜອງ​ບໍ­ລິ­ເວນໃດ​ໜຶ່ງ ເພື່ອ​ຫຼີກ­ເວັ້ນ​ການ​ດັບ​ສູນ​ປາ​ພື້ນເມືອງ​ຂອງ​ລາວ​ເຮົາ.

ທີ່ມາ: logo

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.