ກວດ​ກູ້ລະ​ເບີດບໍ່​ທັນ​ແຕກ ທີ່​ຕົກ​ຄ້າງ​ຢູ່ ສ​ປ​ປ ລາວ ໄດ້ 1%

0
282

ທ່ານ ໂຈມ​ແຍງ ແພງ​ທອງ​ສະ​ຫວັດ ຫົວ​ໜ້າ​ຫ້ອງ​ການ ຄະ​ນະ​ກຳ​ມະ​ການ​ຄຸ້ມ​ຄອງ​ແຫ່ງ​ຊາດ ເພື່ອ​ການ​ແກ້​ໄຂ​ບັນ​ຫາ​ລະ​ເບີດບໍ່​ທັນ​ແຕກ ທີ່​ຕົກ​ຄ້າງ​ຢູ່ ສ​ປ​ປ ລາວ ໄດ້​ເວົ້າ​ວ່າ: ນັບແຕ່ມື້ເລີ່ມຕົ້ນເກັບ​ກູ້​ລະ​ເບີດ​ແຕ່ປີ 1996 ຈົນຮອດປັດຈຸບັນ ສາມາດຈັດຕັງປະຕິບັດໄດ້ພຽງແຕ່ 1 ເປີເຊັນ ເທົ່ານັ້ນ ແລະ ຍັງ​ອີກ 99% ຖ້າ​ທຽບ​ໃສ່​ພື້ນ​ທີ່ໆໄດ້​ຮັບ​ຜົນ​ກະ​ທົບ​ ​ພວກ​ເຮົາ​ໄດ້​ວິ​ເຄາະ​ຢູ່ ສ​ປ​ປ ລາວ ແມ່ນ 87 ພັນ​ກິ​ໂລ​ຕາ​ແມັດ ແລະ ພວກ​ເຮົາໄດ້​​ສະ​ເລ່ຍ​ໃສ່​ຈຳ​ນວນ​ປີ ​ຍັງ​ອີກ 1.860 ປີ ຈຶ່ງ​ສາ​ມາດ​ບັນ​ລຸ​ການ​ສຳ​ຫຼວດກວດ​ກູ້ລະ​ເບີດບໍ່​ທັນ​ແຕກ ທີ່​ຕົກ​ຄ້າງ​ຢູ່ ສ​ປ​ປ ລາວ ໄດ້​ທັງ​ໝົດ ເພາະ​ວ່າ​ຈຸດ​ພິ​ເສດ​​ຂອງວຽກ​ງານ​ເກັບ​ກູ້​ລະ​ເບີດ​ ຫຼື​ ວ່າການ​ແກ້​ໄຂ​ບັນ​ຫາ​ລະ​ເບີດ​ບໍ່ທັນ​ແຕກ ຢູ່ ສ​ປ​ປ ລາວ ມັນ​ຈະ​ແຕກ​ຕ່າງ​ກັບ​ປະ​ເທດ​​ອື່ນ ເພາະ​ວ່າ​ຈຸດ​ພິ​ເສດ​ຂອງ​ປະ​ເທດ​ເຮົາ​ແມ່ນ​ມີ​ພູ​ຜ່າ​ປ່າ​ດົງ ການ​ເກັບ​ກູ້​ລະ​ເບີດ​ຕ້ອງ​ໄດ້​ເອົາ​ໃຈ​ໃສ່ ໃຊ້​ເຕັກ​ນິກ ແລະ ທຶນ​ຮອນ​ ເມື່ອ​ທຽບ​ໃສ່​ຜົນ​ສຳ​ເລັດ​ທີ່​ຜ່ານ​ມາ​ແມ່ນ​ມີ​ຄວາມ​ທ້າ​ທາຍຫຼາຍ ແລະ ໃນ​ແຕ່​ລະ​ປີ​ເຮັດ​ໃຫ້​ປະ​ຊາ​ຊົນ​ເກີດ​ອຸ​ບັດ​ເຫດ ຊຶ່ງ​ປີ 2021 ​ແມ່ນ​ມີ​ຜູ້​ໄດ້​ຮັບ​ຜົນ​ກະ​ທົບ​ຈາກ​ລະ​ເບີດ​ບໍ່ທັນ​ແຕກ​ທັງ​ໝົດ 63 ຄົນ.

ໃນ​ການ​ຄຸ້ມ​ຄອງການ​ຕິດ​ຕາມອຳ​ນວຍ​ຄວາມ​ສະ​ດວກ​ໃນ​ການເຄື່ອນ​ໄຫວ ​ການ​ແກ້​ໄຂ​ບັນ​ຫາ​ລະ​ເບີດ​ບໍ່ທັນ​ແຕກເຊັ່ນ: ​ການ​ໂຄ​ສະ​ນາສຶກ​ສາ​ຄວາມ​ສ່ຽງ​ໄພ ການ​ສຳຫຼວດ​ການກວດ​ກູ້ ແລະ ການ​ຊ່ວຍ​ເຫຼືອ​ຜູ້​ຖືກ​ເຄາະ​ຮ້າຍ ແລະ ຄຽງ​ຄູ່​ກັນ​ນັ້ນ​ຍັງ​ໄດ້​​ອຳ​ນວຍ​ຄວາມ​ສະ​ດວກ​ໃຫ້​ແກ່​​ທຸກ​ອົງ​ການ​ທີ່ປະ​ຕິ​ບັດ​ງານ​ທັງ​ພາຍ​ໃນ ແລະ ຕ່າງ​ປະ​ເທດ ທີ່​ມີ​ຈຸດ​ປະ​ສົງ​​ທີ່ຈະແກ້ໄຂ​ບັນ​ຫາ​ລະ​ເບີດບໍ່​ທັນ​ແຕກ​ທີ່​ຕົກ​ຄ້າງ​ຢູ່ ສ​ປ​ປ ລາວ ເພື່ອ​ເປັນ​ການ​ພັດ​ທະ​ນາເສດ​ຖະ​ກິດ-ສັງ​ຄົມ ການ​ຈັດ​ຕັ້ງ​ປະ​ຕິ​ບັດ​ຕົວ​ຈິງ ຂອງ​​ອົງການ​ປະ​ຕິ​ບັດ​ງານ​​ເຄື່ອນ​ໄຫວຢູ ສ​ປ​ປ ລາວ ຊຶ່ງ​​ພວກເຮົາ​ໄດ້​ຜັດ​ປ່ຽນ​ໄປ​ເປັນ​ແຕ່​ລະ​ແຂວງ ສຳ​ລັບ​ປີນີ້​ພວກ​ເຮົາ​ໄດ້​ເລືອກ​ເອົາ​ແຂວງ​ສາ​ລະ​ວັນ ຊຶ່ງ​ເປັນ​ແຂວງ​ທີ່​ລະ​ເບີດ​ຕົກ​ຄ້າງ​ເປັນອັນ​ດັບ 4 ຂອງ​ປະ​ເທດ.

ແຫຼ່ງຂ່າວ: ໜັງສືພິມປະຊາຊົນ