spot_img
Home​ຂ່າວບັນເທິງອິນແຕ່ງ ສິລະປິນ ຄົບເຄື່ອງ

ອິນແຕ່ງ ສິລະປິນ ຄົບເຄື່ອງ

Published on

961210_242725405876014_1390968324_n

ຂຽນໂດຍ: ຊຽງກະເລັນ ບ້ານນາ

ຄຳວ່ານັກຮ້ອງ ຫຼື ໝໍລຳ ແມ່ນບັນດາສັກ ຂອງນັກສິລະປະທາງດ້ານການຮ້ອງ ແກ່ກ່ອນຈະຖືກເອີ້ນວ່າເປັນນັກຮ້ອງຫຼືໝໍລຳໄດ້ ກໍສົມຄວນຖືກເອີ້ນຈາກຜູ້ຟັງ ຫາກບໍ່ແມ່ນເອີ້ນເອົາເອງ ຫຼືລຳພຽງກອນດຽວ ຫຼືຮ້ອງເພງພຽງດ້າມເພງ ແຕ່ຫາກເປັນຜູ້ມັກຮັກ ໃນດ້ານການສະແດງສິລະປະປະເພດນີ້ເປັນຊີວິດຈິດໃຈແທ້ໆ ແລະມີຜົນງານການຮ້ອງຫຼືລຳມາແລ້ວຢ່າງຫຼວງຫຼາຍ. ສ່ວນພອນສະຫວັນນັ້ນເປັນການໃຫ້ມາຂອງເທບພະເຈົ້າເທິງສະຫວັນ ຖ້າຜູ້ໃດມີ ແມ່ນຜູ້ນັ້ນເປັນຜູ້ໂຊກດີ. ພອນສະຫວັນຂອງນັກຮ້ອງ ຫຼືໝໍລຳນັ້ນ ສ່ວນຫຼາຍແມ່ນໝາຍເຖິງນ້ຳສຽງທີ່ດີ ຮ້ອງອອກມາເປັນຕາຟັງ ຟັງແລ້ວອອນຊອນໃຈ ແລະຄ້ອຍຕາມໄດ້. ແຕ່ຖ້າຫາກມີພອນສະຫວັນຫຼາຍກວ່ານັ້ນຄື ໜ້າຕາດີ ແລະມີຄວາມຮູ້ທາງດ້ານການແຕ່ງບົດເພງແລະບົດລຳໄດ້ເອງ ກໍຍິ່ງເພິ່ມຄວາມສົມບູນແບບໃຫ້ແກ່ຜູ້ເປັນນັກຮ້ອງຫຼືໝໍລຳ.

ຜູ້ຂຽນເປັນຄົນມັກຟັງລຳ ກໍເລີຍໄດ້ມີໂອກາດຟັງລຳຈາກໝໍລຳຜູ້ໜຸ່ມນ້ອຍຜູ້ໜຶ່ງ ທາງ Youtube ຟັງມາໄດ້ຫຼາຍປີແລ້ວ. ຕົກມາວ່າງກາງເດືອນທັນວາ 2013 ນີ້ ຜູ້ຂຽນພັດໄດ້ຟັງເພງ “Massage ທີ່ຖືກລືມ” ເຊິ່ງເປັນຜົນງານເພງຂອງໝໍລຳຄົນດັ່ງກ່າວ. ເອີ !!! ໄດ້ໝໍລຳສີພັນດອນມາຮ້ອງເພງບ້ານນາ ກະມ່ວນບໍ່ຢອກ ເພາະພື້ນຖານແມ່ນສຽງຄໍດີຈຶ່ງຄ່ອຍເປັນໝໍລຳໄດ້ ແລ້ວໃຫ້ໝໍລຳມາຮ້ອງເພງມັນກະເລີຍເປັນເລື່ອງງ່າຍແລະກິນງາມໄປອີກແບບໜຶ່ງ. ແຕ່ບໍ່ເຄີຍພໍ້ໜ້າກັນແບບໜ້າຕໍ່ໜ້າຈັກເທື່ອ ຄິດໃນໃຈຢູ່ວ່າ ຫາກບຸນມາ ວາດສະໜາຮອດ ຊິໄດ້ມີໂອກາດໄປນັ່ງຟັງລຳສີພັນດອນຄັກໆ ຈັກບາດ ຈາກປາກໝໍລຳສົດໆ.

ມັນເປັນລິຂິດຟ້າ ຫຼືຄວາມພະຍາຍາມ ກໍບໍ່ຮູ້, ມື້ວັນທີ 7 ທັນວາ 2013 ທີ່ຜ່ານມາ ຜູ້ຂຽນໄດ້ໄປໂມທະນາບຸນເຮືອນ ຢູ່ບ້ານວັດນາກ ເມືອງສີສັດຕະນາກ ນະຄອນຫຼວງວຽງຈັນ ກໍພໍດີເຫັນໜ້າໝໍລຳຢູ່ເຮືອນບຸນຫັ້ນ ກໍເລີຍໄດ້ມີໂອກາດທັກທາຍໂອ້ລົມນຳ ຈຶ່ງໄດ້ຮູ້ຈັກຢ່າງເປັນທາງການວ່າຊັ້ນສາ.

ອິນແຕ່ງ ແກ້ວບົວລາ ສາວຜິວກາເຟນົມ ແຕ່ນ້ຳສຽງໃສ ຍິ້ມງ່າຍ ແມ່ນລູກສາວຂອງ ບຸນທອງ ແກ້ວບົວລາໝໍລຳສີພັນດອນ ແລະ ບຸນເພັງ ແກ້ວບົວລາ ນາງເອກໝໍລຳເລື່ອງຕໍ່ກອນ ເຊິ່ງຕ່າງກໍເປັນໝໍລຳດັງໃນເຂດພາກໃຕ້.

ໝໍລຳອິນແຕ່ງໄດ້ເລົ່າສູ່ຟັງວ່າ ຕົນເອງເກີດຢູ່ໃນທ່າມກາງສຽງລຳ ກໍເລີຍມີຄວາມຮັກທາງດ້ານນີ້ມາຕັ້ງແຕ່ນ້ອຍໆ ເລິ່ມອ່ານໜັງສືໄດ້ກໍໄດ້ເລິ່ມຮຽນລຳມາຕັ້ງແຕ່ອາຍຸ 9 ປີ, ມີໂອກາດໄດ້ເລິ່ມຮັບງານຕັ້ງແຕ່ອາຍຸ 14 ປີ ແລະຕັ້ງແຕ່ເລິ່ມລຳມາຮອດປັດຈຸບັນກໍເປັນເວລາ 14 ປີແລ້ວ, ໄດ້ອັດຜົນງານອອກວາງຈຳໜ່າຍແລ້ວ 4 ຊຸດ(ຮ່ວມກັບໝູ່) ຖືວ່າເປັນຜູ້ມີປະສົບການທາງດ້ານການລຳມາຢ່າງຫຼວງຫຼາຍ. ອິນແຕ່ງເລົ່າຕື່ມວ່າ ມີເຈົ້າພາບງານບຸນມາຕິດຕໍ່ ໄປລຳງັນກອງບຸນເກືອບທຸກມື້ ໄລຍະໃດທີ່ບໍ່ໄດ້ງານແທ້ໆ ກໍອາທິດລະ 2-3 ງານ, ເວົ້າໄດ້ວ່າເກືອບບໍ່ໄດ້ພັກຜ່ອນເລີຍ ມີແຕ່ເດິນທາງໄປລຳຕາມງານບຸນຕ່າງໆ ຕ້ອງອາໄສນອນໃນເວລາເດິນທາງແທນ ເພາະສ່ວນຫຼາຍແລ້ວແຕ່ລະງານກໍຕ້ອງລຳແຕ່ຫົວຄ່ຳຈົນຂ້ອນແຈ້ງ.

ຜົນງານທີ່ອັດເປັນອາລະບ້ຳຊຸດຫຼ້າສຸດ ມາໃນບົດເພງບ້ານນາ ແລະລຳເພີນ ຮ່ວມກັບລຸ້ນເອື້ອຍໃນຄະນະ ດອກຟ້າເພັດໂພນທອງ ຊື່ຄຽງໃຈ (ຖ້າມີເງື່ອນໄຂຜູ້ຂຽນຈະນຳສະເໜີ ໝໍລຳຄຽງໃຈ ອີກເທື່ອໜຶ່ງຕ່າງຫາກ). ຜົນງານຊຸດນີ້ ເປັນຊຸດໃໝ່ພິເສດ ມີເພງແລະລຳແນວລະເຄິ່ງ ແລະຜົນງານທີ່ຂັບຮ້ອງອອກມາຊຸດນີ້ ຍັງເປັນຜົນງານຂອງອິນແຕ່ງ ແຕ່ງເອງ ທັງ 6 ກອນ (ອີກ 4 ກອນແມ່ນຄຽງໃຈແຕ່ງ) ເວົ້າໄດ້ວ່າເປັນໝໍລຳຄົບເຄື່ອງເລີຍກໍໄດ້ ເຊັ່ນ ລຳກໍໄດ້ຫຼາຍຈັງຫວະ, ຮ້ອງເພງກໍໄດ້, ສຽງກໍດີ, ລີລາກໍໃຫ້ ຊ້ຳບໍ່ພໍຍັງມີຄວາມສາມາດໃນການແຕ່ງເພງແຕ່ງລຳເອງໄດ້ ກໍຖືວ່າສຸດຍອດໝໍລຳໄປເລີຍ. ຕາມແນວຄິດຂອງຜູ້ຂຽນແລ້ວ ຖ້າມີການມອບລາງວັນໃຫ້ແກ່ນັກສິລະປິນທີ່ດີເດັ່ນ ອິນແຕ່ງ ກໍເປັນນັກສິລະປິນໜຸ່ມຜູ້ໜຶ່ງທີ່ຄວນໄດ້ຮັບລາງວັນ.

ເວົ້າເຖິງຜົນງານແລ້ວ ຄັນບໍ່ເວົ້າເຖິງຜົນງານຫຼ້າສຸດກໍຄືວ່າຍັງຂາດອັນໃດອັນໜຶ່ງ ດັ່ງນັ້ນ, ຈຶ່ງຢາກສະເໜີຜົນງານເພງ “Message ທີ່ຖືກລືມ”. ໃນບົດເພງໃຫ້ພັນລະນາເຖິງບັນຍາກາດການພົວພັນລະຫວ່າງບ່າວສາວໃນຍຸກໄອທີ ເຊິ່ງໂອລົມກັນດ້ວຍການສົ່ງຂໍ້ຄວາມຜ່ານໂທລະສັບມືຖືຫາກັນທຸກເຊົ້າທຸກແລງ ຕົກມາມື້ໜຶ່ງໂທລະສັບມືຖືພັດບໍ່ມີຂໍ້ຄວາມເຂົ້າມາເລີຍ, ເຮັດໃຫ້ຜູ້ຍິງທີ່ເຝົ້າຄອຍອ່ານຕ້ອງໂສກເສົ້າເສຍນ້ຳຕາ. ສຳລັບຫຼັກການດ້ານການແຕ່ງເພງນັ້ນຜູ້ຂຽນຢາກບອກວ່າໄດ້ແລ້ວ 95% ສ່ວນທີ່ເຫຼືອນັ້ນ ຖ້າໃຜບໍ່ຮູ້ຫຼັກການແຕ່ງເພງແລ້ວກໍຄົງເບິ່ງບໍ່ເຫັນ ອັນນີ້ເອົາໄວ້ເປັນວຽກບ້ານຂອງສິລະປິນຄົບເຄື່ອງຜູ້ນີ້ສາ. ສ່ວນເລື່ອງທຳນອງເພງນັ້ນ ຜູ້ຂຽນຈະບໍ່ຂໍອະທິບາຍຫຍັງຍາກ ເພາະເຖິງແມ່ນຜູ້ບໍ່ຮູ້ພາສາລາວມາຟັງກໍຄົງຮູ້ວ່າເປັນເພງທີ່ບົ່ງບອກເຖິງຄວາມໂສກເສົ້າ ຜິດຫວັງ ດ້ວຍສຽງຊໍທີ່ກ່ອມອາລົມໄດ້ດີຫຼາຍ. ເລື່ອງນ້ຳສຽງຂອງນັກຮ້ອງແລ້ວອັນນີ້ຈະບໍ່ເວົ້າເຖິງເລີຍ ເພາະຮູ້ຢູ່ແລ້ວວ່າໃຫ້ໝໍລຳມາຮ້ອງເພງບ້ານນານັ້ນຈະເປັນແນວໃດ.

ຜູ້ຂຽນຢາກບອກທ່ານຜູ້ອ່ານວ່າສິລະປິນທ່ານນີ້ ບໍ່ທຳມະດາ ບໍ່ແມ່ນຢາກມີຊື່ສຽງ ແຕ່ເຂົາບອກວ່າມາຈັບໄມໂອ່ຍລຳເຂົ້າກັບສຽງແຄນ, ສຽງຊໍ, ສຽງກອງ ແລະກະຈັບປີ່ ນີ້ແມ່ນຍ້ອນຄວາມມັກຮັກແລະຢາກສືບມູນມໍລະດົກທາງດ້ານສິລະປະຈາກລຸ້ນພໍ່ຕໍ່ໃສ່ລຸ້ນລູກ, ຢາກຮັກສາແລະເຜີຍແວ່ສິລະປະການຮ້ອງລຳນີ້ໄວ້ຄູ່ຊາດລາວຕະຫຼອດໄປ, ໝໍລຳອິນແຕ່ງບອກມ້ວນທ້າຍວ່າ ຊີວິດນີ້ຈະຂໍເລືອກການລຳເປັນອາຊີບໄປຈົນກວ່າບໍ່ມີລົມຫາຍໃຈ. ຜູ້ຂຽນຈຶ່ງຢາກບອກວ່າ ນີ້ຄືອະນາຄົດຂອງຊາດຢ່າງແທ້ຈິງ ແລະຫວັງວ່າສັງຄົມຈະໃຫ້ການອຸ້ມຊູສິລະປິນຜູ້ນີ້ຕະຫຼອດໄປ.

 

ບົດຄວາມຫຼ້າສຸດ

ຈັບສາຍປາຕີ້ຄໍລະເຈັ້້ນ 9 ຄົນ ຢູ່ບ້ານອຸດົມ ເມືອງຫ້ວຍຊາຍ ແຂວງບໍ່ແກ້ວ.

ປກສ ແຂວງບໍ່ແກ້ວ ມ້າງຄະດີແກ້ງມົ້ວສຸ່ມຢາເສບຕິດ ຈຳນວນ 9 ຄົນ ຈັດປາຕີ້ຄໍລະເຈັ້ນ ຢູ່ບ້ານອຸດົມ ເມືອງຫ້ວຍຊາຍ ແຂວງບໍ່ແກ້ວ. ໃນຄັ້ງວັນທີ 26 ມີນາ 2025 ຜ່່ານມາ,...

ຈະນໍາໃຊ້ຕຳຫຼວດຈະລາຈອນ 1,172 ສະຫາຍ ໃນການອຳນວຍຄວາມສະດວກ ໃນໄລຍະປີໃໝ່ລາວ 2025

ເພື່ອສະກັດກັ້ນອຸບັດເຫດ ກົມຕຳຫຼວດຈະລາຈອນ ຈະນໍາໃຊ້ຕຳຫຼວດຈະລາຈອນ 1,172 ສະຫາຍ ຕັ້ງຈຸດກວດກາ 143 ຈຸດ ຕາມແຕ່ລະເສັ້ນທາງ ໄລຍະປີໃໝ່ລາວ. ທ່ານ ພັອ ຄໍາສອນ ສີດາວົງ ຫົວໜ້າກົມຕຳຫລວດຈະລາຈອນ,...

ລະທຶກ! ເຮືອສະປີດໂບ໊ດເກີດໄຟໄໝ້ກາງທະເລອັນດາມັນ ປະເທດໄທ

ເລັ່ງອົບພະຍົບຜູ້ໂດຍສານ ຈາກເຫດໄຟໄໝ້ເຮືອສະປີດໂບ໊ດ ບໍລິເວນເກາະໄມ້ທ່ອນ ຈັງຫວັດພູເກັດ ປະເທດໄທ. ສຳນັກຂ່າວຕ່າງປະເທດລາຍງານ ເຫດໄຟໄໝ້ເຮືອສະປີດໂບ໊ດບໍລິເວນເກາະໄມ້ທ່ອນ ຈັງຫວັດພູເກັດ ປະເທດໄທ ໃນເວລາປະມານ 09:10 ນາທີ ຂອງວັນທີ 1 ເມສາ...

ເພີ່ມຂຶ້ນຕໍ່ເນື່ອງເຫຍື່ອແຜ່ນດິນໄຫວທີ່ມຽນມາ ຫຼ້າສຸດມີຜູ້ເສຍຊີວິດກວ່າ 2,056 ຄົນ

ສະຖານະການແຜ່ນດິນໄຫວໃນມຽນມາຍັງໜ້າເປັນຫ່ວງ ເຈົ້ານ້າທີ່ຕ້ອງເລັ່ງທຳການຄົ້ນຫາ ແລະ ຊ່ວຍຜູ້ລອດຊີວິດອອກມາຈາກໃຕ້ຊາກອາຄານ ຫຼັງຈາກ້າວເຂົ້າສູ່ມື້ທີ 4 ນັບຕັ້ງແຕ່ເກີດເຫດເມື່ອວັນທີ 28 ມີນາ 2025. ສຳນັກຂ່າວຕ່າງປະເທດລາຍນງານໃນວັນທີ 1 ເມສາ 2025 ນີ້,...