ອີງຕາມການລາຍງານຈາກສູນວິເຄາະ ແລະ ລະບາດວິທະຍາ ກະຊວງສາທາລະນະສຸກ ໄດ້ລາຍງານໃຫ້ຮູ້ກ່ຽວກັບສະພາບພະຍາດໄຂ້ເລືອດອອກ (ໄຂ້ຍຸງລາຍ) ມາຮອດວັນທີ 27 ສິງຫາ 2013 ນີ້ວ່າ: ປັດຈຸບັນ ສະພາບການລະບາດຂອງພະຍາດໄຂ້ຍຸງລາຍແມ່ນຍັງສືບຕໍ່ລະບາດ ເນື່ອງຈາກຍັງຢູ່ໃນໄລຍະຝົນຕົກຢູ່ ເຊິ່ງເປັນສິ່ງອຳນວຍໃຫ້ແກ່ການຂະຫຍາຍພັນຂອງຍຸງ ທົ່ວປະເທດມີກໍລະນີພະຍາດໄຂ້ຍຸງລາຍທັງໝົດ 281 ຄົນ ຖ້າທຽບໃສ່ວັນທີ 26 ສິງຫາ ກໍຍັງປົກກະຕິ ມີກໍລະນີເປັນໄຂ້ເລືອດອອກຈຳນວນ 281 ກໍລະນີ ບໍ່ມີການຫຼຸດລົງ ຫຼື ເພີ່ມຂຶ້ນ ຍັງຊົງຕົວ ແຂວງທີ່ເປັນຫຼາຍກວ່າໝູ່ແມ່ນນະຄອນຫຼວງວຽງຈັນ ມີຈຳນວນ 163 ກໍລະນີ ຮອງລົງມາແມ່ນແຂວງວຽງຈັນ ແລະ ມີບາງແຂວງກໍບໍ່ມີກໍລະນີໄຂ້ເລືອດອອກ ເຊິ່ງລວມແລ້ວນັບແຕ່ອາທິດທຳອິດຂອງປີ 2013 ເຖິງວັນທີ 27 ສິງຫາ 2013 ທົ່ວປະເທດ ມີຈຳນວນສະສົມກໍລະນີເປັນໄຂ້ເລືອດອອກທັງໝົດ 44.599 ກໍລະນີ ເສຍຊີວິດແລ້ວ 90 ຄົນ ຢູ່ນະຄອນຫຼວງວຽງຈັນມີ 14.150 ກໍລະນີ ເສຍຊີວິດ 24 ຄົນ ແຂວງຈຳປາສັກມີກໍລະນີໄຂ້ເລືອດອອກ 4.692 ກໍລະນີ ແຕ່ເສຍຊີວິດຫຼາຍກວ່າໝູ່ 32 ຄົນ ແລະ ແຂວງອື່ນໆຕາມລຳດັບ.
ຕໍ່ກັບສະພາບການດັ່ງກ່າວ ທາງກະຊວງສາທາລະນະສຸກ ກໍຄືພະແນກສາທາລະນະສຸກແຕ່ລະແຂວງ ກໍໄດ້ສືບຕໍ່ເຝົ້າລະວັງ ມີກິດຈະກຳ ແລະ ມາດຕະການໃນການທຳລາຍແຫຼ່ງເພາະພັນຂອງຍຸງລາຍ ໂດຍມີການສ້າງຂະບວນການອະນາໄມ ແລະ ທຳລາຍແຫຼ່ງເພາະພັນຂອງຍຸງ ໂດຍການພົ່ນຢາ ແລະ ແຈກຍາຍຊາຍອາເບດຂ້າໜອນຍຸງຢ່າງເອົາໃຈໃສ່ ພ້ອມທັງໃຫ້ສຸຂະສຶກສາກ່ຽວກັບວິທີປ້ອງກັນໄຂ້ເລືອດອອກໄປພ້ອມກັນ.