ທຫລ ຈະກໍານົດເພດານອັດຕາເງິນຝາກ-ເງິນກູ້ ທີ່ເປັນເງິນຕາຕ່າງປະເທດ ຍົກສູງການຖືຄອງເງິນກີບ
ໃນວາລະດຳເນີນກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດຊຸດທີ IX ໃນວັນທີ 10 ມິຖຸນາ 2025 ນີ້, ທ່ານ ນາງ ວັດທະນາ ດາລາລອຍ ຮັກສາການຜູ້ວ່າການທະນາຄານ ແຫ່ງ ສປປ ລາວ (ທຫລ) ໄດ້ຊີ້ແຈງຕໍ່ຄຳຊັກຖາມຂອງຄະນະປະຈຳສະພາແຫ່ງຊາດ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງຕ່າງໆ ໃນຫລາຍບັນຫາສຳຄັນ ທີ່ຕິດພັນກັບວຽກງານຂອງ ທຫລ ໂດຍສະເພາະວຽກງານນະໂຍບາຍເງິນຕາ, ອັດຕາແລກປ່ຽນ, ວຽກງານຄຸ້ມຄອງເງິນຕາຕ່າງປະເທດ ແລະ ອື່ນໆ.
ຕໍ່ກັບບັນຫາດັ່ງກ່າວ, ທ່ານ ນາງ ວັດທະນາ ດາລາລອຍ ໄດ້ໃຫ້ຮູ້ວ່າ: ລັດຖະບານ ກໍຄື ທະນາ ຄານ ແຫ່ງ ສປປ ລາວ ຈະສຸມໃສ່ຄວບຄຸມປະລິມານເງິນ ໃຫ້ຢູ່ໃນລະດັບໃຫ້ແທດເໝາະກັບສະພາບເສດຖະກິດ, ຈະຄົ້ນຄວ້າກໍານົດເພດານອັດຕາເງິນຝາກ ແລະ ເງິນກູ້ ເປັນເງິນຕາຕ່າງປະເທດ ແນໃສ່ຍົກສູງການຖືຄອງເງິນກີບໃຫ້ຫລາຍຂຶ້ນ; ສືບຕໍ່ຄຸ້ມຄອງອັດຕາແລກປ່ຽນຕາມກົນໄກຕະຫລາດ, ຊຸກຍູ້ການແລກປ່ຽນເງິນຕາຕ່າງປະເທດ ຜ່ານຕະຫລາດແລກປ່ຽນເງິນຕາຕ່າງປະເທດ (LFX) ແລະ ຕີຖອຍການແລກປ່ຽນນອກລະບົບ ໃຫ້ໄດ້ເທື່ອລະກ້າວ, ພັດທະນາການເຄື່ອນໄຫວຂອງຕະຫລາດແລກປ່ຽນເງິນຕາຕ່າງປະເທດ ໃຫ້ແຂງແຮງ ແລະ ຫລາກຫລາຍຂຶ້ນຕື່ມ ເພື່ອຕອບສະໜອງຄວາມຮຽກຮ້ອງຕ້ອງການຂອງສັງຄົມ, ໄປຄຽງຄູ່ກັບການຄຸ້ມຄອງລາຍຮັບທີ່ເປັນເງິນຕາຕ່າງປະເທດ ເຂົ້າສູ່ລະບົບໃຫ້ຫລາຍຂຶ້ນ.
ສຳລັບ ວຽກງານຄຸ້ມຄອງເງິນຕາຕ່າງປະເທດ ທຫລ ໄດ້ຊຸກຍູ້ຫົວໜ່ວຍສົ່ງອອກ ແລະ ການລົງທຶນໂດຍກົງຈາກຕ່າງປະເທດ ໃຫ້ນໍາລາຍຮັບເຂົ້າມາ ສປປ ລາວ ແລະ ປະກອບສ່ວນການຂາຍເງິນ ຕາຕ່າງປະເທດເຂົ້າສູ່ລະບົບທະນາຄານ ຫລື ເພີ່ມຂຶ້ນກວ່າເກົ່າ; ຊຸກຍູ້ໃຫ້ເກັບພັນທະອາກອນທີ່ເປັນເງິນຕາຕ່າງປະເທດຈາກຫົວໜ່ວຍສົ່ງອອກ ແລະ ການລົງທຶນຈາກຕ່າງປະເທດໃຫ້ຫລຸດລົງ ແລະ ເພີ່ມຄວາມຕ້ອງການນໍາໃຊ້ເງິນກີບ ເຂົ້າໃນການຊຳລະພັນທະຢູ່ພາຍໃນໃຫ້ເພີ່ມຂຶ້ນ; ຄົ້ນຄວ້າປັບປຸງບາງເນື້ອໃນລະບຽບການທີ່ກ່ຽວຂ້ອງ ໃຫ້ສອດຄ່ອງກັບສະພາບຕົວຈິງ ແລະ ຊຸກຍູ້ໃຫ້ມີການເປີດ ຫລື ຫັນບັນ ຊີກ່ຽວກັບການນໍາເຂົ້າ-ສົ່ງອອກ ກັບທະນາຄານທຸລະກິດໃຫ້ຫລາຍຂຶ້ນ, ພ້ອມທັງ ຊຸກຍູ້ທະນາຄານທຸ ລະກິດ ທີ່ຕັ້ງຢູ່ສູນກາງ ແລະ ທ້ອງຖິ່ນ ຊ່ວຍເປັນເຈົ້າການຕິດຕາມ, ກວດກາ ບັນດາຫົວໜ່ວຍສົ່ງອອກ ແລະ ການລົງທຶນໂດຍກົງຈາກຕ່າງປະເທດ ໃຫ້ນໍາລາຍຮັບເຂົ້າມາຜ່ານລະບົບທະນາຄານ ໂດຍສະເພາະແມ່ນນໍາໃຊ້ບັນຊີເງິນຝາກ ກ່ຽວກັບຜູ້ນໍາເຂົ້າ-ສົ່ງອອກ ໃຫ້ຫລາຍຂຶ້ນ ແລະ ປະກອບສ່ວນຂາຍເງິນຕາຕ່າງປະເທດ ໃຫ້ແກ່ລະບົບທະນາຄານຕາມລະບຽບການ ໃຫ້ຫລາຍຂຶ້ນ.
ແຫຼ່ງຂ່າວ: ປະເທດລາວ