ຈາກເຫດການນໍ້າຖ້ວມທີ່ແຂວງອັດຕະປືໃນວັນທີ 23 ກໍລະກົດທີ່ຜ່ານມາ ໄດ້ສ້າງຄວາມເສຍຫາຍໃຫ້ແກ່ປະຊາຊົນໃນທ້ອງຖິ່ນເປັນຈໍານວນຫຼວງຫຼາຍ ຈົນລັດຖະບານປະກາດໃຫ້ເຫດການຄັ້ງນີ້ເປັນໄພພິບັດລະດັບຊາດ. ໃນໄລຍະແຫ່ງຄວາມທຸກຍາກລຳບາກ, ປະຊາຊົນລາວທັງປະເທດກໍໄດ້ສະແດງຄວາມມີນໍ້າໃຈເອື້ອເຟື້ອເຜື່ອແຜ່ຕໍ່ກັນດ້ວຍການບໍລິຈາກເງິນບໍ່ວ່າຈະເປັນ ການບໍລິຈາກໂດຍຜ່ານລະບົບທະນາຄານ BCEL One Heart ແລະ ການບໍລິຈາກເຄື່ອງອຸປະໂພກ-ບໍລິໂພກຜ່ານອົງການ ແລະ ກຸ່ມຊ່ວຍເຫຼືອຕ່າງໆ ເພື່ອຊ່ວຍໃຫ້ຜູ້ປະສົບໄພຜ່ານມໍລະສຸມນີ້ໄດ້. ປັດຈຸບັນ ຍອດການບໍລິຈາກເງິນຜ່ານ BCEL One Heart ແມ່ນມີກວ່າ 2.9 ຕື້ກີບ.
ນອກຈາກນໍ້າໃຈເອື້ອເຟື້ອຈາກຄົນໃນຊາດແລ້ວ, ລາວເຮົາຍັງໄດ້ຮັບການຊ່ວຍເຫຼືອຈາກຕ່າງຊາດ ເລີ່ມຕັ້ງແຕ່ມື້ເຫດການຈົນປັດຈຸບັນນີ້ມີປະເທດທີ່ຊ່ວຍເຫຼືອຄື:
ໃນວັນທີ 24 ກໍລະກົດ, ສາທາລະນະລັດ ເກົາຫຼີ (ເກົາຫຼີໃຕ້) ໄດ້ສົ່ງທີມຊ່ວຍເຫຼືອ, ເຮລີຄອບເຕີ ແລະ ເຮືອ ເພື່ອເຂົ້າຊ່ວຍຜູ້ປະສົບໄພ.
ໃນວັນທີ 25 ກໍລະກົດ, ເຈົ້າມະຫາຊີວິດຣາຊະອານາຈັກໄທ ໄດ້ມອບເງິນຊ່ວຍເຫຼືອເປັນຈໍານວນ 1 ລ້ານບາດ, ພ້ອມພຣະຣາຊະທານ ຖົງຍັງຊີບ 5000 ຖົງ, ນໍ້າດື່ມ 10,000 ຕຸກ, ຜ້າເຊັດໂຕ 2,000 ຜືນ, ເຄື່ອງກອງນໍ້າ 49 ຊຸດ, ອາຫານ ແລະ ຢາອີກຈຳນວນໜຶ່ງ. ນອກຈາກນັ້ນ, ທ່ານ ປະຢຸດ ຈັນໂອຊາ, ນາຍົກລັດຖະມົນຕີແຫ່ງຣາຊະອານາຈັກໄທ ຍັງໄດ້ມອບເງິນຊ່ວຍເຫຼືອຜ່ານສະຖານທູດລາວເປັນຈໍານວນ 5 ລ້ານບາດ ຫຼື ປະມານ 1.3 ຕື້ກີບ.
ໃນມື້ດຽວກັນ, ປະເທດຍີ່ປຸ່ນໄດ້ມອບເຄື່ອງຊ່ວຍເຫຼືອສຸກເສີນໃຫ້ແກ່ຜູ້ປະສົບໄພເຊັ່ນ: ເຕັ້ນ, ຜ້າຫົ່ມ ແລະ ອື່ນໆ ຜ່ານອົງການ JICA ລາວ. ອົງການກາແດງ ແລະ ເດືອນສ້ຽວສາກົນໄດ້ໃຫ້ຄວາມຊ່ວຍເຫຼືອທາງດ້ານສາທາລະນະສຸກໂດຍຮ່ວມມືກັນກັບອົງການກາແດງລາວ. ປະເທດສິງກະໂປໄດ້ບໍລິຈາກເງິນຊ່ວຍເຫຼືອ 100,000 ໂດລາ ພ້ອມສົ່ງທີມຊ່ວຍເຫຼືອມາສະໜັບສະໜູນອົງການກາແດງລາວ. ສປ ຈີນໄດ້ສົ່ງທີມກູ້ໄພຊ່ວຍເຫຼືອ 100 ກວ່າຄົນ.
ແລະ ຕອນນີ້ມີລາຍງານວ່າ ສສ ຫວຽດນາມກຳລັງສົ່ງປັດໄຈຊ່ວຍເຫຼືອມາທາງດ່ານຊາຍແດນສາກົນພູເກືອ ໂດຍຂະບວນທະຫານເພື່ອມອບເຄື່ອງອຸປະໂພກ-ບໍລິໂພກ, ເຄື່ອງໃຊ້ຂອງສອຍ, ອາຫານການກິນ ແລະ ຢາປົວພະຍາດ.
ເຖິງແມ່ນວ່າລາວເຮົາຈະໄດ້ຮັບຄວາມຊ່ວຍເຫຼືອຈາກຫຼາຍພາກສ່ວນທັງພາຍໃນ ແລະ ຈາກຕ່າງປະເທດ, ແຕ່ວິກິດການນໍ້າຖ້ວມຢູ່ອັດຕະປືຍັງຢູ່ໃນພາວະທີ່ໜ້າເປັນຫ່ວງຢູ່, ພວກເຮົາຫວັງຢ່າງຍິ່ງວ່າປະຊາຊົນລາວເຮົາຈະສາມາດຜ່ານວິກິດການຄັ້ງນີ້ໄປໄດ້ ແລະ ມັນຈະເປັນບົດຮຽນອັນລໍ້າຂອງຄົນລາວທັງຊາດໃຫ້ຄໍາເນິງເຖິງຄວາມໂຫດຮ້າຍຂອງໄພພິບັດທາງທຳມະຊາດຢູ່ສະເໝີ.