ເມື່ອວັນທີ 16 ມີນາ 2018 ທ່ານ ຄຣິສຕຽນ ພໍເຕີ ລັດຖະມົນຕີກະຊວງຢຸດຕິທຳຂອງອົດສະຕຣາລີ ກ່າວວ່າລັດຖະບານອົດສະຕຣາລີບໍ່ຮັບຄຳຮ້ອງຟ້ອງບໍ່ວ່າຈະເປັນຝ່າຍໃດໆກໍ່ຕາມໃນການໃຫ້ຈັບກຸມ ແລະ ດຳເນີນຄະດີທາງກົດໝາຍ ກັບ ທ່ານ ນາງ ອອງຊານ ຊູຈີ ທີ່ປຶກສາແຫ່ງລັດ ແລະ ລັດຖະມົນຕີກະຊວງການຕ່າງປະເທດຂອງມຽນມາ ທີ່ຢູ່ໃນລະຫວ່າງການເຂົ້າຮ່ວມກອງປະຊຸມສຸດຍອດອາຊຽນ – ອົດສະຕຣາລີ ສະໄໝພິເສດໃນລະຫວ່າງວັນທີ 17-18 ມີນາ 2018 ເນື່ອງຈາກທ່ານນາງ ອອງຊານ ຊູຈີ ຖືເປັນເຈົ້າໜ້າທີ່ລະດັບສູງສຸດຂອງລັດຖະບານ ທີ່ໄດ້ຮັບສິດຄຸ້ມຄອງທາງການທູດຢ່າງເຕັມຮູບແບບຕາມກົດໝາຍລະຫວ່າງປະເທດ
ການຖະແຫຼງຂ່າວດັ່ງກ່າວເກີດຂຶ້ນພາຍຫຼັງທີ່ກຸ່ມທະນາຍຄວາມ ແລະ ກຸ່ມກິດຈະກຳການເມືອງລວມຕົວກັນ 5 ຄົນ ຍື່ນຄຳຮ້ອງຕໍ່ສານໃນເມືອງ ເມວເບຣິນ ໃຫ້ມີການດຳເນີນຄະດີອາຍາກັບທ່ານ ນາງ ອອງຊານ ຊູຈີ ໃນຂໍ້ຫາອາຊະຍາກຳຕໍ່ມະນຸດຈາກສະຖານະ ການຄວາມຮຸນແຮງດ້ານສິດທິມະນຸດຕໍ່ຊາວໂຣຮິນຢາ ຕັ້ງແຕ່ທ້າຍເດືອນ ສິງຫາ 2017 ທີ່ຜ່ານມາ ແລະ ສົ່ງຜົນໃຫ້ຊາວໂຣຮິນຢາກວ່າ 650,000 ຄົນຕ້ອງອົບພະຍົບໄປບັງກະລາເທດຢ່າງບໍ່ເຕັມໃຈ