ເມື່ອວັນທີ 18 ມີນາ ເວັບໄຊສ໌ມິດເຣີ ໄດ້ລາຍງານຂ່າວທີ່ຫນ້າຕົກໃຈເປັນຢ່າງຍີ່ງວ່າ ປີເຕີ ແມັກມາຮອນຣ໌, ວິສາວະກອນກົນຈັກອົດສະຕາລີ ອາຍຸ 64 ປີ, ຜູ້ຊ່ຽວຊານທີ່ມີປະສົບການເຮັດວຽກດ້ານການຄົ້ນຫາຮ່າງເຮືອບິນມາດົນເຖີງ 25ປີ, ຢັ້ງຢືນວ່າ ພົບຮ່າງເຮືອບິນໂດຍສານໂບອີ້ງ 777 ຂອງສາຍການບິນມາເລເຊຍແອລາຍ ຖ້ຽວບິນ MH370 ທີ່ຫາຍສາບສູນໄປຢ່າງລຶກລັບ ຫລັງຈາກນຳຜູ້ໂດຍສານ ແລະ ລູກເຮືອ 239ຄົນ ບີນຈາກກົວລາລຳເປີໄປປັກກີ່ງ ຕັ້ງແຕ່ວັນທີ 8 ມີນາ 2014.
ແມັກມາຮອນຣ໌ ເປີດເຜີຍວ່າຈາກຄວາມພະຍາຍາມຄົ້ນຫາຮ່າງ MH370 ໂດຍອາໄສຂໍ້ມູນ ແລະ ພາບຖ່າຍຈາກອົງການບໍລິຫານການບິນ ແລະ ອາວະກາດແຫ່ງຊາດສະຫະລັດ(NASA) ແລະ ກູໂກລແມັບ (Google Maps) ຄົ້ນຫາ ນັບຕັ້ງແຕ່ເຮືອບິນລຳນີ້ໄດ້ຫາຍໄປເມື່ອ 4 ປີກ່ອນນັ້ນ, ຈົນໄດ້ພົບຮ່າງເຮືອບິນຕົກຢູ່ຫ່າງຈາກເກາະຣາວດ໌ (Round Island) ໄປທາງຕອນໃຕ້ປະມານ 16ກິໂລແມັດ. ເຊີ່ງເກາະຣາວດ໌ນີ້ເປັນເກາະນ້ອຍໆຂອງ ເມີຮີເຊຍສ໌, ປະເທດນອກຊາຍຝັ່ງອາຟຣິກາໃນມະຫາສະຫມຸດອິນເດຍຕາເວັນຕົກສຽງໃຕ້.
ຮູບຖ່າຍຈາກກູໂກລແມັບ (Google Maps) ທີ່ ປີເຕີ ແມັກມາຮອນຣ໌ ຢືນຢັນວ່າແມ່ນຮ່າງເຮືອບິນຂອງມາເລເຊຍແອລາຍ.
ແມັກມາຮອນຣ໌ ລະບຸວ່າມີພາບຫນື່ງທີ່ສະແດງໃຫ້ເຫັນເຖີງເຄົ້າໂຄງວ່າຫນ້າຈະເປັນຮ່າງເຮືອບິນຢູ່ພື້ນຜິວນໍ້າທະເລ ແລະ ລາວໄດ້ສົ່ງຂໍ້ມູນທີ່ພົບເຫັນນີ້ໄປຍັງສຳນັກງານຄົມມະນາຄົມ ແລະ ຄວາມປອດໄພຂອງອົດສະຕາລີແລ້ວ ເພື່ອຢືນຢັນວ່າພົບຮ່າງເຮືອບິນຂອງມາເລເຊຍແອລາຍ. ນອກຈາກນັ້ນຍັງມີຄົນອາເມລິກາ 4 ຄົນຖືກສົ່ງໂຕໄປຍັງປະເທດອົດສະຕາລີ ເພື່ອຊ່ວຍໃນການຄົ້ນຫາຮ່າງ MH370 ໃຫ້ຫມັ້ນໃຈວ່າຂໍ້ມູນທັງຫມົດກ່ຽວກັບ MH370 ລວມທັງຕຳແຫນ່ງທີ່ເຮືອບິນຕົກບໍ່ເລັດລອດອອກໄປເຖີງສາທາລະນະຊົນ ຫລື ແມ້ແຕ່ລັດຖະບານອົດສະຕາລີ, ນັ້ນເປັນເພາະຫຍັງ? ໂດຍ ແມັກມາຮອນຣ໌ແຈ້ງຕື່ມວ່າ ເຈົ້າຫນ້າທີ່ສະຫະລັດປະຕິບັດເຊັ່ນນີ້ເພາະບໍ່ຕ້ອງການໃຫ້ໃຜຮູ້ວ່າມີການພົບຮ່າງເຮືອບິນ MH370 ທີ່ມີຮ່ອງຮອຍຖືກຍິງດ້ວຍກະສຸນ.
ແຫລ່ງຂ່າວຕ່າງປະເທດ TRN