ການຕັດສິນໃຈທີ່ຈະປູກໃບຢາບໍ່ແມ່ນເລື່ອງງ່າຍສຳລັບຊາວສວນໃນລາວ. ຕົ້ນທຶນໃນການປູກໃບຢາໃນໄລຍະທຳອິດ ແມ່ນສູງກວ່າການປູກພືດຊະນິດອື່ນເຊັ່ນ: ການປູກເຂົ້າ, ສາລີ ຫຼື ພືດຕະກຸນຖົ່ວອື່ນໆ. ໃນຄວາມເປັນຈິງແລ້ວ, ຕົ້ນທຶນໃນການປູກໃບຢາແມ່ນສູງກວ່າເກືອບສອງເທົ່າເມື່ອທຽບກັບການປູກພືດຊະນິດອື່ນ. ນັ້ນເປັນສາເຫດທີ່ ບໍລິສັດຢາສູບລາວຈໍາກັດ, ຜູ້ທີ່ຮັບຊື້ໃບຢາຈາກຊາວສວນ, ໄດ້ໃຫ້ການຊ່ວຍເຫຼືອດ້ານປຸ໋ຍ ແລະ ອຸປະກອນທີ່ຈໍາເປັນຕ່າງໆ. ບໍລິສັດໄດ້ມອບໃຫ້ກ່ອນໃນລັກສະນະການໃຫ້ກູ້ຍືມ, ແລະ ຈະຫັກເອົາຄືນເມື່ອຊາວສວນນໍາໃບຢາມາຂາຍໃຫ້.
ເຖິງແມ່ນວ່າ ການປູກໃບຢາຈະມີຄ່າໃຊ້ຈ່າຍສູງ, ແຕ່ຜົນຕອບແທນກໍ່ສູງຂຶ້ນຕາມກັນ. ຊາວສວນມັກຈະໄດ້ກຳໄລເຖິງສອງເທົ່າຈາກການປູກໃບຢາ ເມື່ອທຽບກັບຜົນກຳໄລຈາກການປູກເຂົ້າ ຫຼື ໝາກແຕງ. ນີ້ເປັນສາເຫດວ່າເປັນຫຍັງຊາວສວນຫຼາຍໆຄົນໃນຈໍານວນຊາວສວນກວ່າ 1500 ຄົນ ໄດ້ປູກໃບຢາສະໜອງໃຫ້ບໍລິສັດຢາສູບລາວຈໍາກັດ ເປັນເວລາຫຼາຍກວ່າ 15 ປີແລ້ວ.
ບົດຄວາມອ້າງອີງຈາກ: ວາລະສານຈຳປາເມືອງລາວ