ກອງປະຊຸມທົບທວນຄືນການຮ່ວມມືລະຫວ່າງລັດຖະບານ ແລະ ອົງການຈັດຕັ້ງສາກົນທີ່ບໍ່ສັງກັດລັດຖະບານ ອສບລ (INGOs) ຄັ້ງທີ III ວັນທີ 28 ກຸມພາ 2018 ຢູ່ຫໍປະຊຸມແຫ່ງຊາດ ນະຄອນຫຼວງວຽງຈັນ ເປັນປະທານຂອງທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ມີຄະນະຜູ້ແທນຂັ້ນສູງຈາກຂະແໜງການ ແລະ ທ້ອງຖິ່ນ ອົງການຈັດຕັ້ງສາກົນ ສະມາຄົມ ແລະ ມູນນິທິເຂົ້າຮ່ວມ ເຊິ່ງກອງປະຊຸມມີເປົ້າໝາຍແນໃສ່ທົບທວນຄືນວຽກງານການຮ່ວມມືລະຫວ່າງລັດຖະບານ ສປປ ລາວ ກັບອົງການຈັດຕັ້ງສາກົນ ທີ່ບໍ່ສັງກັດລັດຖະບານ ນັບແຕ່ປີ 2015 ເປັນຕົ້ນມາ.
ທ່ານ ສະເຫຼີມໄຊ ກົມມະສິດ ໄດ້ເນັ້ນໃຫ້ກອງປະຊຸມຄັ້ງນີ້ແລກປ່ຽນຄຳຄິດຄຳເຫັນ ແລະ ປືກສາຫາລືກັນຢ່າງກົງໄປກົງມາ ແລະ ມີຄວາມຮັບຜິດຊອບ ແນໃສ່ຮັບປະກັນປະສິດທິພາບ ແລະ ປະສິດທິຜົນຂອງການຮ່ວມມືຊ່ວຍເຫຼືອຂອງຕ່າງປະເທດ ລວມທັງອົງການຈັດຕັ້ງສາກົນ ທີ່ບໍ່ສັງກັດລັດຖະບານ ແລະ ຄູ່ຮ່ວມພັດທະນາອື່ນໆ ໃຫ້ໄດ້ຮັບຜົນປະໂຫຍດສູງສຸດ ສອດຄ່ອງກັບລະບຽບຫຼັກການ ແລະ ແຜນພັດທະນາເສດຖະກິດ-ສັງຄົມແຫ່ງຊາດ ກໍ່ຄືແຜນພັດທະນາຂອງຂະແໜງການ ແລະ ທ້ອງຖິ່ນໃນແຕ່ລະໄລຍະ ເຊິ່ງຜ່ານມາ ສະພາບການຮ່ວມມືລະຫວ່າງລັດຖະບານກັບອົງການຈັດຕັ້ງສາກົນທີ່ບໍ່ສັງກັດລັດຖະບານ ລວມທັງການປະຕິບັດດຳລັດຂອງນາຍົກລັດຖະມົນຕີ ວ່າດ້ວຍອົງການຈັດຕັ້ງສາກົນທີ່ບໍ່ສັງກັດລັດຖະບານ ແລະ ຂໍ້ແນະນຳການຈັດຕັ້ງປະຕິບັດດຳລັດດັ່ງກ່າວຂອງລັດຖະມົນຕີກະຊວງການຕ່າງປະເທດ ນອກຈາກນັ້ນ ກໍ່ໄດ້ພ້ອມກັນພິຈາລະນາປະກອບຄຳເຫັນໃສ່ຮ່າງຂໍ້ຕົກລົງຂອງລັດຖະມົນຕີກະຊວງການຕ່າງປະເທດ ວ່າດ້ວຍລະບຽບການອະນຸມັດຮັບເອົາທຶນຊັບສິນ ແລະ ຊ່ຽວຊານຈາກຕ່າງປະເທດ ໃຫ້ແກ່ສະມາຄົມ ແລະ ມູນນິທິຂອງລາວ.
ສຳລັບການຊ່ວຍເຫຼືອໃນໄລຍະປີ 2015 ຮອດປັດຈຸບັນ ໄດ້ມີການອະນຸມັດ 313 ໂຄງການ ແລະ 44 ກິດຈະກຳ ລວມມູນຄ່າທັງໝົດ 376.211.948 ໂດລາສະຫະລັດ ໂດຍກວມເອົາຫຼາຍຂະແໜງການ ເຊັ່ນ: ຂະແໜງສະຫວັດດີການ-ສັງຄົມ ກວມເອົາປະມານ 33% (ພັດທະນາຊົນນະບົດ ເກັບກູ້ລະເບີດ ຄົນພິການ ແລະ ໄພສຸກເສີນ) ສຶກສາທິການ ແລະ ກີລາ ກວມເອົາປະມານ 25% ສາທາລະນະສຸກ ກວມເອົາປະມານ 24% ແລະ ຂົງເຂດກະສິກຳ ກວມເອົາປະມານ 17% ໃນປັດຈຸບັນ ມີທັງໝົດ 159 ອົງການ INGOs ທີ່ໄດ້ຮັບອະນຸມັດມາປະຕິບັດງານຢູ່ ສປປ ລາວ ແລະ ພວມຈັດຕັ້ງປະຕິບັດໂຄງການຢູ່ໃນທົ່ວປະເທດ.
ແຫລ່ງຂ່າວ: ໜັງສືພິມ ວຽງຈັນໃໝ່