ກົມອຸຕຸນິຍົມແລະອຸທົກກະສາດ ກະຊວງຊັບພະຍາກອນທຳມະຊາດແລະສິ່ງແວດລ້ອມ ອອກແຈ້ງເຕືອນໃຫ້ລະວັງ ລົມພັດແຮງ, ຝົນຕົກ, ຟ້າເຫຼື້ອມ ແລະໝາກເຫັບ ໃນລະຫວ່າງວັນທີ 6-9 ມີນາ 2018 ນີ້.
ເນື່ອງຈາກຄວາມກົດດັນສູງຂອງອາກາດເຢັນ ຈາກປະເທດຈີນຈະມີກຳລັງປານກາງແຜ່ລົງມາປົກຄຸມພາກເໜືອຂອງປະເທດລາວອີກຄັ້ງໃໝ່ ສົມທົບກັບກະແລລົມຕາເວັນຕົກພັດປົກຄຸມພາກເໜືອ ແລະກະແສລົມຕາເວັນອອກສ່ຽງໃຕ້ພັດປົກຄຸມພາກກາງຫາພາກໃຕ້ ໃນໄລຍະວັນທີ 6-9 ມີນາ 2018 ນີ້ ເຊິ່ງຈະເຮັດໃຫ້ເກີດມີລົມພັດແຮງ, ຝົນຕົກ, ຟ້າຮ້ອງ, ຟ້າເຫຼື້ອມ ແລະໝາກເຫັບຕົກຢູ່ໃນແຕ່ລະພາກ.
ດັ່ງນັ້ນ, ຈຶ່ງແຈ້ງເຕືອນເຖິງອຳນາດການປົກຄອງທຸກພາກສ່ວນ ແລະປະຊາຊົນບັນດາເຜົ່າ ຈົ່ງມີສະຕິລະມັດລະວັງ ແລະຢູ່ຫ່າງໄກຈາກຕົ້ນໄມ້ໃຫຍ່, ອາຄານຫຼືສິ່ງປຸກສ້າງທີ່ບໍ່ໄດ້ມາຕະຖານ ພ້ອມທັງຕິດຕາມຂ່າວພະຍາກອນອາກາດ ແລະນໍ້າ ຈາກກົມອຸຕຸນິຍົມແລະອຸທຸກກະສາດຢ່າງໃກ້ຊິດ.
