ໜີ້ສິນຄ່າກະແສໄຟຟ້າ ຍັງກາຍເປັນບັນຫາທີ່ສືບຕໍ່ ເຮັດໃຫ້ລັດວິສາຫະກິດໄຟຟ້າລາວທີ່ສາຂາຈຳປາສັກ ຕ້ອງ
ເຈັບຫົວຕໍ່ໄປ ຫຼັງປະຈຸບັນຍອດເພີ່ມຂຶ້ນສູງເກືອບ 50 ຕື້ກີບ ໂດຍສ່ວນໃຫຍ່ແມ່ນໜີ້ຂອງຫ້ອງການຕ່າງໆຂອງ
ພາກລັດ; ໃນຂະນະທີ່ຫົວໜ້າແຜນການຢ້ຳ ຫາກລັດອະນຸມັດງົບປະມານຄ່າໄຟຟ້າໃຫ້ແລ້ວ ຄວນຜ່ານລັດວິສາ
ຫະກິດໄຟຟ້າລາວໂດຍກົງ.
ທ່ານ ພູທົງ ຫຼວງໄຊຍະລາດ ຫົວໜ້າແຜນການຂອງລັດວິສາຫະກິດໄຟຟ້າລາວສາຂາຈຳປາສັກ, ໄດ້ເປີດເຜີຍ
ຕໍ່ນັກຂ່າວໜັງສືພິມເສດຖະກິດ – ສັງຄົມປະຈຳແຂວງ ເມື່ອບໍ່ດົນມານີ້ວ່າ: ບັນຫາການຕິດໜີ້ສິນຄ່າກະແສໄຟ
ຟ້າຂອງລູກຄ້າຢູ່ແຂວງຈຳປາສັກ ແມ່ນຍັງມີທ່າອຽງສູງຂຶ້ນ ຊຶ່ງມັນໄດ້ກາຍເປັນບັນຫາທີ່ແກ່ຍາວ ແລະ ຍັງບໍ່ທັນ
ສາມາດແກ້ໄຂໄດ້, ເນື່ອງຈາກສ່ວນໃຫຍ່ແມ່ນໜີ້ຂອງບັນດາຫ້ອງການຕ່າງໆຈາກພາກລັດ ເຮັດໃຫ້ລັດວິສາຫະ
ກິດໄຟຟ້າລາວສາຂາຈຳປາສັກ ມີໜີ້ສິນຮອດທ້າຍເດືອນມິຖຸນາ 2014 ສູງເຖິງ 47 ຕື້ກວ່າກີບ, ໃນນັ້ນ ໜີ້ຂອງ
ຫ້ອງການຕ່າງໆຂອງລັດຖະບານ 32 ຕື້ກວ່າກີບ, ຮອງລົງມາແມ່ນອຸດສາຫະກຳ 5 ຕື້ກວ່າກີບ ແລະ ກະສີກຳ 4 ຕື້
ກວ່າກີບ.
ບັນຫາດັ່ງກ່າວໄດ້ສົ່ງຜົນກະທົບໂດຍກົງ ຕໍ່ລັດວິສາຫະກິດໄຟຟ້າ, ໂດຍສະເພາະແມ່ນເຮັດໃຫ້ແຜນການເກັບລາຍ
ຮັບບໍ່ໄດ້ຕາມແຜນການທີ່ວາງໄວ້, ຄືໃນ 6 ເດືອນຕົ້ນປີ ສາຂາຈຳປາສັກ ໄດ້ພິມບິນອອກທັງໝົດມີມູນຄ່າ 87 ຕື້
ກີບ, ປະຕິບັດຕົວຈິງໄດ້ພຽງແຕ່ 80 ຕື້ກີບ, ສາເຫດທີ່ບໍ່ໄດ້ຕາມແຜນເນື່ອງມາຈາກຫ້ອງການຕ່າງໆຈາກພາກລັດ
ຖະບານ ແມ່ນມີຄວາມຈຳເປັນຕ້ອງການຊົມໃຊ້ໄຟຟ້າສູງ ແຕ່ຜັດມີງົບປະມານຈຳກັດໃນການຊຳລະ, ຖ້າມີບາງ
ຫ້ອງການກໍໄປໝຸນໃຊ້ໃສ່ວຽກອັນໃໝ່ທີ່ມີຄວາມຈຳເປັນກວ່າ.
ຢ່າງໃດກໍຕາມ ທ່ານ ພູທົງ ຫຼວງໄຊຍະລາດ ຢ້ຳວ່າມັນເຖິງເວລາແລ້ວທີ່ຈະຕ້ອງໄດ້ຊ່ວຍກັນແກ້ໄຂ, ໂດຍສະເພາະ
ແມ່ນພາກສ່ວນຫ້ອງການຕ່າງໆຂອງພາກລັດ ຕ້ອງໄດ້ຄຳນຶງເຖິງຄວາມຈຳເປັນໃນການຊົມໃຊ້ໄຟຟ້າໃຊ້ແນວໃດ
ໃຫ້ເກີດຜົນປະໂຫຍດ ຕໍ່ຫ້ອງການກໍຄືສ່ວນລວມ, ເປັນຕົ້ນແມ່ນການນຳໃຊ້ອຸປະກອນໄຟຟ້າຕ້ອງປິດທຸກເທື່ອເວ
ລາເລີກການ, ບໍ່ສົມຄວນທີ່ສຸດການເປີດແອ ຫຼື ພັດລົມປະໄວ້ໃນເວລາພັກທ່ຽງເພາະ ມັນເປັນການສູນເສຍລ້າບໍ່ໄດ້
ຜົນປະໂຫຍດ, ທີ່ສຳຄັນທີ່ສຸດເມື່ອລັດອະນຸມັດງົບປະມານຄ່າໄຟຟ້າແລ້ວ ສົມຄວນຕ້ອງຜ່ານລັດວິສາຫະກິດໄຟຟ້າ
ລາວໂດຍກົງໃນການຊຳລະສະສາງ, ເພື່ອປ້ອງກັນການນຳໃຊ້ເງິນໄປໝຸນໃຊ້ແນວໃໝ່.
ສຳລັບວຽກງານການສະໜອງໄຟຟ້າຂອງລັດວິສາຫະກິດໄຟຟ້າສາຂາຈຳປາ ສັກ ປະຈຸບັນແມ່ນໄດ້ແລ້ວທັງໝົດ
603ບ້ານ, ເທົ່າກັບ 93% ຂອງ ຄົວເຮືອນທັງໝົດ ຊຶ່ງປະຕິບັດໄດ້ເກີນແຜນຂອງລັດຖະບານ ແລະ ຄາດວ່າ ຮອດປີ
2015 ຈະສາມາດຕອບສະໜອງໄຟຟ້າໃຫ້ປະຊາຊົນໄດ້ໂດຍພື້ນຖານ.
ແຫຼ່ງຂ່າວ: ເສດຖະກິດ – ສັງຄົມ