10 ເດືອນຂອງສົກງົບປະມານນີ້ ເຈົ້າໜ້າທີ່ກ່ຽວຂ້ອງສາມາດກວດກາລົດໄດ້ 8 ພັນກວ່າຄັນ ໃນນັ້ນລົດບັນທຸກນ້ຳ
ໜັກເກີນມີກວ່າ 2 ພັນຄັນ ອັນເປັນສາເຫດໜື່ງເຮັດໃຫ້ທາງຫຼາຍເສັ້ນໄດ້ຮັບຄວາມເປ່ເພໄວກວ່າເວລາອັນຄວນ.
ເມື່ອບໍ່ດົນມານີ້ປະຊາຊົນຢູ່ບ້ານໜອງທາ ເມືອງຈັນທະບູລີ ນະຄອນຫຼວງວຽງຈັນ ສະເໜີຕໍ່ກອງປະຊຸມສະພາກ່ຽວ
ກັບການກວດກາລົດ 1% ບໍ່ທັນລະອຽດ ຍັງມີຊ່ອງວ່າງ ແລະ ການຊັ່ງນ້ຳໜັກລົດມີການຕໍ່ລອງຈ່າຍສິນບົນໃຫ້ເຈົ້າ
ໜ້າທີ່ ຕໍ່ບັນຫານີ້ ທ່ານ ນາງ ວິໄລຄຳ ໂພສາລາດ ລັດຖະມົນຕີຊ່ວຍວ່າການກະຊວງໂຍທາທິການ ແລະ ຂົນສົ່ງຊີ້
ແຈງວ່າ: ເລື່ອງການກວດກາ ແລະ ຄຸ້ມຄອງລົດປ້າຍ 1% ນັ້ນ ພະແນກໂຍທາທິການ ແລະ ຂົນສົ່ງໄດ້ປຶກສາຫາລືນຳ
ພາກສ່ວນກ່ຽວຂ້ອງ ແລະ ໄດ້ນຳສະເໜີໃຫ້ຂັ້ນເທິງເພື່ອຫາວິທີແກ້ໄຂ.
ສ່ວນເລື່ອງມີການຕໍ່ລອງລາຄາປັບໃໝນັ້ນ ທາງຜູ້ປະກອບການຂົນສົ່ງ ແມ່ນມີການໄດ້ຕໍ່ລອງກັບພະນັກງານແທ້
ເພາະວ່າອັດຕາການປັບໃໝເຫັນວ່າສູງຫຼາຍເກີນຄວນ ຈິ່ງບໍ່ສາມາດປະຕິບັດໄດ້ ສ່ວນວ່າພະນັກງານຮັບສິນບົນ
ນັ້ນ ທາງພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ໄດ້ຕິດຕາມກວດກາພະນັກງານຢ່າງເຂັ້ມງວດ
ແລະ ກວດກາຢ່າງຕໍ່ເນື່ອງໃນໄລຍະຜ່ານມາ ຍັງບໍ່ທັນມີພາກສ່ວນໃດສົ່ງຂ່າວມາຫາທາງພະແນກ ຍທຂ ຂອງພວກ
ເຮົາເທື່ອ.
ທ່ານ ນາງ ວິໄລຄຳ ໂພສາລາດ ຊີ້ແຈງຕື່ມວ່າ: ໃນ 10 ເດືອນຂອງງົບປະມານສົກປີ 2013- 2014 ສາມາດກວດກາຕິດ
ຊັ່ງລົດບັນທຸກໜັກໄດ້ທັງໝົດ 8.524 ຄັນ ໃນນັ້ນມີລົດນ້ຳໜັກບໍ່ເກີນ 5.921 ຄັນ ແລະ ມີລົດບັນທຸກໜັກເກີນ
2.603 ຄັນ ເທົ່າກັບ 30,5% ຂອງລົດທີໄດ້ຜ່ານການກວດກາ ແລະ ໄດ້ປັບໃໝຕໍ່ຜູ້ລະເມີດບັນທຸກນ້ຳໜັກເກີນໄດ້
ເງິນເຂົ້າກອງທຶນບູລະນະຮັກສາທາງຫຼວງຈຳນວນ 760 ກວ່າລ້ານກີບ ທຽບໃສ່ຕົວເລກແຜນການປະຕິບັດໄດ້
128,95%.
ແຫຼ່ງຂ່າວ: ເສດຖະກິດ – ສັງຄົມ