ຫົວຫນ້າແນວຮ່ວມປົດແອກອິດສະລາມໂມໂຣ (MILF), ມູຣັດ ອັບບຣາຮິມ ທີ່ລົງນາມສັນຕິພາບກັບລັດຖະບານຟີລິບປິນກ່າວ ກັບຜູ້ສື່ຂ່າວວ່າ ກຸ່ມຂອງເຂົາກຳລັງຕໍ່ສູ້ກັບກຸ່ມໄອຊິສ ທີ່ແຊກແຊງຕາມໂຮງຮຽນສອນສາສະຫນາ ແລະມະຫາວິທະຍາໄລ ຫວັງໄດ້ການສະຫນັບສະຫນູນຈາກຄົນຫນຸ່ມສາວຊາວມຸດສະລິມ ຂະນະທີ່ໄອຊິສຈາກມາເລເຊຍ ແລະອິນໂດເນເຊຍກຳລັງຫາທາງເລັດລອດເຂົ້າມາໃນພື້ນທີ່ທາງຕອນໃຕ້ຂອງປະເທດ. ສະຖານະການໃນເມືອງວາຣາວີເທີງເກາະມິນດາເນົາຍັງຄົງມີທ່າທີໃຫ້ເກີດການຍຶດເມືອງອີກຄັ້ງ ຫລັງຈາກທີ່ເຄີຍຖືກຍຶດມາກ່ອນແລ້ວເປັນເວລາ 5 ເດືອນ.
ໄອຊິສ ຫາທາງເຂົ້າມາແຊກຊືມໃນຟີລິບປິນເພາະເສຍພື້ນທີ່ຍຶດຄອງໃນພາກຕາເວັນອອກກາງ ຈື່ງຕ້ອງຫາທີ່ຫມັ້ນແຫ່ງໃຫມ່, ກຸ່ມທີ່ເຄີຍຍຶດເມືອງມາຣາວີ ມີກຳລັງລະດົມຄົນຄັ້ງໃຫມ່ ເພາະໄດ້ກວດເອົາອາວຸດ, ເຄື່ອງກັນກະສຸນ, ເງີນສົດ ແລະຂອງມີຄ່າໄປກ່ອນທີ່ກອງທັບລັດຖະບານຈະຍຶດເມືອງຄືນ. ໃນມື້ນີ້ ວັນທີ 22/2/2018 ຕຳຫລວດປາບປາມການກໍ່ການຮ້າຍຂອງມາເລເຊຍສາມາດຈັບກຸ່ມຜູ້ຕ້ອງສົງໄສໄດ້ 10 ຄົນ ໃນຂະນະທີ່ລັກລອບສົ່ງຄົນຈາກລັດຊາບາດ, ເກາະບໍນຽວ ເຂົ້າໄປທາງຕອນໃຕ້ຂອງຟີລິບປິນ ເພື່ອເຂົ້າຮ່ວມກັບກຸ່ມໄອຊິສ.
ຕຳຫລວດມາເລເຊຍຖະແຫລງການວ່າ ຜູ້ຕ້ອງສົງໄສເປັນຊາຍ 9 ຄົນ, ຍິງ 1 ຄົນ. ຊັນຊາດ ມາເລເຊຍ 3 ແລະຟີລິບປິນ 7 ຄົນ. ໃນກຸ່ມອາບູໄຊຢາຟທີ່ກຸ່ມໄອຊິສກຳລັງຫາທາງຕັ້ງກຸ່ມໃນລັດຊາບາດ ເພື່ອເປັນຖານໃນການລອບສົ່ງນັກຮົບໄອຊິສຈາກທົ່ວພູມິພາກເຂົ້າໄປຮັບການຝຶກທີ່ພາກໃຕ້ຂອງປະເທດຟີລິບປິນ ແລະເປັນຖານໃນການກໍ່ເຫດຢູ່ລັດຊາບາດໃນອະນາຄົດ.
ແຫລ່ງຂ່າວມາເລເຊຍເຜີຍວ່າຫນື່ງໃນຜູ້ຕ້ອງສົງໄສເປັນມືຂວາຂອງ ຟູຣຸຈິ ອິນດາມາ ທີ່ຂື້ນເປັນຫົວຫນ້າກຸ່ມຍ່ອຍຂອງອາບູໄຊຢາຟ, ເທີງເກາະບາລິສັນ ທາງຕອນໃຕ້ຂອງຟີລິບປິນ ແທນ ອີສນີລອນ ຮາປີລອນ ຫົວຫນ້າກຸຸ່ມໄອຊິສເອເຊຍຕາເວັນອອກສຽງໃຕ້ ທີ່ເປັນແກນນຳຍຶດເມືອງມາຣາວີຂອງຟີລິບປິນ ທີ່ຖີກທະຫານປົດຊີວິດ.
ແຫລ່ງຂ່າວຕ່າງປະເທດ TNA