ອົງການອະນາໄມໂລກເປີດເຜີຍ ທຸກໆ 40 ວິນາທີ ຈະມີຄົນຂ້າໂຕຕາຍ 1 ຄົນ ສະເລ່ຍປີລະກ່ວາ 800,000 ຄົນ
ພ້ອມເນັ້ນຢ້ຳ ເປັນປັນຫາໃຫຍ່ດ້ານສາທາລະນະສຸກ.
ສຳນັກຂ່າວຕ່າງປະເທດລາຍງານ ໃນວັນທີ 5 ກັນຍານີ້ວ່າ ອົງການອະນາໄມໂລກ (WHO) ເປີດເຜີຍລາຍງານ
ຜົນຂອງການວິໄຈໂດຍພົບວ່າ ທຸກໆ 40 ວິນາທີ ຈະມີມະນຸດ 1 ຄົນ ເສຍຊີວິດຈາກການຂ້າໂຕຕາຍ ໂດຍຊີ້ໃຫ້
ເຫັນເປັນປັນຫາດ້ານສາທາລະນະສຸກຂະໜາດໃຫຍ່ ທີ່ບົ່ມຊ້ອນມາດົນນານ ໂດຍ WHO ຕ້ອງການຫຼຸດອັດຕາ
ການຂ້າໂຕຕາຍລົງ 10% ພາຍໃນປີ 2020, ແຕ່ມີພຽງ 28 ປະເທດເທົ່ານັ້ນ ທີ່ມີການວາງແຜນຍຸດທະສາດເພື່ອ
ປ້ອງກັນຄົນຂ້າໂຕຕາຍໂດຍສະເພາະ.
WHO ລະບຸວ່າ ຈາກການວິເຄາະການວິໄຈ ແລະ ຂໍ້ມູນເລື່ອງການຂ້າໂຕຕາຍທົ່ວໂລກ ຕະຫຼອດ 10 ປີມານີ້ ພົບ
ວ່າ ໃນແຕ່ລະປີຈະມີຄົນຂ້າໂຕຕາຍປະມານ 800,000 ຄົນ ເປັນສາເຫດການເສຍຊີວິດສູງສຸດອັນດັບທີ 2 ຂອງ
ຄົນໜຸ່ມທີ່ມີອາຍຸລະຫວ່າງ 15 – 29 ປີ, ຜູ້ທີ່ມີອາຍຸເກີນ 70 ປີ ມີແນວໂນ້ມຂ້າໂຕຕາຍສູງທີ່ສຸດ ແລະ 3/4 ຂອງ
ຜູ້ຂ້າໂຕຕາຍ ແມ່ນຢູ່ໃນປະເທດທີ່ມີລາຍໄດ້ຕ່ຳ ຫຼື ລາຍໄດ້ປານກາງ, ສ່ວນປະເທດທີ່ຮັ່ງມີ ອັດຕາການຂ້າໂຕ
ຕາຍຂອງຜູ້ຊາຍຈະສູງກ່ວາຜູ້ຍິງ 3 ເທົ່າ.
WHO ລະບຸວ່າ ການຈຳກັດການເຂົ້າເຖິງອາວຸດປືນ ແລະ ສານເຄມີເປັນພິດ ແມ່ນມີສ່ວນຫຼຸດຜ່ອນອັດຕາການ
ຂ້າໂຕຕາຍ ແລະ ການປະກາດແຜນຍຸດທະສາດແຫ່ງຊາດ ເພື່ອຫຼຸດຜ່ອນການຂ້າໂຕຕາຍ ກໍສາມາດຫຼຸດຜ່ອນ
ໄດ້ເຊັ່ນດຽວກັນ.