ກອງກຳລັງລັດຖະບານຊີຣີ ເປີດສາກໂຈມຕີທາງອາກາດຖະລົ່ມເຂດກູຕາ ຕາເວັນອອກ ເຂດທີ່ຫມັ້ນສຸດທ້າຍຂອງກຸ່ມກະບົດໃກ້ເມືອງດາມັສກັສຢ່າງຫນັກ ຖືວ່າເປັນການໂຈມຕີຄັ້ງຮຸນແຮງທີ່ສຸດໃນຮອບຫລາຍປີ ແລະ ເຮັດໃຫ້ມີພົນລະເຮືອນເສຍຊີວິດແລ້ວຢາງຫນ້ອຍ 94 ຄົນ ແລະ ບາດເຈັບ 300ກວ່າຄົນ.
ອົງກອນສັງເກດການເພື່ອສິດທິມະນຸດຊີຣີ (SOHR) ເປັນຜູ້ລາຍງານຍອດຜູ້ເສຍຊີວິດດັ່ງກ່າວ ແຕ່ຍັງຄົງບໍ່ມີການຢືນຢັນຕົວເລກຜູ້ເສຍຊີວິດເປັນທາງການ ຫລາຍຝ່າຍຄາດການວ່າກອງກຳລັງລັດຖະບານຊີຣີເປີດສາກໂຈມຕີທາງອາກາດໃນຄັ້ງນີ້ ເພື່ອເປີດທາງໃຫ້ກອງກຳລັງພາກພື້ນດິນບຸກເຂົ້າໄປໃນເຂດກູຕາ ຕາເວັນອອກ. ໃນເຂດນີ້ມີພົນລະເຮືອນອາໄສຢູ່ຈຳນວນ 400,000 ຄົນ, ບໍລິເວນນີ້ແມ່ນຖືກລັດຖະບານຊີຣີປິດລ້ອມມາຕັ້ງແຕ່ປີ 2013 ເຮັດໃຫ້ຊີວິດການເປັນຢູ່ຂອງປະຊາຊົນຕົກຢູ່ໃນສະພາບຂາດແຄນຢ່າງຫນັກ ທັງອາຫານ, ນໍ້າດື່ມ, ເຊື້ອເພີງ, ຢາປົວພະຍາດ ແລະ ສີ່ງຈຳເປັນຕ່າງໆ. ເຈົ້າຫນ້າທີ່ຜູ້ຫນື່ງຂອງສະຫະປະຊາຊາດໄດ້ຮ້ອງຂໍໃຫ້ມີການຢຸດຍີງ ເພາະສະຖານະການແມ່ນຮ້າຍແຮງຫລາຍ ພົນລະເຮືອນຜູ້ບໍລິສຸດຕ້ອງມາເສຍຊີວິດ ແລະ ໄດ້ຮັບຄວາມເດືອດຮ້ອນຢ່າງຫນັກຈາກເຫດການນີ້.
ແຕ່ທາງດ້ານລັດຖະມົນຕີຕ່າງປະເທດຂອງລັດເຊຍ, ເຊີເກ ລາຟຣອຟ ກ່າວປະຕິເສດຕໍ່ລາຍງານຂ່າວດັ່ງກ່າວວ່າ ສະພາບການເປັນຢູ່ຂອງປະຊາຊົນໃນເຂດກູຕາ ຕາເວັນອອກ ແລະ ເມືອງອິດຣິບ ຂອງຊີຣີ ບໍ່ໄດ້ຂາດແຄນດັ່ງທີ່ສະຫະປະຊາຊາດກ່າວໄວ້ແຕ່ຢ່າງໃດ.
ແຫລ່ງຂ່າວຕ່າງປະເທດ BBC