ຢາເສບຕິດເປັນພິດຮ້າຍ ເປັນອັນຕະລາຍຕໍ່ຊີວິດ ຊັບສິນ ແລະອະນາຄົດຂອງຊາດ. ດັ່ງນັ້ນ, ບັນຫາຢາເສບຕິດຈຶ່ງຖືກເອົາໃຈໃສ່ແກ້ໄຂທຸກວິທີທາງ ທັງການປາບປາມແລະການປິ່ນປົວຄົນທີ່ຕິດຢາເສບຕິດ ແລະຖືວ່າຄົນທີ່ຕິດຢາເສບຕິດເປັນຄົນເຈັບປະເພດໜຶ່ງ ດັ່ງນັ້ນ, ຄະນະກຳມະການຕ້ານແລະສະກັດກັ້ນຢາເສບຕິດ ໂດຍໄດ້ຮັບການສະໜັບສະໜຸນຈາກອົງການສາກົນຈຳນວນໜຶ່ງ ໄດ້ສ້າງຕັ້ງສູນໃຫ້ຄຳປຶກສາແລະປິ່ນປົວຜູ້ຕິດຢາເສບຕິດຂຶ້ນທຸກໂຮງໝໍເມືອງ ໃນນະຄອນຫຼວງວຽງຈັນ, ສ່ວນຢູ່ຕ່າງແຂວງມີຢູ່ໂຮງໝໍເມືອງຄຳເກີດແລະໂຮງໝໍເມືອງທ່າພະຍາດ ແຂວງບໍລິຄຳໄຊ, ໂຮງໝໍເມືອງໂພນໂຮງ ແຂວງວຽງຈັນ ເປັນຕົ້ນ.
ການໃຫ້ຄຳປຶກສາແລະປິ່ນປົວຈະຖືກປິດເປັນຄວາມລັບ ການປິ່ນປົວແມ່ນບໍ່ມີຄ່າໃຊ້ຈ່າຍ ມີພຽງຄ່າທຳນຽມເລັກນ້ອຍທໍ່ນັ້ນ. ຈຶ່ງເປັນເລື່ອງທີ່ດີຂອງສັງຄົມ ກໍຄືຜູ້ຕິດຢາເສບຕິດ ທີ່ຕ້ອງການເລີກຢາເສບຕິດ ເຊິ່ງສາມາດໄປຕິດຕໍ່ພົວພັນກັບໂຮງໝໍເມືອງທີ່ຕົນເອງຢູ່ໄດ້ ໂດຍບໍ່ຕ້ອງກັງວົນຫຼືຢ້ານໃຜຮູ້ ເພາະຂໍ້ມູນທັງໝົດຈະຖືກປິດເປັນຄວາມລັບ.
ແຫຼ່ງຂ່າວ: ເວັບໄຊລາວເຊວ