ເປົ້າຫມາຍໃຫມ່ຝູງບິນເຮືອຮົບສະຫະລັດຖີ້ມລະເບີດໃສ່ອາຟະການິດສະຖານກາຍເປັນດິນແດນປະຕິບັດການແຫ່ງການໂຈມຕີທາງອາກາດຫລັກແຫ່ງໃຫມ່ ຂອງກອງທັບອາກາດສະຫະລັດ ຫລັງການຫຼຸດກຳລັງທາງການທະຫານໃນຊິຣີ ແລະ ອີລັກ ຈາກການເປີດເຜີຍຂອງຜູ້ບັນຊາການທະຫານລະດັບສູງຂອງກອງທັບອາກາດສະຫະລັດ.
ສຳນັກຂ່າວ AFP ລາຍງານຈາກນະຄອນວໍຊິງຕັນ, ປະເທດສະຫະລັດອາເມຣິກາ ວັນທີ 8 ກຸມພາ ວ່າ ພົນເອກ ເຈມສ໌ ບີ ເຮກເກີ, ນາຍທະຫານກອງທັບອາກາດສະຫະລັດ ແລະ ຜູ້ບັນຊາການກອງບິນຍຸດທະການອົງການນາໂຕໃນອາຟະການິດສະຖານ ເຜີຍວ່າ ອາຟະການິດສະຖານ ໄດ້ກາຍເປັນສະມໍລະພູມຫລັກໃນການໂຈມຕີທາງອາກາດ ຂອງສູນບັນຊາການກາງກອງທັບສະຫະລັດ (ເຊນຄອຟ) ທີ່ປະຕິບັດການທົ່ວພູມິພາກຕາເວັນອອກກາງ. ປະຕິບັດການເລີ່ມຕົ້ນຢ່າງເປັນທາງການຕັ້ງແຕ່ວັນທີ 1 ກຸມພາ 2018.
ເຊນຄອຟປະກາດເມື່ອວັນອັງຄານທີ 6 ກຸມພາ 2018 ວ່າຝູງບິນຮົບໃນສັງກັດເປີດສາກໂຈມຕີທາງອາກາດຄັ້ງໃຫມ່ ຕໍ່ເປົ້າໝາຍກໍຄືນັກຮົບຕາລີບັນ ທາງພາກເຫນືອຂອງອາຟະການິດສະຖານ, ສ່ວນຫນື່ງຂອງການໂຈມຕີດຳເນີນການໂດຍເຄື່ອງບິນຖີ້ມລະເບີດ ບີ-52 ສະຕາໂຕຟອຣເຕສ ຂອງກອງທັບອາກາດສະຫະລັດ ຊື່ງຖີ້ມລະເບີດມາແລ້ວ 24 ລູກ, ລະເບີດດັ່ງກ່າວສາມາດທຳລາຍຖານຝຶກຕາລີບັນ ໃນແຂວງ ບາດັດສ໌ຊານ, ແຮງລະເບີດທຳລາຍຍານພາຫະນະຫລາຍຄັນທີ່ຕາລີບັນຍຶດໄປຈາກທະຫານກອງທັບອາຟະການິດສະຖານ ແລະ ນຳໄປດັດແປງເປັນຍານພາຫະນະລະເບີດ.
ປະທານປະເທດ ໂດນອລ ທັມ ເຜີຍແຜນຍຸດທະສາດໃຫມ່ໃນ ອາຟະການິດສະຖານ ປະກາດຈະສົ່ງກຳລັງທະຫານໄປເສີມ ຈາກທີ່ມີຢູ່ແລ້ວ 11,000 ນາຍທະຫານ ເພື່ອຝຶກສອນ ແລະ ໃຫ້ຄຳແນະນຳແກ່ກອງກຳລັງຄວາມຫມັ້ນຄົງ ອາຟະການິດສະຖານ ນັບຈາກນັ້ນສະຫະລັດໄດ້ສົ່ງເຄື່ອງບິນຮຸ່ນໃຫມ່ໄປໃຫ້ກອງທັບຄາບູລ.
ພົນເອກ ເຈມສ໌ ບີ ເຮກເກີເປີດເຜີຍວ່າ ເຄື່ອງບິນຂອງກອງກຳລັງພັນທະມິດໃນອາຟະການິດສະຖານ ອອກປະຕິບັດການໂຈມຕີໂດຍສະເລ່ຍອາທິດລະ 25 ຄັ້ງ ໃນປີ 2017 ສ່ວນນັກບິນອາຟະການິດສະຖານອອກປະຕິບັດການໂຈມຕີທາງອາກາດອາທິດລະ 40ຄັ້ງ.
ແຫລ່ງຂ່າວຕ່າງປະເທດ DLN