ສຳນັກງານປ້ອງກັນແລະປາບປາມການຟອກເງິນ ຂອງໄທໄດ້ແຈ້ງຄວາມກັບກອງບັນຊາການຕຳຫຼວດຈັງຫວັດໜອງຄາຍ ຮ້ອງທຸກກ່າວໂທດສອງອ້າຍນ້ອງຊາວລາວ ທີ່ຂົນເງິນ 98 ລ້ານບາດ ກຽມຂ້າມມາຍັງປະເທດລາວ ເມື່ອທ້າຍປີ 2017 ຫຼັງສອບສວນພົບວ່າເຂົ້າຂ່າຍກະທຳຜິດຖານຟອກເງິນ ເປັນຄະດີອາຍາທີ່ຍອມຄວາມບໍ່ໄດ້ ສ່ຽງຕິດຄຸກ 1-10 ປີ.
ເມື່ອວັນທີ 6 ກຸມພາ 2018 ເຈົ້າໜ້າທີ່ ສຳນັກງານປ້ອງກັນແລະປາບປາມການຟອກເງິນ ຫຼື ປປງ ຂອງໄທ ໄດ້ເຂົ້າແຈ້ງຄວາມຕໍ່ເຈົ້າໜ້າທີ່ຕຳຫຼວດຈັງຫວັດໜອງຄາຍ ຮ້ອງທຸກກ່າວໂທດໃຫ້ດຳເນີນຄະດີກັບ ທ້າວ ສຸບັນ ເຕ້ຍສິລິ ແລະ ທ້າວ ຄຳບອນ ເຕ້ຍສິລິ ສອງອ້າຍນ້ອງລາວທີ່ຊຸກເຊື່ອງເງິນຈຳນວນ 98 ລ້ານບາດໄວ້ໃນລົດ ແລະກຽມເອົາອອກຈາກປະເທດໄທ ເຂົ້າມາຍັງປະເທດລາວ ທາງດ່ານຊາຍແດນຂົວມິດຕະພາບລາວ-ໄທ (ວຽງຈັນ-ໜອງຄາຍ) ແລ້ວຖືກເຈົ້າໜ້າທີ່ດ່ານພາສີຝັ່ງໜອງຄາຍຈັບໄດ້ ເມື່ອວັນທີ 12 ທັນວາ 2017 ທີ່ຜ່ານມາ.
ຄະດີນີ້ຫຼັງເກີດເຫດເຈົ້າໜ້າທີ່ດ່ານພາສີໜອງຄາຍໄດ້ອາຍັດເງິນທັງໝົດໄວ້ ແລ້ວດຳເນີນການຕາມກົດໝາຍ ກັບຄົນລາວທັງສອງຄົນ ໂດຍທັງສອງໄດ້ຍອມຮັບວ່າ ເປັນເງິນຂອງຄອບຄົວທີ່ເຮັດທຸລະກິດຮັບແລກປ່ຽນເງິນຕາຕ່າງປະເທດຢູ່ນະຄອນຫຼວງວຽງຈັນ ເຊິ່ງໄດ້ເອົາເງິນໂດລາສະຫະລັດໄປແລກປ່ຽນເປັນເງິນບາດຢູ່ທະນາຄານແຫ່ງໜຶ່ງໃນຈັງຫວັດໜອງຄາຍ ແລະລະຫວ່າງການດຳເນີນການເຈົ້າໜ້າທີ່ ປປງ ໄດ້ຮ່ວມສອບສວນນຳ.
ທ່ານ ສຸນທະລາ ພົນໄຕ ຜູ້ອຳນວຍການສ່ວນຂໍ້ມູນຄະດີແລະມາດຕະການພິເສດທາງກົດໝາຍ ສຳນັກງານ ປປງ (ໄທ) ກ່າວວ່າ ໄດ້ຮັບມອບໝາຍຈາກເລຂາທິການ ປປງ ໃຫ້ມາຮ້ອງທຸກກ່າວໂທດກັບສອງພີ່ນ້ອງຄົນລາວ ເນື່ອງຈາກໄດ້ສອບສວນຂໍ້ເທັດຈິງເຊື່ອໄດ້ວ່າທັງສອງຄົນມີມູນໃນການກະທຳຄວາມຜິດ ຕາມພະລາຊະບັນຍັດປ້ອງກັນແລະປາບປາມການຟອກເງິນ(ໄທ) ມາດຕາ 3(7) ຄວາມຜິດກ່ຽວກັບການລັກລອບໜີພາສີຕາມກົດໝາຍວ່າດ້ວຍພາສີອາກອນ ແລະ ມາດຕາ 5 ກ່ຽວກັບການໂອນ ຮັບໂອນ ຫຼືປ່ຽນສະພາບຊັບສິນທີ່ກ່ຽວກັບການກະທຳຄວາມຜິດເພື່ອຊຸກເຊື່ອງຫຼືປົກປິດແຫຼ່ງທີ່ມາຂອງຊັບສິນນັ້ນ ຫຼືກະທຳດ້ວຍປະການໃດໆ ເພື່ອປົກປິດຫຼືອຳພາງລັກສະນະທີ່ແທ້ຈິງການໄດ້ມາ ແຫຼ່ງທີ່ຕັ້ງ ການຈຳໜ່າຍ ການໂອນ ການໄດ້ສິດໃໆ ເຊິ່ງຊັບສິນທີ່ກ່ຽວກັບການກະທຳຄວາມຜິດ ໂດຍມີອັດຕາໂທດໃນຖານຟອກເງິນ ຕ້ອງໂທດຕັດອິດສະຫຼະພາບຕັ້ງແຕ່ 1-10 ປີ ຫຼືປັບໃໝຕັ້ງແຕ່ 20,000 – 200,000 ບາດ ຫຼື ທັງຕັດອິດສະຫຼະພາບທັງປັບໃໝ.
ທັງນີ້ ເຈົ້າໜ້າທີ່ ປປງ (ໄທ) ມີຂໍ້ມູນວ່າທັງສອງຄົນມີພຶດຕິການເຂົ້າຂ່າຍການຟອກເງິນ ແຕ່ບໍ່ສາມາດເປີດເຜີຍຂໍ້ມູນໄດ້ ເຊິ່ງຄະດີນີ້ມີມູນຖານຂອງການພິຈາລະນາຄວາມຜິດອາຍາຖານຟອກເງິນ ໃນການເອົາເງິນເຊິ່ງເປັນຂອງຕ້ອງຈຳກັດເຂົ້າ-ອອກນອກປະເທດ ໂດຍບໍ່ຜ່ານຂັ້ນຕອນຕາມກົດໝາຍ ເປັນຄວາມຜິດຖານລັກລອບໜີພາສີຕາມ ມາດຕາ 3(7) ໂດຍຊັບສິນທີ່ກ່ຽວກັບການກະທຳຄວາມຜິດ ເປັນຊັບສິນທີ່ໄດ້ໃຊ້ໃນການກະທຳຄວາມຜິດມູນານລັກລອບໜີພາສີ ຈຶ່ງເປັນຊັບສິນທີ່ກ່ຽວກັບກະທຳຄວາມຜິດຕາມກົດໝາຍຟອກເງິນ.
ແລະທ້າວ ສຸບັນ ກັບ ທ້າວ ຄຳບອນ ໄດ້ສົມຄົບແລະຮ່ວມກັນປ່ຽນສະພາບຊັບສິນທີ່ກ່ຽວກັບການກະທຳຄວວາມຜິດເພື່ອຊຸກເຊື່ອງ ປົກປິດ ຫຼືອຳພາງລັກສະນະທີ່ແທ້ຈິງ ການໄດ້ມາເຊິ່ງຊັບສິນທີ່ກ່ຽວກັບການກະທຳຄວາມຜິດຫຼືໄດ້ມາ ຄອບຄອງ ໂດຍຮູ້ໃນຂະນະໄດ້ມາຄອບຄອງວ່າເປັນຊັບສິນທີ່ກ່ຽວກັບການກະທຳຄວາມຜິດ ຈຶ່ງຜິດຖານສົມທົບແລະຮ່ວມກັນຟອກເງິນ ເຊິ່ງເປັນອາຍາແຜ່ນດິນ ບໍ່ສາມາດຍອມຄວາມໄດ້.
ແຫຼ່ງຂ່າວ: ໄທລັດອອນລາຍ
ຂ່າວທີ່ກ່ຽວຂ້ອງ:
ໄທຈັບ 2 ອ້າຍນ້ອງຊາວລາວຂົນເງິນອອກນອກປະເທດຫຼາຍກວ່າ 98 ລ້ານບາດ ຄວາມຄືບໜ້າຄະດີຢຶດເງິນ 98 ລ້ານບາດຈາກສອງອ້າຍນ້ອງຊາວລາວ