ບັນຫາຄວາມບໍ່ສະຫງົບທາງການເມືອງ ແລະ ສານສູງສຸດທີ່ກຳລັງເກີດຂື້ນໃນ ປະເທດມານດິວ ເຮັດໃຫ້ປະທານປະເທດ ອັບດຸນລາ ຢາມິນ ກາຍູມ ແຫ່ງສາທາລະນະລັດມານດິວ ຕ້ອງປະກາດພາວະສຸກເສີນທົ່ວປະເທດໃຫ້ແກ່ປະຊາຊົນຮູ້ ເປັນເວລາ 15 ມື້ ໃນຊ່ວງໄລຍະວິກິດການຍາດຊິງອຳນາດລະຫວ່າງລັດຖະບານ ແລະ ສານສູງສຸດ.
ທ່ານ ອັບດຸນລາ ຢາມິນ ກາຍູມ ປະທານປະເທດແຫ່ງສາທາລະນະລັດມານດິວ ກ່າວວ່າ: ເຖີງວ່າສິດທິບາງຢ່າງຈະຖືກຈຳກັດ ແຕ່ການເຄື່ອນໄຫວທົ່ວໄປພາຍໃນເຊັ່ນ ການບໍລິການ ແລະ ທຸລະກິດຕ່າງໆ ແມ່ນຈະບໍ່ໄດ້ຮັບຜົນກະທົບ, ຈະມີການຮັບປະກັນຄວາມປອດໄພແກ່ປະຊາຊົນມານດິວ ແລະ ຄົນຕ່າງປະເທດທຸກຄົນທີ່ອາໄສຢູ່ ຫລື ມາທ່ອງທ່ຽວ.
ການເຄື່ອນໄຫວລ່າສຸດໃນມານດິວ ສານສູງສຸດມີຄຳສັ່ງໃຫ້ປ່ອຍຕົວນັກໂທດທາງການເມືອງ ແລະ ຄືນຕຳແຫນ່ງໃຫ້ແກ່ສະມາຊິກສະພາ ແຕ່ປະທານປະເທດ ຢາມິນ ປະຕິເສດທີ່ຈະປະຕິບັດຕາມຄຳສັ່ງສານ.
ໄອຍາການສູງສຸດແຫ່ງມານດິວອອກມາແນະນຳໃຫ້ຕຳຫລວດປະຕິບັດຕາມລັດຖະທຳມະນູນ ແລະ ເຕືອນວ່າສານສູງສຸດອາດອອກຄຳສັ່ງຖອນໂຕປະທານປະເທດຢານິນ ອອກຈາກຕຳແຫນ່ງ. ຂະນະດຽວກັນ ທາງດ້ານຜູ້ສະຫນັບສະຫນູນຝ່າຍຄ້ານໄດ້ອອກມາປະທ້ວງຕໍ່ເຫດການນີ້ ຕາມຖະຫນົນຫົນທາງເພື່ອກົດດັນໃຫ້ລັດຖະບານປະຕິບັດຕາມຄຳສັ່ງສານ ແລະ ຮຽກຮ້ອງໃຫ້ປະຊາຄົມນານາຊາດເຮັດທຸກຢ່າງເທົ່າທີ່ເຮັດໄດ້ ເພື່ອໂນ້ມນ້າວໃຫ້ລັດຖະບານປະຕິບັດຕາມຄຳສັ່ງສານ.
ເຫດການດັ່ງກ່າວເຮັດໃຫ້ປະເທດຈີນ, ສະຫາລາຊະອານາຈັກ ແລະ ອິນເດຍ ອອກຄຳເຕືອນເລື່ອງການເດີນທາງເຂົ້າໄປປະເທດມານດິວ ໂດຍຂໍໃຫ້ພົນລະເຮືອນເດີນທາງຢ່າງລະມັດລະວັງ ແລະ ຫລີກລ່ຽງຈຸດທີ່ມີການເດີນທາງການຊຸມນຸມ ຫລື ປະທ້ວງ.
ແຫລ່ງຂ່າວຕ່າງປະເທດ TNA.