ລັດຖະບານ ວໍຊິງຕັນ ປະກາດໃຫ້ ຄິງໂລມັນ ຄາຊິໂນ ສາມຫລ່ຽມທອງຄຳ ເປັນອົງກອນອາດສະຍາກຳຂ້າມຊາດ ແລະ ຂື້ນບັນຊີດຳຜູ້ທີ່ມີສ່ວນກ່ຽວຂ້ອງທັງ 4 ຄົນ.
ສຳນັກຂ່າວຕ່າງປະເທດລາຍງານຈາກເມືອງວໍຊິງຕັນ, ປະເທດ ອາເມລິກາ ເມື່ອວັນທີ 30 ມັງກອນ ວ່າ ກະຊວງຄັງເງີນຂອງສະຫະລັດອອກຖະແຫລງການ ຂື້ນບັນຊີດຳບໍລິສັດ ຄິງໂລມັນ ອິນເຕີເນຊັນ ອິນເວສເມັນ ສາມຫລ່ຽມທອງຄຳ. ໃນຖານະອົງກອນອາດສະຍາກຳຂ້າມຊາດ ໂດຍອົງກອນແຫ່ງນີ້ແມ່ນບໍລິຫານໂດຍຜູ້ບໍລິຫານຂອງ ຄິງໂລມັນ ຄາຊິໂນ ທີ່ຕັ້ງຢູ່ພື້ນທີ່ເຂດເສດຖະກິດພິເສດສາມຫລ່ຽມທອງຄຳ ທີ່ເມືອງ ຕົ້ນເຜີ້ງ ແຂວງບໍ່ແກ້ວ ທາງຕາເວັນຕົກສຽງເຫນືອຂອງ ສປປ ລາວ ມີຊາຍແດນກັບມຽນມາ ແລະ ໄທ.
ລັດຖະບານວໍຊິງຕັນມີຫລັກຖານທີ່ເຊື່ອຖືໄດ້ວ່າ ຄິງໂລມັນ ຄາຊິໂນ ເປັນຂຸມທາງຂອງກິດຈະກຳຜິດກົດຫມາຍຫລາຍຢ່າງໃນເຂດສາມຫລ່ຽມທອງຄຳ ບໍ່ວ່າຈະເປັນການຄ້າຢາເສບຕິດ, ຜູ້ຈຳຫນ່າຍເຮໂລອິນ ແລະ ຢາບ້າ. ໃນນາມກອງທັບວ້າແດງ ມີຖານທີ່ຫມັ້ນຢູ່ມຽນມາ. ການຄ້າມະນຸດ, ການຄ້າສັດປ່າ ແລະ ອະໄວຍະວະສັດປ່າຄຸ້ມຄອງບໍ່ວ່າຈະເປັນຫມີດຳ, ລິ່ນ, ເສືອ ແລະ ຊ້າງ. ໂດຍເຈົ້າຫນ້າທີ່ສາມາດນຳຕິດຕາມເສັ້ນທາງກິດຈະກຳຜິດກົດຫມາຍດັ່ງກ່າວຍ້ອນໄປໄດ້ຮອດປີ 2015. 
ກະຊວງຄັງເງີນສະຫະລັດຍັງຂື້ນບັນຊີດຳຈຳນວນ 4 ບຸກຄົນທີ່ມີສ່ວນກ່ຽວຂ້ອງໂດຍກົງກັບການບໍລິຫານອົງກອນນີ້ເຊີ່ງມີ ທ້າວ ຈ້າວ ເຫວີຍ, ມະຫາເສດຖີຈີນ ເຊີ່ງເປັນຜູ້ບໍລິຫານສູງສຸດ.ແລະ ເມຍຊື່ ນາງ ຊູ ກູ່ຊິນ, ສັນຊາດຈີນ. ທ້າວ ອັບບາສ ອີບີຣາຮິິມ, ສັນຊາດ ອົດສະຕາລີ ຜູ້ຮັບຜິດຊອບລະບົບຮັກສາຄວາມປອດໄພໃນຄາຊິໂນ ແລະ ຄົນສູດທ້າຍ ທ້າວ ນັດ ຣຸ່ງຕະວັນຄິລີ,ສັນຊາດ ໄທ ຜູ້ອຳນວຍການ ບໍລິສັດ ຄິງໂລມັນ ອິນເຕີເນຊັນ ອິນເວສເມັນ ທີ່ມີສຳນັກງານຢູ່ແຂວງ ຊຽງລາຍ, ມີຫນ້າທີ່ເຄື່ອນຍ້າຍຊັບສິນໃນນາມອົງກອນ.
ແຫລ່ງຂ່າວຕ່າງປະເທດ DLN