ສຳນັກຂ່າວຕ່າງປະເທດຈາກເມືອງແວນຄູເວີ, ປະເທດການາດາໃຫ້ຂໍ້ມູນລາຍງານຂ່າວວ່າ ໃນວັນທີ 17 ມັງກອນ 2018 ນີ້ປະເທດການາດາໄດ້ຮັບເຊີນບັນດາຜູ້ແທນຈາກທັງຫມົດ 20 ປະເທດເຂົ້າຮ່ວມກອງປະຊູມ ກ່ຽວກັບມາດຕະການເພີ່ມຄວາມກົດດັນຕໍ່ເກົາຫລີເຫນືອ ແລະ ທັງ 20 ແມ່ນເຫັນພ້ອງໃຫ້ຍົກລະດັບຄວາມກົດດັນຕໍ່ເກົາຫລີເຫນືອ ເພື່ອເພີ່ມແຮງພັກດັນໃຫ້ອີກຝ່າຍຍຸຕິໂຄງການນິວເຄຼຍ ໃນການພົບປະຫາລືກັນຄັ້ງນີ້ ບໍ່ມີ ສ.ປ ຈີນ ແລະ ລັດເຊຍ ເຂົ້າຮ່ວມ.
ຂະນະດຽວກັນ ລັດຖະມົນຕີວ່າການກະຊວງການຕ່າງປະເທດສະຫະລັດ, ເຣັກສ໌ ທິເລີສັນສ໌ຍັງຄົງຊອກຫາຊ່ອງທາງໂອກາດໃນການເຈລະຈາກັບເກົາຫລີເຫນືອ ເພື່ອລົດຄວາມສ່ຽງຂອງການຜະເຊີນຫນ້າດ້ານນິວເຄຼຍ.
ດ້ານຝັ່ງຂອງລັດຖະມົນຕີກະຊວງການຕ່າງປະເທດຍີ່ປຸ່ນ, ທາໂລ ໂຄໂນະ ກ່າວຮຽກຮ້ອງຢູ່ກອງປະຊຸມຢ່າງເຫັນດີເຫັນງາມ ໄປກັບການເຈລະຈາລະຫວ່າງເກົາຫລີເຫນືອກັບເກົາຫລີໃຕ້ ທີ່ເກີດຂື້ນຢ່າງເປັນທາງການຄັ້ງທຳອິດໃນຮອບ 2 ປີ ເມື່ອວັນທີ 9 ມັງກອນ ທີ່ຜ່ານມາ ແລະ ມີການເຈລະຈາຕໍ່ຍອດກັນແລ້ວຢ່າງຫນ້ອຍ 2 ຄັ້ງ, ເພື່ອໃຫ້ເກົາຫລີເຫນືອໄດ້ມີໂອກາດເຂົ້າຮ່ວມການແຂ່ງຂັນກິລາໂອລິມປິກລະດູຫນາວ ທີ່ເກົາຫລີໃຕ້ຈະເປັນເຈົ້າພາບໃນເດືອນຫນ້ານີ້ ວ່າເປັນພຽງການຍ່າງຕາມຫມາກເກມທາງການທູດເທົ່ານັ້ນ ເພື່ອໃຫ້ປະຊາກອນໂລກຕາຍໃຈ.
ແຕ່ເຖີງຢ່າງໃດກໍຕາມ ຈີນ ແລະ ລັດເຊຍຊື່ງເປັນປະເທດຜູ້ອຸປະຖຳລາຍສຳຄັນຂອງເກົາຫລີເຫນືອບໍ່ໄດ້ຖືກຮັບເຊີນເຂົ້າຮ່ວມກອງປະຊຸມຢູ່ເມືອງແວນກູເວີແຕ່ຢ່າງໃດ ຊື່ງທັງສອງປະເທດໄດ້ໃຫ້ການວິຈານຕໍ່ການພົບປະຫາລືໃນຄັ້ງນີ້ວ່າ ເປັນການຮ່ວມຕົວຂອງຜູ້ທີ່ຂາດຄວາມເຂົ້າໃຈຕໍ່ສະຖານະການຂອງເກົາຫລີຢ່າງສີ້ນເຊີງ ແລະ ເຕືອນວ່າ ມີຄວາມເປັນໄປໄດ້ສູງທີ່ເກົາຫລີເຫນືອຈະເບີ່ງການເຄື່ອນໄຫວນີ້ເປັນການຄຸກຄາມ, ເຮັດໃຫ້ສະຖານະການໃນຕອນນີ້ທີ່ກຳລັງຜ່ອນຄາຍ ກັບຄືນມາຕືງຄຽດອີກຄັ້ງ.
ແຫລ່ງຂ່າວຕ່າງປະເທດTNN