ສະຫະລັດຫວັ່ນ ກອງກຳລັງກໍ່ການຮ້າຍອາດທຳການສະຫຼອງ 13 ປີ ຕຶກເວີນເທຣດຖະຫຼົ່ມ ດ້ວຍການກໍ່ເຫດຊ້ຳ
ຫຼັງພົບເຮືອບິນໃນລິເບຍເສຍ 11 ລຳ.
ເມື່ອວັນທີ 3 ກັນຍາ 2014 ທີ່ຜ່ານມາ ເວັບຂ່າວໄດລີເມວຂອງອັງກິດລາຍງານວ່າ ເຈົ້າໜ້າທີ່ທາງການສະຫະລັດ
ໄດ້ເຕືອນກຳລັງກໍ່ການຮ້າຍອິດສະລາມ ທີ່ອາດກໍ່ການຮ້າຍສະຫຼອງ 13 ປີ ເຫດການເຮືອບິນຕຳຕຶກເວີນເທຣດ
ໃນວັນທີ 11 ກັນຍານີ້ ຫຼັງຈາກເຮືອບິນກ່ວາ 11 ລຳ ຖືກກຸ່ມກໍ່ການຮ້າຍຍຶດ ແລະ ຫາຍໄປຈາກສະໜາມບິນຕຣິ
ໂປລີ ປະເທດລິເບຍ ເມື່ອທ້າຍເດືອນສິງຫາທີ່ຜ່ານມາ.
ລາຍງານຂ່າວໄດ້ລະບຸວ່າ ເຮືອບິນພານິດຂອງສາຍການບິນ ທີ່ດຳເນີນການໂດຍລັດຖະບານລິເບຍ ໄດ້ຖືກຫາຍ
ສາບສູນໄປເມື່ອເດືອນສິງຫາທີ່ຜ່ານມາ ລວມແລ້ວກ່ວາ 11 ລຳ ຫຼັງຈາກທີ່ກອງກຳລັງຫົວຮຸນແຮງ ລິບຽນ ດອນ
ໄດ້ເຂົ້າຍຶດສະໜາມບິນຕຣິໂປລີ ຈິ່ງເປັນເຫດໃຫ້ຫວັ່ນວິຕົກວ່າ ເຮືອບິນທັງ 11 ລຳທີ່ສູນຫາຍໄປນັ້ນ ອາດຈະຖືກ
ນຳມາໃຊ້ໃນການກໍ່ການຮ້າຍ ຮູບແບບດຽວກັນກັບເຫດການຕຶກເວີນເທຣດຖະຫຼົ່ມ ໃນມະຫານະຄອນນິວຢອກ
ສະຫະລັດອາເມຣິກາ ທີ່ເກີດຂຶ້ນໃນວັນທີ 11 ກັນຍາ 2001.
ດັ່ງນັ້ນ ວັນທີ 11 ກັນຍາ 2014 ທີ່ຈະມາເຖິງນີ້ ຈິ່ງເປັນມື້ທີ່ໜ້າຈັບຕາເບິ່ງສະຖານະການ ແລະ ຄວນມີການເຝົ້າ
ລະວັງເປັນຢ່າງດີ ຂອງເຈົ້າໜ້າທີ່ຄວາມໝັ້ນຄົງຂອງສະຫະລັດ ເພາະມີຄວາມເປັນໄປໄດ້ວ່າ ກຸ່ມກໍ່ການຮ້າຍຈະ
ກໍ່ເຫດວິນາດສະກຳ ເພື່ອສະຫຼອງ 13 ປີ ເຫດການ 9/11 ແລະ ບໍ່ພຽງເທົ່ານັ້ນ ໃນມື້ວັນທີ 11 ກັນຍາ 2014 ນີ້ ກໍຍັງ
ເປັນມື້ທີ່ຄົບຮອບ 2 ປີ ຂອງການໂຈມຕີສະຖານກົງສຸນສະຫະລັດອາເມຣິກາ ໃນເມືອງຫຼວງເບງກາຊີຂອງລີເບຍ
ອີກດ້ວຍ ໂດຍເຫດການໃນຄັ້ງນັ້ນ ໄດ້ເຮັດໃຫ້ເຈົ້າໜ້າທີ່ຊາວອາເມຣິກັນ ເສຍຊີວິດໄປ 4 ລາຍ.
ຢ່າງໃດກໍຕາມ ທາງການສະຫະລັດເອງ ຍັງບໍ່ໄດ້ຢືນຢັນເລື່ອງການຫາຍສາບສູນໄປຂອງເຮືອບິນພານິດທັງ 11 ລຳ
ຢ່າງເປັນທາງການ, ແຕ່ເຈົ້າໜ້າທີ່ຈາກສຳນັກງານການຂ່າວຂອງສະຫະລັດໄດ້ເປີດເຜີຍວ່າ ຕອນນີ້ກຳລັງຢູ່ໃນ
ລະຫວ່າງການຄົ້ນຫາເຮືອບິນຢູ່.
ທັງນີ້ ສະໜາມບິນຕຣິໂປລີຂອງລີເບຍ ໄດ້ຖືກປິດມາແລ້ວ 2 ເດືອນກ່ອນ ເນື່ອງຈາກກອງກຳລັງກໍ່ການຮ້າຍໄດ້
ບຸກຍຶດຕັ້ງແຕ່ໄລຍະກາງເດືອນກໍລະກົດທີ່ຜ່ານມາ.