ຍັງຈື່ກັນບໍວ່າເຮືອບິນ ຂອງຖ້ຽວບິນ MH370 ທີ່ຫາຍສາບສູນໄປຈາກຈໍເລດ້າ ໃນຂະນະທີ່ກຳລັງເດີນທາງໄປຍັງປັກກີ່ງ ແລະ ລູກເຮືອລວມທັງຫມົດ 239 ຄົນ ເດີນທາງອອກຈາກເມືອງຫລວງກົວລາລຳເປີ, ມາເລເຊຍ ປັດຈຸບັນນີ້ຍັງບໍ່ມີໃຜສາມາດອອກມາຕອບໄດ້ວ່າເຄື່ອງບິນດັ່ງກ່າວແມ່ນຢູ່ໃສ?
ທາງການຂອງປະເທດ ມາເລເຊຍ ລົງນາມຂໍ້ຕົກລົງກັບບໍລິສັດ ສຳຫລວດໃຕ້ພື້ນທະເລຂອງ ປະເທດສະຫະລັດອາເມລິກາວ່າ ຈະຈ່າຍເງີນໃຫ້ຖ້າຫາກພົບຮ່າງເຮືອບິນ MH370 ທີ່ເປັນປິດສະຫນາການຫາຍໄປຢ່າງສາບສູນ ເປັນເວລາເກືອບ 4 ປີແລ້ວ.
ລັດຖະມົນຕີວ່າການ ກະຊວງຄົມມະນາຄົມ ຂອງມາເລເຊຍ ຫຼຽວຕຽງໄຫລ ໄດ້ຖະແຫລງຂ່າວໃນມື້ນີ້ວ່າ ທາງການມາເລເຊຍໄດ້ເຮັດຂໍ້ຕົກລົງກັບບໍລິສັດ ສຳຫລວດໃຕ້ພື້ນທະເລ Ocean Infinity ທີ່ມີສຳນັກງານຕັ້ງຢູ່ເມືອງ Houston, ປະເທດສະຫະລັດອາເມລິກາ ທີ່ຮັບປາກວ່າຈະບໍ່ຄິດຄ່າໃຊ້ຈ່າຍໃດໆ ຖ້າຫາກບໍ່ພົບຮ່າງເຄື່ອງບິນທີ່ຫາຍໄປ ຕັ້ງແຕ່ວັນທີ 8 ມີນາ 2014 ໂດຍຈະຄົ້ນຫາໃນຫນ້ານໍ້າເປົ້າຫມາຍ 25,000 ຕາລາງກິໂລແມັດເຫນືອຂື້ນໄປຈາກນ່ານນໍ້າ ອົດສະຕາລີ, ມາເລເຊຍ ແລະ ຈີນ. ໄດ້ມີການຮ່ວມກັນຄົ້ນຫາມາແລ້ວ 120,000 ຕາລາງກິໂລແມັດ ແລະ ຢຸດສະຫງັກລົງໄປເມື່ອເດືອນ ມັງກອນ ປີກ່ອນ, ໃນການຄົ້ນຫານີ້ຄາດວ່າຈະໃຊ້ເວລາທັງຫມົດ 90 ວັນ.
ເຮືອທີ່ນຳໃຊ້ເຂົ້າໃນການຄົ້ນຫານີ້ມີຊື່ວ່າ ເຮືອຊີເບດຄອນສະຕັກເຕີ ຂອງບໍລິສັດສຳຫລວດໃຕ້ພື້ນທະເລ Ocean Infinity ໄດ້ເດີນທາງໄປຍັງນ່ານນໍ້າເປົ້າຫມາຍແລ້ວ ເນື່ອງຈາກສະພາບລົມຟ້າອາກາດໃນມະຫາສະຫມຸດອິນເດຍຕອນໃຕ້ກຳລັງເປັນໃຈ, ມີຕົວແທນ65 ຄົນຂອງກອງທັບເຮືອມາເລເຊຍເຂົ້າຮ່ວມໃນການຄົ້ນຫາ ບໍລິສັດຈະໄດ້ຮັບຄ່າຈ້າງ 20 ລ້ານໂດລາສະຫະລັດ ຫລື ປະມານ 165 ຕື້ກີບ.
ແຕ່ທາງການຂອງມາເລເຊຍໄດ້ກຳນົດເພີ່ມຂື້ນອີກວ່າຖ້າພົບຊາກເຮືອບິນໃນນ່ານນໍ້າ 5,000 ຕາລາງກິໂລແມັດ ຈະເພີ່ມມູນຄ່າໃນການຊອກຫາໃຫ້ເປັນ 30 ລ້ານໂດລາສະຫະລັດ ( 248ຕື້ກີບ )
ຖ້າພົບເຫັນໃນນ່ານນໍ້າ 10,000 ຕາລາງກິໂລແມັດ ຈະເພີ່ມໃຫ້ເປັນ 50 ລ້ານໂດລາສະຫະລັດ (414 ຕື້ກີບ).
ແລະຖ້າພົບເຫັນໃນນ່ານນໍ້າ 25,00 ຕາລາງກິໂລແມັດແມ່ນຈະເພີ່ມໃຫ້ເປັນ 70ລ້ານໂດລາສະຫະລັດ ຫລື ປະມານ 579 ຕື້ກີບ.
ເປົ້າຫມາຍຫລັກແມ່ນເພື່ອຄົ້ນຫາຊາກເຄື່ອງບິນ ກ່ອງບັນທຶກຂໍ້ມູນ, ກ່ອງບັນທຶກສຽງໃນຫ້ອງນັກບິນ (ກ່ອງດຳ) ແລ້ວຫາຫລັກຖານທີ່ມີນໍ້າຫນັກເພື່ອມາຢັ້ງຢືນຕໍ່ເຫດການໃນຄັ້ງນັ້ນ.
ສຳນັກຂ່າວຕ່າງປະເທດ TNA