ຕອນທີ 18 ເຕັ້ນ K-Pop ໜ້າສານພະພູມ
ທີ່ຫ້ອງ 6/3 ກ່ອນຄູຈະເຂົ້າຫ້ອງ ມັງກອນໄດ້ສະກິດຫຼັງມາລີ 2-3 ຄັ້ງແລ້ວມາລີກໍ່ຫັນລັງມາເບິ່ງມັງກອນ
ມາລີ: ມີຫຍັງ
ມັງກອນຂັບປື້ມກະຕູນຂຶ້ນມາຈາກໜ້າໂຕະແລ້ວຍື່ນໃຫ້ມາລີ: ມື້ວານນີ້ຂ້ອຍໄປຮ້ານໜັງສືຈື່ໄດ້ວ່າເຈົ້າມັກອ່ານກະຕູນ ຂ້ອຍລອງອ່ານເບິ່ງເລື່ອງນີ້ມ່ວນດີຂ້ອຍເລີຍຊື້ມາຝາກ
ມາລີ: ໜ້າຮັກທີ່ສຸດ
ເກສອນ: ແລ້ວຂອງເຂົາເດະ
ມັງກອນ: ບໍ່ມີ
ເກສອນຫັນກັບໄປດ້ວຍໃບໜ້ານ້ອຍໃຈ
ມັງກອນ: ມາລີວັນເຊົານີ້ວ່າງບໍ່
ມາລີ: ບໍ່ຮູ້ເທື່ອ! ມີຫຍັງ
ມັງກອນ: ຂ້ອຍຊື່ກ້ອງຖ່າຍຮູບມາໃໝ່ວ່າສິໄປລອງກ້ອງໃໝ່ເລີຍຢາກໃຫ້ເຈົ້າໄປເປັນໝູ່
ເກສອນ: ເຂົາວ່າງເສົານີ້ເຂົາບໍ່ໄດ້ໄປທາງໃດ
ມັງກອນ: ເຂົາຊວນມາລີ
ເກສອນຮູ້ສຶກເຈັບຈີ໋ດສຽບເຂົ້າໃນໃຈ
ຈາກນັ້ນຄູປະຈຳຫ້ອງກໍ່ຍ່າງເຂົ້າມາ
ໂທນີ: ນັກຮຽນທຳຄວາມເຄົາລົບ
ນັກຮຽນທຸກຄົນ: ສະບາຍດີອາຈານ
ຄູປະຈຳຫ້ອງ: ນັ່ງລົງ
ນັກຮຽນ: ຂອບໃຈອາຈານ
ຄູປະຈຳຫ້ອງ: ວັນນີ້ຄູມາແຈ້ງຂ່າວດີ! ຫ້ອງ 6/3 ຂອງເຮົາມີຕົວແທນນັກຮຽນເກັ່ງເຂົ້າຮ່ວມໃນສອບເສັັງນັກຮຽນເກັ່ງລະດັບຊັ້ນມັດທະຍົມປາຍ ວິຊາຄະນິດສາດ ນັ້ນກໍ່ຄື ໂທນີ! ຍິນດີນຳເດີ້ໂທນີ! ຕົບມືໃຫ້ໝູ່ແນ່
ນັກຮຽນທຸກຄົນໃນຫ້ອງພາກັນຈົບມືໃຫ້ກັບໂທນີມາລີຫັນໄປສົ່ງຍິ້ມພ້ອມທັງຍົກໂປ້ໃຫ້ ໃນເວລານັ້ນໂທນີເອງກໍ່ຮູ້ສຶກດີໃຈສຸດໆຈົນເກັບຮອຍຍິ້ມໄວ້ບໍ່ໄດ້
ຕອນແລງເລີກເມືອໃນຂະນະທີ່ມາລີຍ່າງນຳຫຼັງໂທນີໄປເອົາລົດທີ່ຄອກຝາກລົດຂອງໂຮງຮຽນມັງກອນກໍ່ແລ່ນມາແລ້ວເອົາແຂນເຕາະມາລີເບົາໆ
ມັງກອນ: ມາລີ! ວ່າແນວໃດວັນເສົາຫວ່າງໄປກັບຂ້ອຍບໍ່
ໂທນີເຖິງກັບຢຸດຟັງ
ມາລີ: ໂອເຄ!
ມັງກອນ: yeh!
ເມື່ອຮອດວັນເສົາວັນທີມາລີຕ້ອງໄປຖ່າຍຮູບກັບມັງກອນ ແຕ່ພໍດີວັນນັ້ນ (ຕີ໋ນ້ອຍ) ໝາຂອງມາລີຖືກລົດຕຳຂາຫັກ ມາລີຕ້ອງຟ້າວພາໝາໄປຮັກສາທີ່ຄຣີນິກ ມາລີກຳລັງຈະໂທເລື່ອນນັດກັບມັງກອນແຕ່ເກສອນໄດ້ໂທມາກ່ອນ
ມາລີ: ຮາໂຫຼ! ມີຫຍັງໝູ່
ເກສອນ: ເພິ່ນອອກໄປຫາມັງກອນແລ້ວບໍ່
ມາລີ: ຍັງເລີຍ ແລະ ຄືສິບໍ່ໄດ້ໄປແລ້ວລ່ະ ໝາເຂົາຖືກລົດຕຳຕອນນີ້ພາໝາມາປົວຢູ່ຄຣີນິກວ່າສິໂທຍົກເລີກນັດກັບມັງກອນຢູ່
ເກສອນໄດ້ຈັງຫວະພໍດີທີ່ຈະສວມຮອຍໄປຫາມັງກອນແທນມາລີ: ເພິ່ນບໍ່ຕ້ອງໂທໄປບອກມັງກອນກະໄດ້ ດຽວເຂົາໄປຮອດລະເຂົາສິບອກລາວໃຫ້
ມາລີ: ເອີ້!ແບບນັ້ນກະດີ ເຂົາຈິ່ງບໍ່ໄດ້ເປືອງເງິນໂທ! ຝາກແນ່ເດີ້ເຮີ້ຍ
ເກສອນ: ອຳບາຍ! ເອີ້! ວ່າແຕ່ເຮົາຕ້ອງໄປພົບມັງກອນຢູ່ໃສເກາະ ຂ້ອຍລືມບ່ອນທີ່ເຮົາຈະໄປ
ມາລີ: ເພິ່ນເປັນຄົນຄວາມຈຳສັ້ນຕັ້ງແຕ່ມື້ໃດຄົນງາມ! ມັງກອນໃຫ້ໄປພົບຢູ່ຮ້ານ ໂຈມາ! ລາວຈະໄປດື່ມນ້ຳຊາຢູ່ຫັ້ນຖ້າເຮົາ!
ເກສອນຍິ້ມດີໃຈເມື່ອຮູ້ສະຖານທີ່ຈະໄປພົບມັງກອນ: ໂອເຄຊັ້ນເທົ່ານີ້ກ່ອນເດີ້ ເຂົາສິຟ້າວອອກໄປຫາມັງກອນກ່ອນດຽວສິໄປຊ້າ
ມາລີ: ທ່ຽວໃຫ້ມ່ວນໆເດີ້ (ວາງສາຍ)
ທີ່ຮ້ານໂຈມາ ມັງກອນນັ່ງດື່ມນ້ຳຊາພ້ອມຂະໜົມເຄັກຖ້າ ແຕ່ກໍ່ຕ້ອງແປກໃຈເມື່ອເຫັນເກສອນມາບ່ອນນີ້
ມັງກອນ: ອ້າວ! ເກສອນເພິ່ນມາຫຍັງ
ເກສອນ: ມາລີຄາວຽກມາບໍ່ໄດ້ເລີຍໂທບອກໃຫ້ເຂົາໄປເລາະຖ່າຍຮູບເປັນໝູ່ເພິ່ນ!
ມັງກອນຈັບໂທລະສັບຂຶ້ນມາໂທຫາມາລີ
ມັງກອນ: ຮາໂຫຼ! ຢູ່ໃສ
ມາລີ: ຢູ່ຄຣີນິກສັດພາຕີ໋ນ້ອຍມາຮັກສາ! ຂໍໂທດເດີ້ມື້ນີ້ເຂົາໄປນຳເພິ່ນບໍ່ໄດ້! ຂໍໃຫ້ເພິ່ນກັບເກສອນທ່ຽວກັນໃຫ້ມ່ວນໆ! ບ່າຍໆ (ວາງສາຍ)
ເກສອນ: ເຂົາຂໍສັ່ງຂະໜົມກັບຊາມາກິນກ່ອນເດີ້! ຍັງບໍທັນໄດ້ກິນເຂົ້າເຊົ້າເທື່ອ
ມັງກອນຖອນຫາຍໃຈດ້ວຍສີໜ້າເຊັງໆ: ອືມ
ມັງກອນຮູ້ສຶກຜິດຫວັງຢ່າງແຮງ ເມື່ອຄົນທີ່ມາເປັນເກສອນແຜນທຸກຢ່າງເລີຍພັງ ເພາະແຜນທີ່ວາງໄວ້ທຳອິດນັ້ນແມ່ນຈະພາມາລີໄປເບິ່ງ, ກິນເຂົ້າ, ຍ່າງຊັອບປິ້ງ ສ່ວນການຖ່າຍຮູບລອງກ້ອງນັ້ນມັນເປັນພຽງສ່ວນປະກອບນ້ອຍໆໃນແຜນເທົ່ານັ້ນ ໃນເມື່ອທຸກຢ່າງເປັນແບບນີ້ມັງກອນເລີຍບໍ່ມີອາລົມທີ່ຈະໄປໃສຕໍ່ ໃນຂະນະທີ່ເກສອນກຳລັງກິນຂະໜົມ ມັງກອນເລີຍນຳກ້ອງອອກມາຈາກຖົງມາຖ່າຍຮູບວິວນອກຮ້ານ, ຖ່າຍທາງ, ຖ່າຍຄົນ, ຖ່າຍລົດ ແລະ ກໍ່ຖ່າຍເກສອນ 2-3 ທ່າ
ເກສອນຖາມມັງກອນດ້ວຍສີໜ້າຍິ້ມແຍ້ມ: ກິນແລ້ວໆ! ອອກຈາກຮ້ານແລ້ວເຮົາສິໄປໃສຕໍ່
ມັງກອນຕອບດ້ວຍສີໜ້າເສີຍໆ: ກັບບ້ານໃຜບ້ານມັນ
ເກສອນ: ອ້າວ! ຄືວ່າສິໄປເລາະຖ່າຍຮູບ
ມັງກອນ: ຂໍໂທດເດີ້! ມື້ນີ້ຂ້ອຍຮູ້ສຶກບໍ່ສະບາຍ! ຮູ້ສຶກເໝື່ອຍຢາກພັກຜ່ອນ
ເກສອນ: ເປັນໄປໄດ້ແນວໃດມື້ວານຍັງເຫັນເພິ່ນດີໆຢູ່
ມັງກອນ: ນັ້ນເລື່ອງຂອງມື້ວານ!
ເມື່ອເວົ້າຈົບມັງກອນກໍ່ລຸກຍ່າງອອກຈາກຮ້ານປ່ອຍເກສອນໃຫ້ຢູ່ກັບຄວາມຫົດຫູໃຈໃນຮ້ານພຽງລຳພັງ ເກສອນຫອບຄວາມເສຍໃຈແລະຜິດຫວັງສຸດໆຂັບລົດກັບບ້ານດ້ວຍນ້ຳຕານອງໜ້າເມື່ອໄປຮອດເຮືອນກໍ່ຟ້າວແລ່ນຂຶ້ນໄປໄຫ້ຕໍ່ໃນຫ້ອງນອນ
ມາລີເມື່ອກັບຈາກຄຣີນິກປົວສັດກໍ່ພາຕີ໋ນ້ອຍ (ໝາ) ໄປນອນພັກທີ່ເຮືອນໝາ ມາລີເອົາມືລູບຫົວຕີ໋ນ້ອຍເບົາໆ
ມາລີ: ຕີ໋ນ້ອຍ! ອົດທົນເຈັບໄປກ່ອນເດີ້! ອີກບໍ່ດົນໝໍບອກວ່າເຈົ້າຈະກັບມາຍ່າງໄດ້ຄືເກົ່າ
ທັນໃດນັ້ນໂທນີກໍ່ຈູງຫລິວຫລິວ (ໝາ)ຍ່າງມຸ່ງໜ້າມາຫາມາລີກັບຕີ໋ນ້ອຍ ຫຼິວຫຼິວໄດ້ແລ່ນໄປເລຍໃບຫູມາລີທີ່ກຳລັງນັ່ງລູບຫົວຕີ໋ນ້ອຍຢູ່ຈົນມາລີຕົກໃຈ
ມາລີ: ອ້າວ! ຫຼິວຫຼິວ ຕົກໃຈໝົດ
ໂທນີ: ຕີ໋ນ້ອຍເປັນແນວໃດໄດ້ຂ່າວວ່າເຊົ້ານີ້ຖືກລົດຕຳ
ມາລີລຸກຂຶ້ນຍືນລົມກັບໂທນີ: ຕີ໋ນ້ອຍຂາຫັກ ແຕ່ໝໍເຮັດການຜ່າຕັດໃຫ້ມັນແລ້ວ ແຕ່ກໍ່ຕ້ອງພາໄປຄຣີນິກຕະຫຼອດເພື່ອກວດເບິ່ງອາການຢ່າງໃກ້ຊິດ
ໂທນີນັ່ງລົງແລ້ວເອົາລູບຫົວຕີ໋ນ້ອຍເບົາໆ: ຄົງເຈັບແຮງແມ່ນບໍ່! ອີກດົນລະເນາະຈິ່ງຈະສາມາດມາແລ່ນຫຼິ້ນກັບອ້າຍຫຼິວຫຼິວໄດ້! ແລ້ວລົດທີ່ຕຳມັນເປັນແນວໃດ
ມາລີ: ຄົນບໍ່ບາດເຈັບຫຍັງ ມີແຕ່ລົດລົ້ມໂກບແຕກ ແມ່ໄດ້ຮັບຜິດຊອບປ່ຽນໂກບລົດໃໝ່ໃຫ້ເຂົາເຈົ້າແລ້ວ
ໂທນີ: ດີແລ້ວລ່ະທີ່ຄົນບໍ່ເຈັບ! ລ້ຽງໝາແຄມທາງຕ້ອງເອົາໃຈໃສ່ໃຫ້ຫຼາຍ ຢ່າປ່ອຍໃຫ້ມັນແລ່ນອອກໄປຫຼິ້ນນອກທາງ ເພາະມັນອັນຕລາຍ
ມາລີ: ແຕ່ລະມື້ມັນກໍ່ບໍ່ໄດ້ອອກໄປໃດ໋ ມື້ນີ້ສົງໃສມັນລັກອອກໄປນອກພ້ອມພໍ່
ເວົ້າແລ້ວມາລີກໍ່ຄິດອອກວ່າມີຂອງຈະໃຫ້ກັບໂທນີ: ໂທນີຖ້າຂ້ອຍຢູ່ນີ້ແປັບໜຶ່ງເດີ້ ມີຂອງຈະໃຫ້
ມາລີຟ້າວແລ່ນເຂົ້າໄປໃນເຮືອນຂຶ້ນໄປທີ່ຫ້ອງນອນ ແລະ ຈັບເອົາສາຍແຂນທັກເຊືອກທີ່ວາງໄວ້ໜ້າໂຕະແຕ່ງໜ້າແລ້ວກໍ່ຟ້າວນຳມັນມາມອບໃຫ້ໂທນີ
ມາລີ: ຂໍມືຂໍແຂນແນ່
ໂທນີຍື່ນແຂນມາໃຫ້ມາລີດ້ວຍສີໜ້າງົງໆ ແລ້ວມາລີກໍ່ເອົາສາຍແຂນເຊືອກນັ້ນໃສ່ເຂົ້າໄປທີ່ແຂນຊ້າຍຂອງໂທນີ
ໂທນີ: ນີ້ມັນສາຍແຂນເຊືອກເພິ່ນໃຫ້ເຂົາເຮັດຫຍັງ
ມາລີ: ນີ້ມັນເປັນຂອງລາງນຳໂຊກ! ເຂົາຮູ້ວ່າເພິ່ນຈະໄດ້ເປັນຕົວແທນຂອງໂຮງຮຽນໄປສອບເສັງນັກຮຽນເກັ່ງ ເຂົາກໍ່ເລີຍຮຽນທັກມັນຂຶ້ນມາ! ອາດຈະບໍ່ງາມຄືຂອງທີ່ເຂົາວາງຂາຍ ແຕ່ເສັ້ນນີ້ຮັບຮອງວ່າພິເສດທີ່ສຸດ ມັນຈະຊ່ວຍໃຫ້ເພິ່ນໂຊກດີ ເຮັດຂໍ້ສອບໄດ້ທຸກຂໍ້
ໂທນີຍິ້ມເບົາໆ: ໃສ່ແລ້ວມັນສິບໍ່ຄັນເປັນຜື່ນຂຶ້ນເບາະ! ຕອນທັກມັນເຈົ້າກະລ້າງມືຢູ່ຕີ້
ມາລີເອົາມືຟາດແຂນໂທນີເບົາໆ: ບ້າ! ເຂົາບໍ່ສົກກະປົກປານນັ້ນ
ໂທນີ້ຍິ້ມຕະລົກ: ຈັ່ງໃດກໍ່…ຂອບໃຈເດິ
ໂທນີໄດ້ຜ່ານການສອບເສັງຂັ້ນເມືອງ, ຂັ້ນນະຄອນຫຼວງ ແລະ ຜ່ານເຂົ້າໄປຮອບຂັ້ນເປັນຕົວແທນສອບເສັງລະດັບປະເທດ ມີນັກຮຽນຈາກ 18 ແຂວງທົ່ວປະເທດລາວເຂົ້າຮ່ວມໃນການສອບເສັງນັກຮຽນເກັ່ງໃນລະດັບມັດທະຍົມຕອນປາຍ ໂທນີເອງແມ່ນໄດ້ເປັນຕົວແທນຂອງໂຮງຮຽນ ແລະ ຂອງນະຄອນຫຼວງເສັງໃນວິຊາຄະນິດສາດ
ກ່ອນຮອດມື້ທີ່ສອບເສັງນັກຮຽນເກັ່ງ 1 ມື້ ມາລີໄດ້ໄປບະໄວ້ທີ່ສານພະພູມໜ້າບ້ານຂອງນາງ
ມາລີ: ສາທູ! ປູ່ຍ່າສານພະພູມຂະນ້ອຍຂໍໃຫ້ໂທນີເສັງໄດ້ທີ 1 ລະດັບປະເທດ ຖ້າເປັນໄປຕາມທີ່ຂໍຂະນ້ອຍຈະຖວາຍຫົວໝູ, ເຫຼົ້າໄຫໄກ່ໂຕ ຄຳໝາກກອກຢາ ຂອງຄາວຫວານຄົບ ແລະ ຈະແຖມດ້ວຍການເຕັ້ນ k-pop ເກົາຫຼີໃຫ້ປູ່ກັບຍ່າສານພະພູມເບິ່ງພ້ອມ ຂໍໃຫ້ປູກັບຍ່າຊ່ວຍໂທນີດ້ວຍເຖີດ ສາທຸ
ເຊົ້າວັນສອບເສັງ ມາລີໄດ້ໄປຢືນຖ້າໂທນີທີ່ໜ້າເຮືອນຂອງໂທນີເພື່ອມາສົ່ງ ແລະ ອວຍພອນໃຫ້
ມາລີ: ສູ້ໆເດີ້! ຈະລໍຢູ່ເຮືອນຟັງຂ່າວດີ
ໂທນີ: ອື
ໃນຫ້ອງສອບເສັງບັນຍາກາດມິດຫງຽບ ນັກຮຽນທີ່ເຂົ້າເສັງຕັ້ງໃຈເຮັດຂໍສອບຢ່າງເຕັມທີ່
ວັນປະກາດຜົນໃນທີ່ສຸດຄຳຂໍຂອງມາລີກໍ່ເປັນຈິງ ໂທນີເສັງໄດ້ອັນດັບໜຶ່ງໃນສາຂາວິຊາຄະນິດສາດລະດັບປະເທດ ເພາະຍ້ອນຄວາມເກັ່ງຂອງໂທນີເອງ ຫຼື ຍ້ອນມີສິ່ງສັກສິດຊ່ວຍກໍຕາມ ເມື່ອໂທນີໄດ້ເປັນທີ 1 ມາລີກໍ່ຕ້ອງໄດ້ແກ້ບະຕາມທີ່ເຄີຍບະໄວ້, ຄັ້ງນີ້ມາລີຍອມທຸບກະປຸກໝູເພື່ອນຳເງິນທີ່ທ້ອນໄວ້ໄປຊື້ເຄື່ອງເສັ້ນໄຫວ້ປູ່ຍ່າສານພະພູມ ນອກຈາກນີ້ມາລີຍັງໄດ້ເຕັ້ນ k-pop ທີ່ໜ້າສານພະພູມດັ່ງທີ່ເຄີຍກ່າວໄວ້ ເຊິ່ງມັນໄດ້ສ້າງຄວາມແປກປະຫຼາດໃຈໃຫ້ແກ່ຜູ້ທີ່ພົບເຫັນບໍ່ວ່າຈະເປັນພໍ່ແມ່ຂອງມາລີເອງ ຫຼື ພໍ່ແມ່ຂອງໂທນີ ລວມທັງໂທນີເອງ.
ໂທນີເບິ່ງມາລີເຕັ້ນໄປຂຳໄປພ້ອມທັງຈົ່ມພຶມພຳ: ຄົນອິຫຍັງ! ຂະຫຍັນເຮັດແຕ່ເລື່ອງແປກໆບໍ່ຄືບ້ານບໍ່ຄືເມືອງເພິ່ນ