ເມື່ອວັນທີ່ 31 ສິງຫາ 2014 ເວັບໄຊ ເດລີເມວ ຂອງອັງກິດ ລາຍງານວ່າ ເມ ມຽດ ໂນ (May Myat Noe) ນາງງາມ ມຽນມາ ເຈົ້າຂອງຕຳແໜ່ງມິດເອເຊຍປາຊິຟິກ 2014 ທີ່ຫາກໍ່ຈະຖືກປົດເມື່ອອາທິດກ່ອນ ຈາກນິໄສ ແລະ ພຶດຕິກຳທີ່ບໍ່ ເໝາະສົມໃນການເປັນນາງງາມ ໄດ້ກໍ່ເລື່ອງຊ້ຳອີກ ເມື່ອນາງຫອບມົງກຸດທີ່ຕ້ອງຄືນໃຫ້ກອງປະກວດໜີກັບໄປມຽນມາ ກ່ອນຈະຫາຍຕົວໄປ ແລະ ຕິດຕໍ່ບໍ່ໄດ້ເລີຍ
ລາຍງານ ລະບຸວ່າ ຫລັງຈາກກອງປະກວດມິດເອເຊຍປາຊິຟິກ 2014 ໃນເກົາຫລີໃຕ້ ຫາກໍ່ຈະປົດ ເມ ມຽດ ໂນ ນາງງາມຊາວມຽນມາອາຍຸ 18 ປີ ອອກຈາກຕຳແໜ່ງເມື່ອອາທິດກ່ອນ ເພາະເອືອມລະອາທີ່ນາງມີນິໄສບໍ່ດີ ບໍ່ໃຫ້ກຽດ ແລະ ຂາດຄວາມເຄົາລົບຕໍ່ກອງປະກວດ,ຜູ້ຈັດການແລະ ສື່ ລ່າສຸດ ເມ ມຽດ ໂນ ໄດ້ກາຍເປັນຂ່າວອີກຮອບ ເມື່ອກອງປະກວດທີ່ເກົາຫລີກຳລັງພິຈາລະນາແຈ້ງຕໍ່ເຈົ້າໜ້າທີ່ຕຳລວດ ຫລັງຈາກ ເມ ມຽດ ໂນ ບໍ່ຍອມຄືນມຸງກຸດນາງງາມມູນຄ່າກວ່າ 750,000,000 ກີບ ໃຫ້ກັບກອງປະກວດໜີກັບປະເທດພ້ອມກັບມົງກຸດ ແລະ ຕິດຕໍ່ບໍ່ໄດ້ອີກເຮັດໃຫ້ ຄິມ ອີເຍ ຮອງມິດເອເຊຍປາຊິຟິກ 2014 ທີ່ຄອງຕຳແໜ່ງມິດເອເຊຍປາຊິຟິກຄົນປະຈຸບັນ ຍັງຄົງບໍ່ໄດ້ໃສ່ມົງກຸດຊຶ່ງຄວນຈະຢູ່ເທິງຫົວຂອງນາງເລີຍ
ຂະນະດຽວກັນ ທາງກອງປະກວດໄດ້ອອກມາເວົ້າເຖິງພຶດຕິກຳອັນນຳມາຊຶ່ງການປົດ ເມ ມຽດ ໂນ ອອກຈາກຕຳແໜ່ງວ່າ ຫລັງຈາກທີ່ ເມ ມຽດ ໂນ ໄດ້ຮັບຕຳແໜ່ງມິດເອເຊຍປາຊິຟິກເມື່ອເດືອນພຶກສະພາທີ່ຜ່ານມາ ທາງກອງປະກວດກໍໄດ້ສະ ເໜີທີ່ຈະເຮັດສັນລະຍະກຳໜ້າເອິກໃຫ້ນາງ ເພື່ອເປັນການປັບຮູບຮ່າງໃຫ້ນາງງາມຂຶ້ນ ກ່ອນທີ່ຈະປັ້ນນາງໃຫ້ເປັນນັກຮ້ອງໃນເກົາຫລີໃຕ້ ຊຶ່ງນາງເອງກໍເຊັນສັນຍານີ້ດ້ວຍຕົວເອງ ແຕ່ບັນຫາທັງໝົດເລີ່ມຕົ້ນຂຶ້ນເມື່ອນາງຢາກຈະໃຫ້ແມ່ມາຢູ່ເກົາຫລີໃຕ້ກັບນາງນຳ ເປັນເວລາ 10 ມື້ ຈຶ່ງຂໍໃຫ້ທາງກອງປະກວດອອກຄ່າຍົນ ແລະ ຄ່າໃຊ້ຈ່າຍໃຫ້ແມ່ນາງນຳ ຊຶ່ງກອງປະກວດບໍ່ອານຸມັດ ແຕ່ນາງກໍຍັງຢືນຢັນທີ່ຈະເອົາແມ່ມາຢູ່ດີ ຈົນໃນທີ່ສຸດກອງປະກວດກໍຕ້ອງຍອມເຮັດໃນສິ່ງທີ່ນາງຕ້ອງການ ແຕ່ເມື່ອກອງປະກວດອານຸມັດ ນາງກໍໄດ້ປ່ຽນແຜນໃໝ່ທັນທີ ດ້ວຍການຂະຫຍາຍເວລາໃຫ້ແມ່ມາຢູ່ເກົາຫລີໃຕ້ເປັນເວລາດົນເຖິງ 3 ເດືອນ ສ້າງຄວາມໜັກໃຈໃຫ້ກັບທາງກອງປະກວດຫລາຍ ເພາະນັ້ນໝາຍເຖິງຄ່າໃຊ້ຈ່າຍທີ່ຫລາຍຂຶ້ນໄປອີກ ຂະນະທີ່ນາງ ແລະ ແມ່ກໍເບິ່ງຈະຮຽກຮ້ອງກັບທາງກອງປະກວດແບບບໍ່ເກງໃຈ ໂດຍລະຫວ່າງທີ່ນາງເຂົ້າຮັບການສັນລະຍະກຳໜ້າເອິກນັ້ນ ນາງ ແລະ ແມ່ໄດ້ເອີ່ຍປາກຂໍຫຍັງຫລາຍໆ ຢ່າງທີ່ຫລາຍເກີນໄປ ບໍ່ວ່າຈະເປັນສິ່ງຂອງທີ່ຕ້ອງການ ແລະ ອາຫານທີ່ນາງ ແລະ ແມ່ຢາກຈະກິນ ນອກຈາກນີ້ຍັງມີພຶດຕິກຳອີກຫລາຍຢ່າງທີ່ເຮັດໃຫ້ທາງກອງປະກວດເອືອມລະອາຈົນຕ້ອງປົດ ນາງໃນທີ່ສຸດ
ຢ່າງໃດກໍດີ ກ່ອນໜ້ານີ້ ເມ ມຽດ ໂນ ໄດ້ອອກລາຍກ່າວຫາວ່າ ທາງກອງປະກວດເປັນຄົນບັງຄັບນາງເຮັດສັນລະຍະກຳໜ້າເອິກ ເພື່ອປັ້ນນາງເປັນນັກຮ້ອງ ແລະນາງຈະຈັດງານຖະແຫລງຂ່າວໃນວັນທີ່ 2 ກັນຍານີ້ ຊຶ່ງທາງກອງປະກວດເອງກໍເຊື່ອວ່າ ນາງຈະຕ້ອງຮ້ອງໄຫ້ຕໍ່ໜ້າສື່ມວນຊົນ ແລະ ບອກວ່າຕົວເອງເປັນເຫຍື່ອ ນາງຈະເລີ່ມຕວະ ແລະ ກ່າວຫາກອງປະກວດອີກຄັ້ງ
