ຂປລ. ປັດຈຸບັນ ສະພາບການສັນຈອນໃນນະຄອນຫລວງວຽງຈັນ ມີຄວາມໜາແໜ້ນຂຶ້ນຫລາຍ ຍ້ອນພາຫະນະ
ມີຈຳນວນເພີ່ມຂຶ້ນຢ່າງຕໍ່ເນື່ອງ, ບວກກັບເສັ້ນທາງຫລາຍເສັ້ນແມ່ນຍັງຢູ່ໄລຍະການສ້ອມແປງຄືນໃໝ່ ແລະ
ເສັ້ນທາງຈຳນວນໜຶ່ງຍັງເປ່ເພ, ເປັນບວກ, ເປັນຂຸມ ໄດ້ສ້າງຄວາມສັບສົນໃຫ້ແກ່ການສັນຈອນ. ດັ່ງນັ້ນພະແນກ
ຕຳຫລວດຈາລະຈອນນະຄອນຫລວງ ຈຶ່ງກຳນົດ 69 ຈຸດ ເພື່ອແກ້ໄຂການສັນຈອນແອອັດ ໂດຍສະເພາະໃນໄລຍະ
ເປີດສົກຮຽນໃໝ່.
ທ່ານ ພັຕ ຢຸດຕະພົງ ຮອງຫົວໜ້າຫ້ອງຕຳຫລວດ, ຫົວໜ້າພະແນກຕຳຫລວດຈະລາຈອນນະຄອນຫລວງ ໄດ້ໃຫ້
ຮູ້ເມື່ອມໍ່ໆມານີ້ວ່າ: ໃນການປະຕິບັດ ໜ້າທີ່ແມ່ນມີຄວາມຫຍຸ້ງຍາກຫລາຍດ້ານ ໂດຍສະເພາະ ແມ່ນໂຮງຮຽນທີ່ຢູ່
ຕາມເສັ້ນທາງຫລວງ ແມ່ນຈະເຮັດໃຫ້ການສັນຈອນແອອັດ ຍ້ອນການຈອດລົດຂອງຜູ້ປົກຄອງທີ່ມາສົ່ງລູກຫລານ
ຈອດລົດບໍ່ເປັນລະບຽບ, ຜູ້ຂັບຂີ່ຍັງຂາດສະຕິ, ບໍ່ປະຕິບັດກົດລະບຽບການສັນຈອນ ແລະ ບໍ່ໃຫ້ກຽດກັນ. ປັດຈຸບັນ
ໄດ້ວາງແຜນໃຫ້ໜ່ວຍງານວິຊາສະເພາະ ຈັດຕັ້ງກຳລັງຂອງຕົນລົງແຕ່ລະຈຸດທີ່ມີຄວາມສັບສົນໃນເວລາຮີບດ່ວນ
ຢູ່ຕາມສາມແຍກ-ສີ່ແຍກ ໃຫ້ມີຄວາມຮັບປະກັນຄວາມສະດວກສະບາຍ ແລະ ປອດໄພ 100%.
ໃນໄລຍະເປີດສົກຮຽນໃໝ່ສະພາບການສັນຈອນໂດຍທົ່ວໄປແລ້ວຈະມີຄວາມສັບສົນ ເປັນຕົ້ນແມ່ນທາງສາມແຍກ
-ສີ່ແຍກ ແລະ ໜ້າໂຮງຮຽນ. ສະນັ້ນ, ການສັນຈອນແອອັດ ຈະໃຫ້ແຕ່ເຈົ້າໜ້າທີ່ເປັນຜູ້ແກ້ໄຂພຽງຝ່າຍດຽວ ແມ່ນ
ຍັງບໍ່ໄດ້ຮັບໝາກຜົນດີຕາມທີ່ຄວນ ແລະ ຢາກຝາກ ໃຫ້ຜູ້ຂັບຂີ່ທຸກຄົນຈົ່ງຊ່ວຍກັນປະຕິບັດກົດລະບຽບຈາລະຈອນ
ຢ່າງເຂັ້ມງວດ ແລະ ໃຫ້ກຽດກັນໃນການສັນຈອນ ເພື່ອຊ່ວຍກັນຫລຸດຜ່ອນຄວາມແອອັດ ແລະ ອຸບັດເຫດ.
ທ່ານ ພັຕ ຢຸດຕະພົງ ກ່າວຕື່ມວ່າ: ພະແນກຕຳຫລວດຈະລາຈອນນະຄອນຫລວງ ໄດ້ວາງແຜນແບ່ງກຳລັງໃຫ້ແຕ່
ລະເມືອງໃນການອຳນວຍຄວາມສະດວກໃນມື້ເປີດສົກຮຽນໃໝ່ ຄື: ເມືອງ ສີໂຄດຕະບອງ 12 ຈຸດ ມີເຈົ້າໜ້າທີ່ 30
ສະຫາຍ, ເມືອງ ສີສັດຕະນາກ 14 ຈຸດ ມີເຈົ້າໜ້າທີ່ 34 ສະຫາຍ, ເມືອງຈັນທະບູລີ 17 ຈຸດ ມີເຈົ້າໜ້າທີ່ 34 ສະຫາຍ,
ເມືອງ ໄຊເສດຖາ 11 ຈຸດ ມີເຈົ້າໜ້າທີ່ 26 ສະຫາຍ, ເມືອງໄຊທານີ 8 ຈຸດ ມີເຈົ້າ ໜ້າທີ່ 17 ສະຫາຍ, ເມືອງຫາດຊາຍ
ຟອງ 2ຈຸດ ມີເຈົ້າໜ້າທີ່ 8 ສະຫາຍ ແລະ ເມືອງນາຊາຍທອງ 5 ຈຸດ ມີເຈົ້າໜ້າທີ 15 ສະຫາຍ. ເຊິ່ງລວມຈຸດລະບາຍທັງ
ໝົດ 69 ຈຸດ ແລະ ມີກຳລັງປະຈຳປ້ອມ, ປະຈຳຈຸດລະບາຍທັງໝົດ 370 ສະຫາຍ. ສ່ວນທາງພະແນກຈະລາຈອນແມ່ນ
ຈະວາງກຳລັງເຈົ້າໜ້າທີ່ຢູ່ 10 ຈຸດຄື: ໜ້າຄິວລົດສາຍເໜືອ, ໜ້າຕະຫລາດຂົວດິນ, ວົງວຽນ 450 ປີ, ແຍກກະຊວງ
ປ້ອງກັນປະເທດ, ຈຸດລ້ຽວກັບໜ້າວັດໂພນພະເນົາ, ໂຮງຮຽນ ມ.ປາຍ ລາວ-ຫວຽດ, ແຍກຫລັກ 5, ໄຟອຳນາດ ມສ
ວຽງຈັນ, ແຍກ ມສ ວຽງຈັນ ດ້ານຫລັງ ແລະ ແຍກໜອງສ້າງທໍ່ ໂດຍມີກຳລັງເຈົ້າໜ້າທີ່ 42 ສະຫາຍ.
ໄປພ້ອມກັບການອຳນວຍຄວາມສະດວກປອດໄພແລ້ວ, ທາງເຈົ້າໜ້າທີ່ຕຳຫລວດຈະລາຈອນຍັງປະຕິບັດໜ້າ ທີ່ໃນ
ການໂຄສະນາສຶກສາອົບຮົມຜູ້ຂັບຂີ່ດ້ວຍການແນະນຳກ່ຽວກັບກົດລະບຽບຈະລາຈອນຕາມສາມແຍກ-ສີ່ແຍກ, ໂຮງ
ຮຽນ ແລະ ສະຖານທີ່ຊຸມຊົນ, ວຽກງານປະຈຳປ້ອມ ເພື່ອອຳ ນວຍຄວາມສະດວກໃຫ້ຜູ້ຂັບຂີ່ໃນເວລາຮີບດ່ວນ, ວຽກ
ງານແກ້ໄຂອຸບັດເຫດຕາມທ້ອງຖະໜົນຫລວງ ພ້ອມທັງຕິດຕັ້ງກ້ອງວົງຈອນປິດ ເພື່ອຕິດຕາມການແກ້ໄຂການສັນ
ຈອນຕາມເສັ້ນທາງບ່ອນທີ່ແອອັດ, ຈັດສັນຄວາມເປັນລະບຽບຮຽບຮ້ອຍຕາມເສັ້ນທາງສາມແຍກ-ສີ່ແຍກ ແລະ
ກວດກາພາຫະນະທີ່ລະເມີດຕໍ່ກົດລະບຽບຈະລາຈອນ ແລະ ກົດໝາຍ.
ແຫຼ່ງຂ່າວ: ສຳນັກຂ່າວສານປະເທດລາວ