spot_img
Homeຂ່າວທ້ອງຖິ່ນລາວເຂົ້າຮ່ວມກອງປະຊຸມສາກົນຄັ້ງທີ 19 ບັນດາພັກກອມມູນິດ ແລະ ກຳມະກອນທີ່ ຣັດເຊຍ

ລາວເຂົ້າຮ່ວມກອງປະຊຸມສາກົນຄັ້ງທີ 19 ບັນດາພັກກອມມູນິດ ແລະ ກຳມະກອນທີ່ ຣັດເຊຍ

Published on

ໂດຍ​ຕອບ​ສະ​ໜອງ ​ຕາມ​ການ​ເຊື້ອ​ເຊີນ ​ຂອງ​ພັກ​ກອມ​ມູ​ນິດ ສະ​ຫະ​ພັນ​ຣັດ​ເຊຍ, ຄະນະ​ຜູ້​ແທນ​ພັກ ປປ ລາວ ນຳ​ໂດຍ ສະຫາຍ ສົມ​ດີ ບຸນ​ຄຸ້ມ ​​ຮອງຫົວໜ້າຄະນະ​ພົວພັນ​ ຕ່າງປະ​ເທດ​ສູນ​ກາງ​ພັກ ໄດ້​ເດີນ ທາງ​​​ໄປ​ເຂົ້າ​ຮ່ວມ​ ກອງ​ປະ​ຊຸມ​ສາກົນຄັ້ງ ທີ 19 ຂອງບັນດາພັກ​ກອມ​ມູນິດ ​ແລະ ກຳມະກອນ ​ແລະ ພິ​ທີ​ສະ​ເຫລີມ​ສະຫລອງ​ ວັນ​ມະ​ຫາ​ປະ​ຕິ​ວັດ​ສັງ​ຄົມ​ນິ​ຍົມ ເດືອນ​ຕຸ​ລາ ຄົບ​ຮອບ 100 ປີ​, ເຊິ່ງຈັດ​ຂຶ້ນຢູ່​ນະ​ຄອນເຊັນ​ປີ​ເຕີ​ສະ​ເບິກ ແລະ ນະ​ຄອນຫລວງ​ມົດ​ສກູ ສະ​ຫະ​ພັນຣັດ​ເຊຍ​ ແຕ່​ວັນ​ທີ 2-7 ພະ​ຈິກ 2017, ​ພາຍ​ໃຕ້​ຫົວ​ຂໍ້: “ວັນ​ຄົບ​ຮອບ 100 ປີ ຂອງ​ມະ​ຫາ​ປະ​ຕິ​ວັດ ສັງ​ຄົມ​ນິ​ຍົມເດືອນ​ຕຸ​ລາ, ອຸ​ດົມ​ການ​ຂອງຂະ​ບວນ​ການກອມ​ມູ​ນິດ, ການ​ຟື້ນ​ຟູ​ການ​ຕໍ່​ສູ້ຕ້ານ​ສົງ​ຄາມ ຂອງ​ຈັກ​ກະ​ພັດ, ເພື່ອ​ສັນ​ຕິ​ພາບ ແລະ​ ສັງ​ຄົມ​ນິ​ຍົມ”. ໃນ​​ກອງ​ປະ​ຊຸມສາ​ກົນຄັ້ງ​ນີ້, ມີ​ບັນ​ດາຜູ້​ແທນ​ ຂອງພັກ​ກອມ​ມູນິດ ​ແລະ ກຳມະກອນຈຳນວນ 103 ພັກການເມືອງ ທີ່ມາຈາກ 77 ປະ​ເທດ​ເຂົ້າ​ຮ່ວມ.

ສະຫາຍ ສົມ​ດີ ບຸນ​ຄຸ້ມ ຫົວ​ໜ້າ​ຄະ​ນະ​ຜູ້​ແທນພັກ ປ​ປ ລາວ ໄດ້​ຂຶ້ນ​ປະ​ກອບ​ຄຳ​ເຫັນ​, ໂດຍ​ໄດ້​ກ່າວ​ເຖິງ​ ຄວາມ​ໝາຍ​ສຳ​ຄັນ​ ຂອງມະ​ຫາ​ປະ​ຕິ​ວັດ​ສັງຄົມນິຍົມ ເດືອນ​ຕຸ​ລາຣັດ​ເຊຍ ຕໍ່​ບັນ​ດາ​ປະ​ຊາ​ຊາດ​ ຢູ່​ໃນ​ໂລກ, ພິ​ເສດ ​ແມ່ນ​ຕໍ່ກັບ ສ​ປ​ປ ລາວ. ບັນ​ດາ​ຜູ້​ແທນ​ໄດ້​ປະກອບ​ຄຳ​ເຫັນ, ໂດຍ​ໄດ້​ເນັ້ນ​ໜັກ​ໃຫ້​ເຫັນ​ເຖິງ​ບົດ​ບາດ ແລະ ຄວາມ​ສຳ​ຄັນ​ຂອງ​ ມະ​ຫາ​​ປະ​ຕິ​ວັດສັງ​ຄົມ​ນິ​ຍົມ ເດືອນ​ຕຸ​ລາຣັດ​ເຊຍ ທີ່​ມີ​ຕໍ່​ຂະ​ບວນ​ການກອມ​ມູ​ນິດ ແລະ ກຳ​ມະ​ກອນ​ສາ​ກົນ ໃນ​ການ​ຕໍ່​ສູ້​ເພື່ອ​ຄວາມ ​ເປັນ​ເອ​ກະ​ລາດແຫ່ງ​ຊາດ​, ເພື່ອ​ສັນຕິ​ພາບ, ເພື່ອ​ສິດ​ທິ​ຂອງ​ກຳ​ມະ​ກອນ ແລະ ເພື່ອ​ສັງ​ຄົມ​ນິ​ຍົມ. ກອງ​ປະ​ຊຸມໄດ້​ຍົກ​​ໃຫ້​ເຫັນເຖິງ​ ສະ​ພາບ​ການໃນ​ພາກ​ພື້ນ​ຕ່າງໆ​ຂອງ​ໂລກ ​ທີ່ພວມ​ມີ​ການ​ຜັນ​ແປ​ຢ່າ​ງ​ໄວ​ວາ, ສັບ​ສົນຍ້ອນ​ທາດ​ແທ້​ ກະ​ຫາຍ​ສົງ​ຄາ​ມ​ ຂອງ​ພວກ​ຈັກ​ກະ​ພັດ ແລະ​ ທຶນ​ນິ​ຍົມ, ຊຶ່ງ​ເປັນບັນ​ຫາ​​ທ້​າທາຍລວມ ​ຕໍ່​ຂະ​ບວນ​ການກອມ​ມູ​ນິດ, ກຳ​ມະ​ກອນສາ​ກົນ ແລະ ປະ​ຊາ​ຊົນຂອງ​ປະ​ເທດ​ຕ່າງໆ​ໃນ​ໂລກ​. ກອງ​ປະ​ຊຸມ​ໄດ້​ຊີ້​ໃຫ້​ເຫັນ​ວ່າ ມະ​ຫາ​​ປະ​ຕິ​ວັດສັງຄົມນິຍົມ ເດືອນ​ຕຸ​ລາ​ຣັດ​ເຊຍ 1917 ໄດ້​ໄຂ​ສັງ​ກາດ​ໃໝ່-ສັງ​ກາດ​ ແຫ່ງ​ການຂ້າມຜ່ານ ຈາກ​ທຶນ​ນິ​ຍົມໄປ​ສູ່​ສັງ​ຄົມ​ນິ​ຍົມ ໃນ​ຂອບ​ເຂດ​ທົ່ວ​ໂລກ, ໄດ້​ສ້າງ​ລັດ​ກຳ​ມະ​ກອນ ລັດ​ທຳ​ອິດ​ໃນ​ປະ​ຫວັດ​ສາດ ຂອງມວນ​ມະ​ນຸດ, ໄດ້​ເຮັດ​ໃຫ້​ລັດ​ສັງ​ຄົມ​ນິ​ຍົມ ກຳເນີດເກີດຂຶ້ນ ຈາກແນວຄວາມຄິດ ກາຍມາເປັນຄວາມເປັນຈິງ, ​ຈາກ​ທິດ​ສະ​ດີ ກາຍ​ມາ​ເປັນ​ພຶດ​ຕິ​ກຳ​ຕົວ​ຈິງ ແລະ ເປັນ​ແວ່ນ​ແຍງ​ອັນ​ໃສ​ແຈ້ງ​ ໃຫ້​ແກ່​ປະ​ຊາ​ຊາດ ທີ່​ດຳ​ເນີນ​ການ​ຕໍ່​ສູ້​ເພື່ອ​ເອ​ກະ​ລາດ​ແຫ່ງ​ຊາດ ແລະ ກ້າວ​ຂື້ນ​ສູ່ສັງ​ຄົມ​ນິ​ຍົມ​ ໃນ​ໄລ​ຍະ​ຕໍ່​ມາ.

​ກອງ​ປະ​ຊຸມສາກົນ​ຄັ້ງ​ນີ້, ​ໄດ້​ປະສົບ​ຜົນສຳ​ເລັດ ​ຢ່າງ​ຈົບງາມ, ບັນ​ດາຄະນະ​ຜູ້​ແທນ ໄດ້​​ເປັນ​​​ເອກະ​ພາບ ຮັບຮອງ​ເອົາຄຳຮຽກຮ້ອງ ຂອງກອງ​ປະ​ຊຸມ​ສາກົນ ຄັ້ງທີ 19 ຂອງບັນດາພັກ​ກອມ​ມູນິດ ​ແລະ ກຳມະກອນ​ ທີ່​ເນັ້ນ​ເຖິງ​ຄວາມໝາຍສຳຄັນ ອັນເປັນປະຫວັດສາດ ຂອງມະຫາປະຕິວັດສັງຄົມນິຍົມ ເດືອນຕຸລາ ຣັດເຊຍ, ຮຽກຮ້ອງໃຫ້ມີການ ປະສານສົມທົບກັນຢ່າງແໜ້ນແຟ້ນ ເພື່ອຕ້ານການຮຸກຮານ ຂອງຈັກກະພັດ ເພື່ອອະທິປະໄຕ, ເອກະລາດແຫ່ງ ຊາດ, ສັນຕິພາບ, ຄວາມກ້າວໜ້າທາງສັງຄົມ ແລະ ສັງຄົມນິຍົມ.

ນອກ​ຈາກເຂົ້າ​ຮ່ວມ ກອງ​ປະ​ຊຸມແລ້ວ, ຄະ​ນະ​ຜູ້​ແທນ​ເຮົາ ຍັງ​ໄດ້ເຂົ້າຮ່ວມກິດຈະກຳຕ່າງໆ ເພື່ອສະເຫລີມສະຫລອງ 100 ປີ ມະຫາປະຕິວັດສັງຄົມນິຍົມ ເດືອນຕຸລາຣັດເຊຍ ແລະ ​ໄດ້ເຄື່ອນໄຫວພົບ​ປະ​ກັບ ຄະ​ນະ​ຜູ້​ແທນ​​ປະ​ເທດ​ຕ່າງໆ ທີ່ເຂົ້າຮ່ວມການພົບປະສາກົນຄັ້ງນີ້.

 

ແຫລ່ງຂ່າວ: ສຳນັກຂ່າວສານປະເທດລາວ.

ບົດຄວາມຫຼ້າສຸດ

TECNO CAMON 40 Pro ຈະເປີດໂຕໃນລາວໃນວັນທີ 21 ເດືອນ 04 ນຳເທຣນ ໃໝ່ແຫ່ງການຖ່າຍຮູບດ້ວຍໂທລະສັບ

TECNO CAMON 40 Pro ຈະເປີດໂຕໃນລາວໃນວັນທີ 21 ເດືອນ 04 ນຳເທຣນ ໃໝ່ແຫ່ງການຖ່າຍຮູບດ້ວຍໂທລະສັບ TECNO CAMON 40 Pro ສະມາດໂຟນ...

ລວມພາບບັນຍາກາດສຸດຮ້ອນແຮງຈາກ Mistine ມາຝາກ

ພາບບັນຍາກາດສຸດມ່ວນຈາກ Mistine ໃນເທດສະການປີໃໝ່ລາວ 2025. Mistine ແບຣນເຄື່ອງສຳອາງດຽວທີ່ມາແຈກຄວາມມ່ວນ ຄວາມມັນໃຫ້ທຸກຄົນໃນເທດສະການປີໃໝ່ລາວ 2025 ເພາະໃນບູດມີແຈກຄີມກັນແດດ ແລະ ລິບສະຕິກຟຣີ!! ພ້ອມກັບຈຸດເຕີມນ້ຳ ແລະ DJ ເປີດເພງໃຫ້ໄດ້ເຕັ້ນຈົນລືມຮ້ອນບອກເລີຍວ່າເຖິງຈະບໍ່ມີເຄື່ອງດື່ມ...

ລັດຖະບານ ໂດນັລ ທຣຳ ປະທານາທິບໍດີແຫ່ງສະຫະລັດ ພິຈາລະນາປິດສະຖານທູດ-ສະຖານກົງສຸນຕ່າງປະເທດ ເກຶອບ 30 ແຫ່ງ.

ລັດຖະບານ ໂດນັລ ທຣຳ ປະທານາທິບໍດີແຫ່ງສະຫະລັດ ພິຈາລະນາປິດສະຖານທູດ-ສະຖານກົງສຸນຕ່າງປະເທດ ເກຶອບ 30 ແຫ່ງ. ສຳນັກຂ່າວຕ່າງປະເທດລາຍງານໃນວັນທີ 16 ເມສາ 2025 ນີ້ວ່າ: ລັດທະບານຂອງປະທານາທິບໍດີ ໂດນັລ...

“ປະຫວັດຄວາມເປັນມາຂອງບຸນປີໃໝ່ລາວ” (ປະຫວັດນາງສັງຂານເທບພະທິດາທັງ 07)

"ປະຫວັດຄວາມເປັນມາຂອງບຸນປີໃໝ່ລາວ"(ປະຫວັດນາງສັງຂານເທບພະທິດາທັງ 07) ຄວາມເປັນມາຂອງນາງສັງຂານ (ບຸນປີໃໝ່ລາວ) ໃນອະດີດຕະການດົນນານມາແລ້ວ... ໃນສະໄໝນັ້ນມີເຈົ້າຜູ້ຄອງເມືອງສະຫວັນອົງໜື່ງຊື່ "ພະຍາກະບິນລະພຣົມ" ເປັນຄົນມີພູມປັນຍາສະຫຼາດອາດຫານເກັ່ງກ້າສາມາດບໍ່ມີຜູ້ໃດມາທຽມໄດ້ເປັນເທບແຫ່ງສວງສະຫວັນວິມານຊັ້ນຟ້າ (ຊັ້ນພຣົມ), ຢູ່ມາມື້ໜຶ່ງບັນດາເສນາອາມາດໄດ້ຮູ້ຂ່າວວ່າມີຊາຍໜຸ່ມຄົນໜື່ງໃນໂລກມະນຸດສະຫຼາດຫຼັກແຫຼມເປັນນັກປຣາດບັນດິດຈື່ງເຊີນເຂົ້າມາໃນເມືອງສະຫວັນເພື່ອທ້າສະໝອງລອງປັນຍາດ້ວຍເຫດເລົ່າກັນມາມີດັ່ງນີ້: "ພະຍາກະບິນລະພຣົມ" ຈຶ່ງໄດ້ທ້າສະໝອງລອງປັນຍາ ກັບທ່ານນັກປຣາດຜູ້ຮຽນຈົບໄຕຼເພດ (ຄວາມຮູ້ຂັ້ນສູງສາມຢ່າງ ໄດ້ແກ່...