ປ້າພົມ ເຄີຍໄດ້ເປັນພະນັກງານເຮັດວຽກຢູ່ກະຊວງການຄ້າ, ຢູ່ມາຮອດໄລຍະໜຶ່ງຍ້ອນອາຍຸກະສຽນເພິ່ນຄົບກຳນົດພັກຜ່ອນ, ພັກແລະລັດຖະບານຈຶ່ງໄດ້ອະນຸມັດໃຫ້ເພິ່ນອອກບຳນານ, ແຕ່ຍ້ອນຄວາມກະຕືລືລົ້ນ, ຄວາມອົດທົນພາກພຽນຂອງເພິ່ນຍັງຕິດຫ້ອຍມານຳຕະຫຼອດ, ຈຶ່ງໄດ້ຫັນມາເຮັດທຸລະກິດຄ້າຂາຍຢູ່ເຮືອນ,ເພື່ອເປັນການສ້າງລາຍຮັບປະຈຳວັນໃຫ້ແກ່ຄອບຄົວ. ຮ້ານປີ້ງເປັດ ປ້າພົມ ຕັ້ງຢູ່ແຄມທາງບ້ານຈອມມະນີໜ່ວຍ 34, ເມືອງໄຊເຊດຖາ, ນະຄອນຫຼວງວຽງຈັນ, ຍາມແລງມາຝຸງຄົນທຽວຜ່ານໄປ-ມາໄດ້ສູບເອົາກິ່ນອາຍການປີ້ງຈີ່ຈາກຮ້ານແລ້ວ ອົດໃຈໄວ້ບໍ່ໄດ້ຈຶ່ງຕ້ອງໄດ້ແວ່ເອົາຜູ້ລະຈານ-ສອງຈານແກ້ມກັບເຄື່ອງດື່ມຫົວເສືອເຫັນວ່າເຂົ້າກັນອໍ່າລໍ່າ…
ປ້າພົມ ເຖິງແມ່ນວ່າປີນີ້ອາຍຸລາວໄດ້ 76 ປີແລ້ວກໍຕາມ, ແຕ່ອາຍຸເປັນພຽງຕົວເລກ, ສິ່ງສໍາຄັນຄືຈິດໃຈຍັງເຂັ້ມແຂງ, ສຸຂະພາບຂອງເພິ່ນກໍຍັງແຂງແຮງດີ, ບວກກັບຄວາມອົດທົນພາກພຽນຂອງເພິ່ນທີ່ເຄີຍສູ້ຊີວິດມາແລ້ວ ແລະມາຮອດປັດຈຸບັນເພິ່ນກໍຍັງມາສູ້ຊົນໝົ້ນທຸກຢູ່ກັບວຽກກັບງານຄຽງບ່າຄຽງໄລ່ແລະເປັນຮົ່ມໂພຮົ່ມໄຊໃຫ້ກັບລູກກັບຫຼານໄດ້ຢູ່ອາໄສ.
ນ.ສຸພາວັນ ລູກສາວ ປ້າພົມເຈົ້າຂອງຮ້ານປີ້ງເປັດໄດ້ໃຫ້ສໍາພາດກັບນັກຂ່າວພວກເຮົາຮູ້ວ່າ: ແມ່ໄດ້ພາຄ້າຂາຍນັບແຕ່ປີ 1985, ຕັ້ງແຕ່ສະໄໝຍັງບໍ່ທັນໄດ້ປັບປຸງແລະປົວແປງເສັ້ນທາງ, ເບື້ອງຕົ້ນຕັ້ງເປັນຮ້ານນ້ອຍໆ ຂາຍຂອງກິນສຸກ, ຂາຍເຂົ້າປຽກເຮັດໄດ້ 2 ປີ, ເຫັນວ່າລາຍຮັບບໍ່ໄດ້ດີປານໃດຈິ່ງໄດ້ຕັດສິນໃຈຫັນມາເຮັດປີ້ງເປັດຂາຍໃນປີ 1987-88, ໂດຍຍັງໄດ້ນໍາໃຊ້ຮ້ານນ້ອຍໆ ຮ້ານເກົ່າ, ການເຮັດທຸລະກິດປີ້ງເປັດຂາຍໄປໄດ້ໄລຍະໜຶ່ງປາກົດວ່າທຸລະກິດນີ້ໄປໄດ້ດີ, ເພາະໄດ້ສັງເກດແລະຕິດຕາມລາຍຮັບແຕ່ລະມື້ແມ່ນໄດ້ດີກວ່າການເຮັດຂອງກິນສຸກຂາຍຈິ່ງໄດ້ຕັດສິນໃຈສືບຕໍ່. ຈາກລາຍຮັບທີ່ໄດ້ມາແຕ່ລະວັນຈຶ່ງສາມາດມາຕັ້ງຮ້ານໃໝ່ເປັນຮ້ານໃຫຍ່ກວ່າເກົ່າ, ເຊິ່ງໄດ້ລົງທຶນ ປະມານ 2.000.000-3.000.000ກີບ/ວັນ, ສ່ວນລາຍຮັບໄດ້ປະມານ 3.000.000-4.000.000ກີບ/ວັນ, ໃນນັ້ນລວມທັງກໍາໄລພ້ອມ. ພາຍໃນຮ້ານມີແຮງງານທັງໝົດ 8 ແຮງງານ, ແຕ່ລະມື້ຈະມີຂາປະຈໍາມາສົ່ງເປັດເປັນໆໃຫ້ຢູ່ຮ້ານມື້ລະ 20 ກວ່າໂຕ. ອາຫານແຕ່ລະເຍື່ອງປຸງແຕ່ງແຊບ, ເຮັດແບບທຳມະຊາດ, ສະອາດ, ຖືກຫຼັກອະນາໄມໂດຍບໍ່ໄດ້ຍ້ອມສີອາຫານ, ເຮັດໃຫ້ລູກຄ້າ-ຂາປະຈຳຖືກໃຈແລະພໍໃຈຫຼາຍກັບລົດແຊບແບບທຳມະຊາດຂອງອາຫານ.
ຕາມການບອກເລົ່າຈາກ ນາງ ສອນໄຊ ຜູ້ເປັນຫຼານສາວເຈົ້າຂອງຮ້ານໃຫ້ຮູ້ຕື່ມອີກວ່າ, ນັບແຕ່ໄດ້ມີທຸລະກິດເຮັດປິ້ງເປັດຂາຍມາຮອດປັດຈຸບັນນີ້ເຫັນວ່າຊີວິດການເປັນຢູ່ພາຍໃນຄອບຄົວຂອງເພິ່ນດີຂຶ້ນຫຼາຍກວ່າແຕ່ກ່ອນ, ເພາະມີລາຍຮັບປະຈຳວັນ, ປະຈຳເດືອນມາອຸດໜູນຄອບຄົວຢ່າງສະໝໍ່າສະເໝີ, ມີດິນມີເຮືອນເປັນຂອງຕົນເອງ, ສະມາຊິກຄອບຄົວພ້ອມດ້ວຍລູກຫຼານທຸກຄົນໄດ້ມີວຽກເຮັດງານທຳ, ມີລາຍຮັບເປັນຂອງຕົນເອງ, ເຮັດໃຫ້ຄອບຄົວໄດ້ລຸດພົ້ນອອກຈາກຄວາມທຸກຍາກໄດ້ຢ່າງຊິ້ນເຊີງ.
ປ້າພົມ ເຈົ້າຂອງຮ້ານໄດ້ໃຫ້ສໍາພາດກັບນັກຂ່າວພວກເຮົາຮູ້ຕື່ມອີກວ່າ: ຕົນເອງມີຄວາມພູມໃຈຫຼາຍທີ່ໄດ້ມີກິດຈະການເປັນຂອງຕົນເອງ, ເພາະວ່າບັ້ນປາຍຊີວິດຢ່າງໜ້ອຍກໍພໍໄດ້ເປັນຮົ່ມໂພຮົ່ມໃຊໃຫ້ລູກໃຫ້ຫຼານໄດ້ເພິ່ງພາອາໄສ, ສ້າງວຽກເຮັດງານທຳໃຫ້ເຂົາເຈົ້າໄດ້ມີຢູ່ມີກິນ, ມີລາຍຮັບເປັນຂອງຕົນເອງ, ມີທຶນຊຸກຍູ້ການສຶກສາໃຫ້ລູກໆຫຼານໆໄດ້ຮໍ່າໄດ້ຮຽນ, ມີທຶນໝູນວຽນເພື່ອສືບຕໍ່ເຮັດທຸລະກິດຄ້າຂາຍ, ມີດິນ, ມີເຮືອນເປັນຂອງຕົນເອງ, ມີພາຫະນະຮັບໃຊ້ພາຍໃນຄອບຄົວຢ່າງພຽງພໍ ແລະມາຮອດປັດຈຸບັນນີ້ຄອບຄົວກໍໄດ້ຫຼຸດພົ້ນອອກຈາກຄວາມທຸກຍາກແລ້ວ.
