ເຈົ້າໜ້າທີ່ກອງບັນຊາການ ປກສ ແຂວງບໍ່ແກ້ວ ສປປ ລາວ ໄດ້ມອບຕົວ ທ້າວ ໂກວິດ ແຊຊົງ ອາຍຸ 28 ປີ ເຊື້ອຊາດໄທ ສັນຊາດໄທ ຢູ່ບ້ານສາມ ເມືອງເທີງ ແຂວງຊຽງຮາຍ ປະເທດໄທ ຜູ້ຖືກຫາຄະດີຄ້າຂາຍຢາເສບຕິດ ໃຫ້ເຈົ້າໜ້າທີ່ຕໍາຫຼວດໄທ ພາຍຫຼັງເຈົ້າໜ້າທີ່ຕໍາຫຼວດລາວຊ່ວຍຈັບ ໃນຂະນະທີ່ເອົາຕົວລີ້ຊ້ອນຢູ່ແຂວງບໍ່ແກ້ວ ເພື່ອໄປດໍາເນີນຄະດີຕາມກົດໝາຍ.
ພັຕ ສົມປອງ ແກ້ວປັນຍາ ຫົວໜ້າພະແນກຕໍາຫຼວດກວດຄົນເຂົ້າ-ອອກເມືອງ ຫົວໜ້າດ່ານ ຕມ ຂົວມິດຕະພາບ 4 ປກສ ແຂວງບໍ່ແກ້ວ ໃຫ້ຮູ້ວ່າ: ຜູ້ຖືກຫາລາຍນີ້ ແມ່ນພົວພັນກັບຄະດີ ມີຢາເສບຕິດໄວ້ໃນຄອບຄອງຢູ່ປະເທດໄທ ແລ້ວໄດ້ເອົາຕົວຫຼົບໜີມາຢູ່ແຂວງບໍ່ແກ້ວ ໃນວັນທີ 1 ກັນຍາ 2017, ມາຮອດວັນທີ 6 ກັນຍາ 2017 ຈຶ່ງໄດ້ຖືກເຈົ້າໜ້າທີ່ ປກສ ແຂວງບໍ່ແກ້ວ ກັກຕົວໃນຂໍ້ຫາລັກລອບເຂົ້າ-ອອກເມືອງຜິດກົດໝາຍ ແລ້ວປະສານຫາເຈົ້າໜ້າທີ່ຕຳຫຼວດໄທ ເພື່ອສົ່ງຕົວໄປດໍາເນີນຄະດີຕາມກົດໝາຍ.
ພິທີມອບຕົວຜູ້ຖືກຫາດັ່ງກ່າວ ໄດ້ຈັດຂຶ້ນໃນທ້າຍອາທິດຜ່ານມາ ຢູ່ ຕມ ສາກົນ ຂົວມິດຕະພາບ 4 ເມືອງຫ້ວຍຊາຍ ແຂວງບໍ່ແກ້ວ ໂດຍການຕາງໜ້າມອບຂອງ ພັຕ ສົມປອງ ແກ້ວປັນຍາ ຫົວໜ້າພະແນກຕໍາຫຼວດກວດຄົນເຂົ້າ-ອອກເມືອງ ຂົວມິດຕະພາບ 4, ຝ່າຍໄທ ກ່າວຮັບໂດຍ ພັທ ຍິງ ຫະໄທລັດ ຈຸນລະສາດ ຫົວໜ້າດ່ານ ຕມ ຂົວມິດຕະພາບ 4 ຊຽງຂອງ ແຂວງຊຽງຮາຍ ປະເທດໄທ.
ຂ່າວຈາກ: ໜັງສືພິມ ປກສ.