ກອງປະຊຸມລັດຖະບານສະໄໝສາມັນ ປະຈຳເດືອນຕຸລາ 2017 ຈັດຂຶ້ນວັນທີ 24-25 ຕຸລານີ້ ເຊິ່ງບັນດາສະມາຊິກລັດຖະບານ ແລະ ພາກສ່ວນກ່ຽວຂ້ອງ ໄດ້ພ້ອມກັນພິຈາລະນາ ແລະ ຕົກລົງເຫັນດີເປັນເອກະພາບຫຼາຍບັນຫາ ເພື່ອເປັນເປົ້າໝາຍ ແລະ ເປັນບ່ອນອີງໃນການຈັດຕັ້ງປະຕິບັດໃຫ້ສຳເລັດຕາມຄາດໝາຍທີ່ວາງໄວ້.
ວັນທີ 26 ຕຸລາ 2017 ທີ່ ສນຍ ທ່ານ ຈະເລີນ ເຢຍປາວເຮີ ລັດຖະມົນຕີປະຈຳສຳນັກງານນາຍົກລັດຖະມົນຕີ ທັງເປັນໂຄສົກລັດຖະບານ ໄດ້ຖະແຫຼງຂ່າວກ່ຽວກັບຜົນກອງປະຊຸມດັ່ງກ່າວວ່າ: ກອງປະຊຸມໄດ້ຕົກລົງ ແລະ ໃຫ້ທິດຊີ້ນຳກ່ຽວກັບການແກ້ໄຂສິ່ງກີດຂວາງ ການຂົນສົ່ງທາງບົກ ແລະ ການຄຸ້ມຄອງດ່ານສາກົນທາງບົກພາຍໃນປະເທດ ໄດ້ຊີ້ນຳໃຫ້ກະຊວງໂຍທາທິການ ແລະ ຂົນສົ່ງເປັນໃຈກາງສົມທົບກັບຂະແໜງການທີ່ກ່ຽວຂ້ອງ ແລະ ທ້ອງຖິ່ນທີ່ມີດ່ານສາກົນຕັ້ງຢູ່ ຄົ້ນຄວ້າຫາລືກັນເພື່ອກຳນົດມາດຖານດ່ານສາກົນ ດ່ານທ້ອງຖິ່ນ ແລະ ດ່ານປະເພນີໃຫ້ສອດຄ່ອງກັບສະພາບຄວາມເປັນຈິງຂອງປະເທດເຮົາ ກ່ຽວກັບບັນຫາທີ່ດິນເຫັນດີຮັບຮອງດ້ານຫຼັກການ ບົດລາຍງານຂອງຄະນະສະເພາະກິດໃນການກວດກາ ສະຫຼຸບຕີລາຄາ ວິໄຈສະພາບການຄຸ້ມຄອງ-ນຳໃຊ້ທີ່ດິນໄລຍະຜ່ານມາ ຮັບຮອງຮ່າງແຜນຈັດສັນທີ່ດິນແຫ່ງຊາດ ພ້ອມນັ້ນ ໄດ້ພິຈາລະນາຕົກລົງເຫັນດີໃຫ້ສ້າງຕັ້ງນະຄອນຫຼວງພະບາງ ຕາມການສະເໜີຂອງເຈົ້າແຂວງ ແລະ ສະພາປະຊາຊົນແຂວງຫຼວງພະບາງ ຮ່າງດຳລັດວ່າດ້ວຍການຊ່ວຍເຫຼືອ ກົດໝາຍໄດ້ຮັບຮອງໂດຍຫຼັກການ ແຕ່ມອບໃຫ້ກະຊວງທີ່ກ່ຽວຂ້ອງນຳໄປປັບປຸງເນື້ອໃນຄຳສັບຕ່າງໆ ໃຫ້ມີຄວາມຮອບຄອບຮັດກຸມ ສາມາດຈຳກັດຊ່ອງຫວ່າງຕ່າງໆ ຮັບປະກັນແກ່ການຈັດຕັ້ງປະຕິບັດວຽກງານຕົວຈິງ ໃຫ້ມີປະສິດທິຜົນ ແຜນການສ້າງ ແລະ ປັບປຸງກົດໝາຍ ປີ 2018 ໄດ້ຮັບຮອງເອົາຕາມການສະເໜີຂອງກະຊວງຍຸຕິທຳ ເຊິ່ງມີຈຳນວນ 26 ສະບັບ ໃນນີ້ສ້າງໃໝ່ 13 ສະບັບ ປັບປຸງ 13 ສະບັບ ໂດຍຊີ້ນຳໃຫ້ສົມທົບກັບກະຊວງທີ່ກ່ຽວຂ້ອງ ເພື່ອກະກຽມຮ່າງເນື້ອໃນແຕ່ລະກົດໝາຍໃຫ້ລະອຽດຮັດກຸມແລ້ວ ຈັດສັນເຂົ້າຜ່ານກອງປະຊຸມລັດຖະບານແຕ່ລະຄັ້ງ ແລະ ຈັດສັນເຂົ້າພິຈາລະນາໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ IV ການປັບປຸງບັນຍາກາດດຳເນີນທຸລະກິດຢູ່ລາວ ຊີ້ນຳໃຫ້ກະຊວງແຜນການ ແລະ ການລົງທຶນເປັນໃຈກາງສົມທົບກັບກະຊວງທີ່ກ່ຽວຂ້ອງຮີບຮ້ອນ ກຳນົດວິທີການ ມາດຕະການແກ້ໄຂຂັ້ນ ຂອດ ໄລຍະເວລາ ແລະ ຄ່າໃຊ້ຈ່າຍຕ່າງໆ ເພື່ອເຮັດໃຫ້ການດຳເນີນທຸລະກິດລວມສູນຜ່ານປະຕູດຽວ ວ່ອງໄວ ແລະ ມີປະສິດທິຜົນ ເພື່ອນຳສະເໜີຕໍ່ກອງປະຊຸມນາຍົກ-ຮອງນາຍົກ ໃນຕົ້ນເດືອນພະຈິກພິຈາລະນາ ຕົກລົງສ່ວນການແກ້ໄຂໜີ້ສິນ ດ້ວຍຮູບແບບອວ່າຍໜີ້ 3 ແຈ ເຫັນດີໃຫ້ອວ່າຍໜີ້ ຈຳນວນ 3.250 ຕື້ກີບ ພາຍໃຕ້ເງື່ອນໄຂໂຄງການໃນແຜນ ໂຄງການທີ່ຜ່ານການກວດກາສຳເລັດ 100% ໂຄງການທີ່ຖືກສະພາຮັບຮອງ ແລະ ໂຄງການທີ່ກູ້ຢືມຈາກທະນາຄານທຸລະກິດ ທີ່ໄດ້ຮັບການຢັ້ງຢືນຈາກທະນາຄານທຸລະກິດ ທະນາຄານກາງ ໂດຍກຳນົດເຂົ້າໃນແຜນຊຳລະນັບແຕ່ປີ 2018 ເປັນຕົ້ນໄປ ປີລະ 300 ຕື້ກີບ ພ້ອມທັງປະຕິບັດພັນທະຕ່າງໆຕາມກົດໝາຍ ແລະ ໄດ້ຮັບຮອງເອົາດ້ານຫຼັກການ ຮ່າງດຳລັດວ່າດ້ວຍການສົ່ງເສີມການປູກໄມ້ເປັນສິນຄ້າ ໄດ້ຊີ້ນຳໃຫ້ກະຊວງກະສິກຳ ແລະ ປ່າໄມ້ນຳໄປປັບປຸງຄືນໃຫ້ລະອຽດ ຮັດກຸມ ແລະ ເຫັນດີໃຫ້ປັບປຸງຂໍ້ຕົກລົງຂອງກະຊວງອຸດສາຫະກຳ ແລະ ການຄ້າສະບັບ 1833 ໃຫ້ເພີ່ມ 6 ລາຍການຜະລິດຕະພັນໄມ້ສົ່ງອອກ ແລະ ປັບຂະໜາດຜະລິດຕະພັນໄມ້ໃນ 12 ລາຍການ ໃຫ້ສອດຄ່ອງກັບຄວາມເປັນຈິງ ນອກນັ້ນ ໄດ້ຕົກລົງກ່ຽວກັບແຜນງົບປະມານຮັບໃຊ້ ການສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ຊີ້ນຳໃຫ້ກະຊວງປ້ອງກັນປະເທດ ນຳໄປໄລ່ລຽງບັນດາກິດຈະກຳໃຫ້ລະອຽດແລ້ວ ນຳສະເໜີຂໍຄຳເຫັນຈາກກົມການເມືອງສູນກາງພັກ ເພື່ອພິຈາລະນາຕົກລົງ.
ແຫລ່ງຂ່າວ: ໜັງສືພິມວຽງຈັນໃໝ່