ຍິງໄວເຮັດວຽກ ເມື່ອຕ້ອງປະເຊີນກັບຄວາມກົດດັນ ຄວາມຄຽດຈາກການເຮັດວຽກງານ ຫລັງເລີກງານກໍຕ້ອງຫາທາງຜ່ອນຄາຍ ດ້ວຍການໄປທ່ຽວ ໄປງານລ້ຽງສ້າງສັນ ຊຶ່ງແມ່ນຈະເປັນເລື່ອງມ່ວຊື່ນ ແຕ່ບາງເທື່ອກໍອາດສົ່ງຜົນເສຍຕໍ່ສຸຂະພາບໄດ້ ຫາກບໍ່ລະວັງເລື່ອງການດື່ມສິ່ງມຶນເມົາ
ເພາະແມ່ຍິງສ່ວນໃຫຍ່ ອາດຈະຍັງບໍ່ຮູ້ວ່າ ການອອກລິດຂອງສິ່ງມຶນເມົາໃນຜູ້ຍິງຈະແຕກຕ່າງຈາກຜູ້ຊາຍ ຈຶ່ງເຮັດໃຫ້ຜູ້ຍິງເມົາໄວກວ່າຜູ້ຊາຍ ເຖິງວ່າ ນ້ຳໜັກໂຕຈະເທົ່າກັນ ທັງນີ້ເນື່ອງຈາກຮ່າງກາຍຂອງຜູ້ຍິງມີນ້ຳ (ຊຶ່ງເປັນຕົວທີ່ຊ່ວຍເຈືອຈາງແອວກໍຮໍໃນຮ່າງກາຍ) ນ້ອຍກວ່າ ນອກຈາກນີ້ແອວກໍຮໍ ຍັງສົ່ງຜົນເສຍຕໍ່ຮ່າງກາຍຜູ້ຍິງອີກຫລາຍປະການ ເຮົາລອງມາເບິ່ງຕົວຢ່າງນໍາກັນ
ຜິວເສຍ + ຮອຍຕີກາ
ນ້ຳທີ່ເຮົາດື່ມເປັນມອຍເຈີໄລເຊີຈາກພາຍໃນທີ່ໃຫ້ຄວາມຊຸ່ມຊື່ນຕໍ່ຜິວ ດັ່ງນັ້ນຈຶ່ງມີຄຳແນະນຳໃຫ້ດື່ມນ້ຳມື້ລະ 8 ຈອກ ສ່ວນແອວກໍຮໍ ນັ້ນກົງກັນຂ້າມ ເພາະແມ່ນຈະມີລັກສະນະເປັນນ້ຳ ແຕ່ກັບເຮັດໃຫ້ຮ່າງກາຍສູນເສຍນ້ຳຫລາຍ ເພາະການດື່ມແອນກໍຮໍ ເຮັດໃຫ້ຖ່າຍເບົາເລື້ອຍຈຶ່ງສົ່ງຜົນໃຫ້ຜິວແຫ້ງ ຊຶ່ງເຮັດໃຫ້ຜິວເກີດຮອຍຕີນກາ ຫລື ເຮັດໃຫ້ຜິວທີ່ມີຮອຍຢູ່ແລ້ວເກີດຮອຍເລິກຂຶ້ນ ນອກຈາກນີ້ ແອວກໍຮໍ ຍັງເຮັດໃຫ້ຮ່າງກາຍຂາດວິຕາມິນ ແລະ ສານອາຫານທີ່ໄປບຳລຸງຜິວ ໂດຍສະເພາະຢ່າງຍິ່ງ ວິຕາມິນບີ ຊຶ່ງການຂາດວິຕາມິນບີ ຈະເຮັດໃຫ້ຜິວໜັງແຫ້ງ ຫ່ຽວ ແລະ ເປັນສິວ ອີກສາເຫດໜຶ່ງທີ່ເຮັດໃຫ້ແອວກໍຮໍເປັນອັນຕະລາຍຕໍ່ຜິວກໍຄື ແອນກໍຮໍຈະເຂົ້າໄປທຳລາຍຕັບ ເຮັດໃຫ້ຕັບບໍ່ສາມາດຜະລິດສານເຄມີ ເຊັ່ນ ວິຕາມິນ ເຮັດໃຫ້ຜິວເກີດຄວາມໝອງຄ້ຳ
ມີຄວາມສ່ຽງເປັນມະເຮັງເຕົ້ານົມ
ມີງານວິໄຈອອກມາຢ່າງຕໍ່ເນື່ອງວ່າ ການດື່ມແອວກໍຮໍ ກະຕຸ້ນການເປັນມະເຮັງເຕົ້ານົມ ທັງນີ້ກໍເພາະແອວກໍຮໍຊ່ວຍເພີ່ມລະດັບຮໍໂມນເອດໂຕເຈນ ຊຶ່ງເປັນຮໍໂມນ ທີ່ຊ່ວຍໃຫ້ ເຊວມະເຮັງຊະນິດຕອບສະຫນອງຕໍ່ຮໍໂມນ ຈະເລີນເຕີບໂຕ ໂດຍມະຫາວິທະຍາໄລ ອອກຟອດ ໄດ້ເປີດເຜີຍຜົນການວິໄຈວ່າ ແອວກໍຮໍ ເປັນປັດໄຈທີ່ກໍ່ໃຫ້ເກີດມະເຮັງເຖິງຮ້ອຍລະ 11 ໂດຍການວິໄຈເທື່ອນີ້ໄດ້ນຳອາສາສະໝັກທີ່ຢູ່ໃນໄວກາງຄົນຫລາຍກວ່າ 1.2 ລ້ານຄົນ ມາສຶກສາເຖິງປັດໄຈທີ່ກໍ່ໃຫ້ເກີດມະເຮັງເປັນເວລາປະມານ 7 ປີ ແລະ ພົບວ່າຜູ້ທີ່ດື່ມແອວກໍຮໍ ມື້ລະຈອກເປັນປະຈຳ ເຮັດໃຫ້ສ່ຽງຕໍ່ການເປັນມະເຮັງເຕົ້ານົມ
ສາເຫດຂອງຄວາມຕຸ້ຍ
ການດື່ມແອວກໍຮໍ ນອກຈາກຈະເຮັດໃຫ້ເມົາແລ້ວ ຍັງເຮັດໃຫ້ມີນ້ຳໜັກເພີ່ມຂຶ້ນ ອັນນຳໄປສູ່ພະຍາດຕຸ້ຍ ໂດຍສະເພາະຄົນຕຸ້ຍມີໜ້າທ້ອງ ເພາະແອວກໍຮໍ ໃຫ້ພະລັງງານສູງຫລາຍເກືອບເທົ່າໄຂມັນ ຈຶ່ງເລັ່ງໃຫ້ຮ່າງກາຍສະສົມໄຂມັນໃນບໍລິເວນທ້ອງຫລາຍຂຶ້ນ ຍິ່ງຜູ້ຍິງສ່ວນໃຫຍ່ນິຍົມດື່ມແອວກໍຮໍ ປະສົມກັບນ້ຳຫມາກໄມ້ ຫລື ນ້ຳອັດລົມທີ່ມີນ້ຳຕານຫລາຍ ກໍຍິ່ງເພີ່ມພະລັງງານໃຫ້ສູງຂຶ້ນໄປອີກ
ກະທົບສະຫມອງ
ມະຫາວິທະຍາໄລ ໄຮເດນເບິກເປີດເຜີຍຜົນການວິໄຈທີ່ພົບວ່າ ສະຫມອງຂອງຜູ້ຍິງໄດ້ຮັບຜົນກະທົບຈາກ ແອວກໍຮໍຫລາຍກວ່າສະຫມອງຂອງຜູ້ຊາຍ (ຈາກການເຮັດເອັກຊະເລ ຄອມພິວເຕີສະຫມອງຂອງອາສາສະໝັກ 150 ຄົນ) ລວມເຖິງພົບວ່າ ອາສາສະໝັກທີ່ດື່ມໜັກຈະມີເຊວສະຫມອງນ້ອຍ ແລະ ລີບກວ່າຄົນທົ່ວໄປ ທີ່ສຳຄັນຍັງພົບວ່າ ຜູ້ຍິງຈະສູນເສຍເຊວສະຫມອງໃນເວລາທີ່ວ່ອງໄວກວ່າຜູ້ຊາຍ ແມ່ນຜູ້ຍິງຈະດື່ມນ້ອຍກວ່າຜູ້ຊາຍກໍຕາມ ນອກຈາກນີ້ຜູ້ຍິງຍັງມີແນວໂນ້ມທີ່ຈະຕິດແອວກໍຮໍ ແລະ ໄດ້ຮັບຜົນຮຸນແຮງຈາກພະຍາດບາງຢ່າງທີ່ມີແອວກໍຮໍເປັນປັດໄຈສ່ຽງໄວກວ່າຜູ້ຊາຍ ຕົວຢ່າງເຊັ່ນ ພະຍາດຫົວໃຈ ພະຍາດຊຶມເສົ້າ ພະຍາດຕັບ