ສຳນັກຂ່າວເອເອຟພີລາຍງານ ຈາກນະຄອນຫຼວງໂຕກຽວ ປະເທດຍີ່ປຸ່ນ ເມື່ອວັນທີ 19 ຕຸລາ 2017 ຂໍ້ມູນຈາກການສຳຫຼວດດວງຈັນ SELENE ຂອງຍີ່ປຸ່ນ ພົບວ່າພາຍໃນດວງຈັນມີຖ້ຳຂະໜາດຄວາມຍາວ 50 ກມ. ກວ້າງ 100 ແມັດ ທີ່ເກີດຈາກການລະເບີດຂອງພູເຂົາໄຟເມື່ອປະມານ 3,500 ລ້ານປີກ່ອນ ການຄົ້ນພົບຖືກເຜີຍແພ່ລົງໃນວາລະສານວິທະຍາສາດຂອງສະຫະລັດ Geophysical Research Letters ໃນອາທິດທີ່ຜ່ານມາ
ຖ້ຳໃຕ້ດິນມີຊື່ຮຽກວ່າ ເນີນເຂົາມາຣິອຸສ ຈະຊ່ວຍປົກປ້ອງມະນຸດອາວະກາດຈາກສະພາບອາກາດທີ່ມີການປ່ຽນແປງກະທັນຫັນ ແລະ ຣັງສີອັນຕະລາຍທີ່ຈະສຳພັດເມື່ອຢູ່ເທິງຜິວດວງຈັນ
ເຖິງແມ່ນວ່າປັດຈຸບັນຍັງບໍ່ມີການຢືນຢັນທີ່ຊັດເຈນ ແຕ່ຫວັງວ່າໃນອານາຄົດການສຳຫຼວດຈະໄດ້ລາຍລະອຽດຫຼາຍຂຶ້ນກວ່ານີ້.