ທ່ານ ສີຄູນ ບຸນວິໄລ ເລຂາທິການສະມາຄົມ ມິດຕະພາບລາວ-ຈີນ ໄດ້ໃຫ້ສຳພາດຕໍ່ນັກຂ່າວຈາກວິທະຍຸ CRI ປະຈຳລາວ ແລະ ຂ່າວສານປະເທດລາວ ໃນວັນທີ 17 ຕຸລາ ນີ້ວ່າ: ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIX ຂອງພັກກອມມູນິດຈີນ ແມ່ນເຫດການ ການເມືອງທີ່ມີຄວາມໝາຍສຳຄັນຍິ່ງ ໃນຊີວິດການເມືອງຂອງພັກກອມມູນິດຈີນ, ເຊິ່ງໄດ້ໄຂຂຶ້ນໃນໄລຍະສຳຄັນ ຂອງການກຳນົດຍຸດທະສາດ ແລະ ວາງນະໂຍບາຍເພື່ອບັນລຸການສ້າງສັງຄົມອັນອິ່ມໜ່ຳສຳລານຮອບດ້ານ ແລະ ຄວາມຝັນຂອງຈີນ ໃນການຟື້ນຟູຄວາມຮຸ່ງເຮືອງສີວິໄລ ຂອງເຊື້ອຊາດຈີນ ໃນກາງສັດຕະວັດທີ 21 ໃຫ້ປາກົດຜົນເປັນຈິງຢ່າງມີໄຊ.
ທ່ານ ສີຄູນ ບຸນວິໄລ ໄດ້ຕີລາຄາສູງຕໍ່ແນວທາງການປະຕິຮູບ ແລະ ນະໂຍບາຍ ການພັດ ທະນາຂອງສະຫາຍ ສີຈິນຜິງ ເຊິ່ງໄດ້ມີແບບແຜນການນຳພາ ຢ່າງກວມລວມຮອບດ້ານ ຕາມແນວຄິດໃໝ່, ຍຸດທະສາດໃໝ່ ແລະ ມາດຕະການໃໝ່ ພາຍໃຕ້ສະພາບການໃໝ່ ແຫ່ງການພັດທະນາຢ່າງໜັກແໜ້ນ,ແນໃສ່ຊຸກຍູ້ການດຳເນີນການພັດທະນາ 5 ປະການ ໃນໜຶ່ງດຽວ, ຍຸດທະສາດ 4 ຮອບດ້ານ ແລະ ເປົ້າໝາຍສູ່ຊົນ 100 ປີ 2 ເຫດການ ດ້ວຍບາດກ້າວທີ່ໜັກແໜ້ນ. ກອງປະ ຊຸມດັ່ງກ່າວ, ແມ່ນມີຄວາມໝາຍສຳຄັນ ທ່າມກາງ ຈີນພວມ ຢູ່ຕໍ່ໜ້າໄລຍະຫົວລ້ຽວຫົວຕໍ່ ເພື່ອໃຫ້ປະສົບຜົນສຳເລັດ ເປົ້າໝາຍ ໃນການກໍ່ສ້າງສັງຄົມໃຫ້ອີ່ມໝຳສຳລານຢ່າງຮອບດ້ານ ແລະ ຊຸກຍູ້ການພັດທະນາສັງຄົມນິຍົມຈີນ ໃຫ້ມີສີສັນ ພິເສດ.
ທ່ານ ກ່າວຕື່ມວ່າ: ສປ ຈີນ ເປັນປະເທດທີ່ມີແຜ່ນດິນໃຫຍ່ອັນດັບທີສາມ ຂອງໂລກ, ມີພົນລະເມືອງຫລາຍເປັນອັນດັບໜຶ່ງ, ສັງຄົມຂອງຈີນ ຈະບໍ່ມິຄວາມສັບສົນ ແລະ ຢູ່ດ້ວຍກັນຢ່າງມີຄວາມສາມັກຄີປອງດອງ. ນອກຈາກນີ້, ຜົນງານທີ່ຂ້າພະເຈົ້າ ສຳພັດໄດ້ແມ່ນການພັດທະນາເຕັກນິກວິທະຍາສາດທີ່ທັນສະໄໝ ນັບມື້ນັບລື່ນກາຍປະເທດທີ່ພັດທະນາໄປກ່ອນ ແລະ ການສ້າງກຳລັງປ້ອງກັນຄວາມສະຫງົບຂອງຈີນ ແມ່ນເຂັ້ມແຂງ ສາມາດເປັນອີງໃຫ້ແກ່ສັນຕິພາບຂອງໂລກໄດ້.ການພັດທະນາຂອງຈີນ ມັນໄດ້ສົ່ງຜົນກະທົບຕໍ່ທຸກປະເທດ ທີ່ໄດ້ຮັບຜົນປະໂຫຍດຈາກການພັດທະນາຂອງຈີນ. ສະນັ້ນ, ກອງປະຊຸມຄັ້ງນີ້ຄິດວ່າ ຈະວາງແນວທາງນະໂຍບາຍການເມືອງຢ່າງຮອບຄອບ ແລະ ລະອຽດເຮັດໃຫ້ສັງຄົມຈີນ ອີ່ມໜຳສຳລານໃນປີ 2020 ຄວາມທຸກຍາກຂອງປະຊາຊົນຈີນ ຈະຖືກລຶບລ້າງ.
ສຳລັບ ສປປ ລາວ ກໍເປັນປະເທດ ທີ່ມີຊາຍແດນຕິດກັບ ສປ ຈີນ, ຊຶ່ງໄດ້ຮັບຜົນສະທ້ອນໂດຍກົງທີ່ລັດຖະບານຈີນ ໃຫ້ການຊ່ວຍເຫລືອເປັນຕົ້ນແມ່ນ ການກໍ່ສ້າງຖະໜົນຫົນທາງ, ຕຶກອາຄານ, ສູນການຄ້າ ແລະ ກໍ່ສ້າງເຂື່ອນໄຟຟ້ານ້ຳຕົກ. ນອກຈາກນີ້, ຍັງໃຫ້ການຊ່ວຍເຫລືອທາງດ້ານເຕັກນິກວິຊາການ ແລະ ທີ່ສຳຄັນ ແມ່ນການສ້າງເສັ້ນທາງລົດໄຟຄວາມໄວສູງ ຊຶ່ງມັນຈະເປັນເສັ້ນທາງທີ່ ສປປ ລາວ ຈະໄດ້ເປັນທາງຜ່ານ, ເຊື່ອມໂຍງກັບບັນດາປະເທດອາຊຽນ ແລະ ພູມມີພາກ ຈະກາຍເປັນໂອກາດອັນດີ ໃນການຄົມມະນາຄົມຂົນສົ່ງ ອອກສູ່ຕ່າງປະເທດຂອງລາວ.
ພັກປະຊາຊົນປະຕິວັດລາວ, ລັດຖະບານ ແລະ ປະຊາຊົນລາວບັນດາເຜົ່າ ສຸດທີ່ຖະນຸຖະໜອມ ສາຍພົວພັນມິດຕະພາບ ທີ່ເປັນມູນເຊື້ອອັນດີງາມລາວ-ຈີນ ແລະ ພ້ອມທີ່ຈະຮ່ວມກັບພັກກອມມູນິດຈີນ, ລັດຖະບານ ແລະ ປະຊາຊົນຈີນ ອ້າຍນ້ອງ ສືບຕໍ່ເຮັດສຸດຄວາມສາມາດຂອງຕົນ ໃນການປົກປັກຮັກສາ ແລະ ເພີ່ມພູນຄູນສ້າງສາຍພົວພັນ ແບບຄູ່ຮ່ວມຍຸຸດທະສາດຮອບດ້ານໝັ້ນຄົງຍາວນານ ແລະ ຄວາມໄວ້ເນື້ອເຊື່ອໃຈກັນ ລະຫວ່າງສອງພັກ, ສອງລັດ ແລະ ປະຊາຊົນສອງ ຊາດລາວ-ຈີນ ໃຫ້ນັບມື້ນັບແໜ້ນແຟ້ນເລິກເຊິ່ງກວ່າເກົ່າ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ຈີນ ແລະ ທັງເປັນການປະກອບສ່ວນເຂົ້າ ໃນພາລະກິດສັນຕິພາບ ແລະ ການຮ່ວມມືພັດທະນາຢູ່ໃນພາກພື້ນ ແລະ ໃນໂລກ.
ພາບ-ຂ່າວ: ມະນີທອນ (ສຳນັກຂ່າວສານປະເທດລາວ)