ທ່ານ ນາງ ສວນສະຫວັນ ວິຍະເກດ ເລຂາທິການສະພາແຫ່ງຊາດ ໄດ້ຖະແຫຼງຂ່າວຕໍ່ສື່ມວນຊົນກ່ຽວກັບການດຳເນີນກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ VIII ຂຶ້ນໃນວັນທີ 11 ຕຸລາ 2017 ທີ່ ອາຄານຫຼັງໃໝ່ສະພາແຫ່ງຊາດ ວ່າ: ເພື່ອປະຕິບັດຕາມມະຕິຂອງຄະນະປະຈຳສະພາແຫ່ງຊາດ ສະບັບເລກທີ 0146/ຄປຈ, ລົງວັນທີ 4 ຕຸລາ 2017 ວ່າດ້ວຍການດຳເນີນກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ VIII ເຊິ່ງຈະໄດ້ຮັບຟັງ ແລະ ພິຈາລະນາຮັບຮອງເອົາຫຼາຍບັນຫາສຳຄັນດັ່ງນີ້:
ຈະໄດ້ຮັບຟັງບົດລາຍງານສັງເຂບຂອງທ່ານ ນາຍົກລັດຖະມົນຕີ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາປະຈຳປີ 2017 ແລະ ແຜນພັດທະນາປະຈຳປີ 2018, ບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳປີ 2017 ແລະ ທິດທາງແຜນການ ປະຈຳປີ 2018, ຮັບຟັງລາຍງານກ່ຽວກັບການຈັດຕັ້ງປະຕິບັດວຽກງານທ່ອງທ່ຽວໃນຊຸມປີຜ່ານມາ ແລະ ທິດທາງແຜນການໃນປີ 2018.
ພິຈາລະນາ ຮັບຮອງເອົາ ຮ່າງກົດໝາຍໃໝ່ ແລະ ຮ່າງກົດໝາຍປັບປຸງ ລວມທັງໝົດ 16 ສະບັບ ໃນນີ້: ຮ່າງກົດໝາຍສ້າງໃໝ່ ມີຈໍານວນ 9 ສະບັບ ແລະ ຮ່າງກົດໝາຍປັບປຸງ ຈຳນວນ 7 ສະບັບຄື:
ໃນໄລຍະການດຳເນີນກອງປະຊຸມສະພາແຫ່ງຊາດ ຈະມີໂທລະສັບສາຍດ່ວນ ເພື່ອຮັບເອົາຄຳຄິດເຫັນ ແລະ ຄຳສະເໜີໂດຍກົງຈາກປະຊາຊົນ ທີ່ຈະສົ່ງໄປຍັງກອງປະຊຸມ ໝາຍເລກ 156.